Ezekiyeli 11:1-25
11 A moya wu no ndzi tlakula wu ndzi yisa nyangweni ya tlhelo ga mutsuwuka-gambo ya yindlu ya Jehovha, yi nga nyangwa leyi yi cuwukeneko ni mutsuwuka-gambo.+ Kwalaho nyangweni, ndzi no wona a 25 wa vavanuna; cikari kabye ku wa hi na Jaazaniya, a n’wana wa Azuri, na Pelatiya, a n’wana wa Bhenaya, va nga tihosana ta vanhu.+
2 Hi kulandzela, i te ngalo ka mina: “N’wana wa munhu, lava hi vavanuna lava va lukako a mano ya kubiha ni ku nyika wusungukati ga hava dhoropeni legi.
3 Ve ngalo: ‘Kasi leci a hi cona cikhati ca ku aka tiyindlu ke?+ A dhoropa* i mbita,*+ hina hi nyama.’
4 “Hikwalaho, va phrofetele. N’wana wa munhu, phrofeta.”+
5 Hi kulandzela, a moya wa Jehovha wu nota hehla ka mina,+ yena a ndzi byela lezvi: “Wula, uku: ‘Jehovha, i ngalo: “Lezvi mu wulako hi zvona, n’wina va yindlu ya ka Izrayeli, niku ndza zvi tiva lezvi mu zvi pimisako.
6 Mu dayisile vanhu vo tala dhoropeni legi mu tlhela mu tata maruwa ya gona hi lava va delweko.”’”+
7 “Hikwalaho, Jehovha, a Hosi ya Hombe, i ngalo: ‘A zvirumbi lezvi mu mbambameteleko lomu dhoropeni i nyama, ni dhoropa i mbita.+ Kanilezvi mu ta humeswa ka gona.’”
8 “‘N’wina mu chava cipadha,+ kanilezvi mina ndzi ta neha cipadha hehla ka n’wina’, ku wula Jehovha, a Hosi ya Hombe.
9 ‘Ndzi ta mu humesa dhoropeni ndzi mu nyikela canjeni ga vamatiko ndzi tlhela ndzi mu lamula.+
10 Mu ta dawa hi cipadha.+ Ndzi ta mu lamula mbhinganweni wa Izrayeli+ niku mu ta zvi tiva lezvaku hi mina Jehovha.+
11 A dhoropa gi nga tava mbita ya n’wina ne n’wina mu nga tava nyama ndzeni ka gona; ndzi ta mu lamula mbhinganweni wa Izrayeli,
12 mu ta zvi tiva lezvaku hi mina Jehovha. Hakuva a mu fambangi hi zvileletelo zva mina ne a mu landzelangi a zviboho zva mina zva kulamula,+ kanilezvi mu no landzela a zviboho zva kulamula zva matiko lawa mu nga cikari ka wona.’”+
13 Zvalezvi ndzi nga mbheta ku phrofeta, Pelatiya, a n’wana wa Bhenaya, i nofa; makunu ndzi nowa hi nghohe ndzi rila hi gezu ga hombe, ndziku: “O Jehovha, Hosi ya Hombe, u lava ku fuvisa a misalela ya ka Izrayeli ke?”+
14 A mhaka ya Jehovha yi nota kambe ka mina, yi taku:
15 “N’wana wa munhu, a vamakabye va wena, ina, a vamakabye va wena lava va nga ni fanelo ya kutlhatlhisa, zvin’we ni yindlu yontlhe ya ka Izrayeli, va byelilwe hi vaaki va Jerusalema a ku ngalo: ‘Tsawukanani na Jehovha. A tiko legi ga hina; hi nyikilwe gona kota tshomba.’
16 Hikwalaho, wula uku: ‘Jehovha, a Hosi ya Hombe, i ngalo: “Hambu lezvi ndzi va susileko vaya kule cikari ka vamatiko ni ku va hangalasa cikari ka matiko,+ lokuloku ndzi tava wutshamu go basa kabye ka matiko lawa va yileko ka wona.”’+
17 “Hikwalaho, wula lezvi: ‘Jehovha, a Hosi ya Hombe, i ngalo: “Ndzi ta mu hlengeleta cikari ka vamatiko ndzi mu tlhanganisa hi cikari ka matiko lawa mu hangalasilweko ka wona niku ndzi ta mu nyika a tiko ga Izrayeli.+
18 Va ta tlhela ka gona va ya susa a zvilo zvontlhe zva manyala ni mitiro yontlhe yo nyenyeza ka gona.+
19 Ndzi ta va nyika a mbilu yin’we+ ndzi tlhela ndzi va chela a moya wuswa;+ ndzi ta susa a mbilu ya ribye mimirini yabye+ ndzi va nyika a mbilu ya nyama,*+
20 va fela ku famba zvileletelweni zva mina, va hlayisa zviboho zva mina zva kulamula va tlhela va zvi ingisa. Makunu va tava vanhu va mina, mina ndziva Nungungulu wabye.”’
21 “‘“Kanilezvi lava a timbilu tabye ti ti yimiseleko ku simama zvilweni zvabye zva manyala ni mitirweni yabye yo nyenyeza, ndzi ta neha mawuyawuya ya ndlela yabye hehla ka hloko yabye”, ku wula Jehovha, a Hosi ya Hombe.’”
22 Makunu a makerubhima ma no tlakusa a tipapa ta wona, niku a marodha ma wa hi kusuhani nawo.+ A kungangamela ka Nungungulu wa Izrayeli ku wa hi hehla ka wona.+
23 A kungangamela ka Jehovha+ ku no kandziha hi lomu dhoropeni ku ya yima hehla ka citsunga ci nga mutsuwuka-gambo wa dhoropa.+
24 A moya wu no ndzi tlakula — muwonisweni lowu ndzi vileko nawo hi moya wa Nungungulu — wu ndzi yisa ka vanhu lava va nga hi wukhumbini le Kaldheya. Hi kulandzela, