Ezekiyeli 1:1-28
1 Hi lembe ga wu 30, hi siku ga wutlhanu ga hweti ya wumune, na ndzi hi cikari ka vanhu lava va nga hi wukhumbini,+ mbhirini ya congo wa Kebhare,+ a matilo ma no vhululeka ndzi sangula ku wona a miwoniso ya Nungungulu.
2 Hi siku ga wutlhanu ga hweti — ka lembe ga wutlhanu ga wukhumbi ga hosi Jehoyakina+ —
3 a mhaka ya Jehovha yi nota ka Ezekiyeli,* a n’wana wa mupristi Bhuzi, mbhirini ya congo wa Kebhare, tikweni ga vaKaldheya.+ Na a hi laho, a canja ga Jehovha gi nota hehla kakwe.+
4 Laha ndzi nga kari ndzi cuwuka, ndzi no wona a mheho ya hombe+ na yita hi n’walungu;* ku wa hi ni refu ga hombe ni ndzilo wo hatima*+ zvi nga randzelwe hi kuwonekela ka hombe. Cikari ka ndzilo, ku wa hi ni nchumu wu nga wonekisa ku khwatsi i simbi yo phatima.*+
5 Cikari ka wona, ku wa hi ni lezvi zvi nga wonekisa ku khwatsi mune wa zvivangwa zvi hanyako,+ niku a cin’we ni cin’wani ci wa wonekisa ku khwatsi munhu.
6 A cin’we ni cin’wani ci wa hi ni mune wa tinghohe ni mune wa tipapa.+
7 A mikondzo ya zvona yi wa hi yo lulama, ni lomu zvi nga kandzihela hi kona ku wa fana ni zvinyondzwani zva role. Zvi wa phatima a ku fana ni kobre yi kutlilweko.+
8 Zvi wa hi ni mandla ya munhu lahasi ka tipapa ta zvona matlhelweni wontlhe ya mune. Hi wumune ga zvona, zvi wa hi ni tinghohe ni tipapa.
9 A tipapa ta zvona ti wa henyana. Zvi wa nga hundzuluki a cikhati leci zvi fambako; a cin’we ni cin’wani ci wa famba ci kongoma mahlweni.+
10 A tinghohe ta zvona ti wa tshamisile lezvi: A cin’we ni cin’wani ka lezvi zva mune ci wa hi ni nghohe ya munhu ni nghohe ya nghala+ hi tlhelo ga cinene, ni nghohe ya homu+ hi tlhelo ga cibhabha, niku a cin’we ni cin’wani ka lezvi zva mune ci wa hi ni nghohe+ ya gama.+
11 Hi zvalezvi a tinghohe ta zvona ti nga tshamisile zvona. A tipapa ta zvona ti wa tshambulukile hehla ka zvona. A cin’we ni cin’wani ci wa hi ni tipapa timbiri ti nga henyana lin’we ni lin’wani, ni tipapa timbiri ti nga fenengeta a mimiri ya zvona.+
12 A cin’we ni cin’wani ca zvona ci wa famba ci kongoma mahlweni, zviya ni kwihi laha a moya wu nga zvi susumeta kuya kona.+ Zvi wa nga hundzuluki a cikhati leci zvi nga famba.
13 A zvivangwa zvi hanyako zvi wa wonekisa ku khwatsi makhala ya ndzilo ma vhurako. Ku wa hi ni zvilo zvi nga wonekisa ku khwatsi zvihlahle zva ndzilo zvi vhurako zvi ngaya ndzhako ni phambeni cikari ka zvivangwa zvi hanyako, niku ku wa huma kuhatima hi lomu ndzilweni.+
14 Laha a zvivangwa zvi hanyako zvi nga famba na zvi wuya, a kufambafamba ka zvona ku wa ku khwatsi kuhatima ka cingwalangwandla.
15 Laha ndzi nga kari ndzi cuwuka a zvivangwa zvi hanyako, ndzi no wona a rodha laha misaveni tlhelweni ga cin’we ni cin’wani ca zvivangwa zvi hanyako zva mune wa tinghohe.+
16 A marodha ni ciwumbeko ca wona zvi wa wonekisa ku khwatsi zvo phatima a ku fana ni krizolite; hi wumune ga wona ma wa ku khwatsi ma fana. Lezvi ma nga wonekisa zvona ni ciwumbeko ca wona zvi wa ku khwatsi hi loku a rodha gin’we gi hi ndzeni ka gin’wani.
17 Laha ma nga kari ma famba, ma wa zvi kota kuya ka ni gihi tlhelo ka lawa ya mune na ma nga jiki a cikhati leci ma fambako.
18 A tijanta ta wona ti wa tlakukile nguvhu laha ka kuza ti hlamalisa, niku a tijanta ta marodha wontlhe ya mune ti wa tele hi matihlo matlhelweni wontlhe.+
19 Contlhe cikhati leci a zvivangwa zvi hanyako zvi nga famba, a marodha ma wa famba zvin’we nazvo, ni laha a zvivangwa zvi hanyako zvi nga tlakuka laha misaveni, a marodha wonawu ma wo tlakuka.+
20 Ma waya laha a moya wu nga ma susumeta a kuya kona, ni kwihi laha a moya wu ngaya kona. A marodha ma wa tlakuka zvin’we nazvo, hakuva a moya lowu wu nga tira ka zvivangwa zvi hanyako* wu wa hi kona kambe ni ka marodha.
21 A cikhati leci zvi nga famba, wonawu ma wo famba; a cikhati leci zvi nga nyima wonawu ma wo nyima; ni laha zvi nga tlakuka laha misaveni, a marodha ma wo tlakuka zvin’we nazvo, hakuva a moya lowu wu nga tira ka zvivangwa zvi hanyako wu wa hi kona kambe ni ka marodha.
22 Hehla ka tihloko ta zvivangwa zvi hanyako, ku wa hi ni cilo co khwatsi i vhidro go phatima ni go hlamalisa a ku khwatsi i jelo, ci nga andlalilwe hehla ka tihloko ta zvona.+
23 Hi lahasi ka cona, a tipapa ta zvona ti wa tshambulutilwe, a lin’we li cuwuka lin’wani. A cin’we ni cin’wani ci wa hi ni tipapa timbiri ti nga fenengeta a tlhelo gin’we ga mimiri ya zvona ni timbiri ti nga fenengeta a tlhelo legi gin’wani.
24 A cikhati leci ndzi ngazwa a guwa ga tipapa ta zvona, gi wa ku khwatsi i guwa ga mati ya ntamu, gi ku khwatsi i gezu ga Loyi wa Ntamu Wontlhe.+ Laha zvi nga famba, a guwa ga zvona gi wa ku khwatsi i guwa ga butho. Loku zvi nyima, zvi wa releta a tipapa ta zvona.
25 Ku wa huma gezu hi le hehla ka leci ca ku khwatsi i vhidro ci nga hi hehla ka tihloko ta zvona. (Loku zvi nyima, zvi wa releta a tipapa ta zvona.)
26 Hi le hehla ka leci co khwatsi i vhidro ci nga hi hehla ka tihloko ta zvona, ku wa hi ni leci ci nga wonekisa ku khwatsi i ribye ga safira,+ ci nga wonekisa ku khwatsi citshamu ca wuhosi.+ Hi le hehla, ku wa hi ni co khwatsi munhu a nga tshamile citshan’wini ca wuhosi.+
27 Ndzi no wona a nchumu wo phatimisa ku khwatsi i simbi yo phatima,+ na wu ku khwatsi i ndzilo wu woningako kusukela ka leci ci nga wonekisa ku khwatsi ciwunu cakwe zviya hehla. A kusukela ciwunwini cakwe zviya hasi, ndzi no wona cilo co khwatsi i ndzilo.+ Ku wa hi ni kuwonekela ko phatima matlhelweni yakwe wontlhe
28 ko fana ni wura ga nyazimi+ lomu refini hi siku ga vhula. Ku wa wonekisa lezvo a kuwonekela ko phatima matlhelweni yakwe. Ku wa ku khwatsi kungangamela ka Jehovha.+ A cikhati leci ndzi nga zvi wona, ndzi nowa hi nghohe, ndzi sangula kuzwa gezu ga munhu na a wulawula.
Mitlhamuselo ya lahasi
^ Zvi wulako ku: “Nungungulu wa tiyisa”.
^ Kutani: “norte”.
^ Kutani: “eletro”, ku nga nchumu wo phatima wo mahiwa hi ouro yi patsilweko ni prata.
^ Kutani: “ni zvingwalangwandla”.
^ Hi kukongoma: “a moya wa civangwa ci hanyako”.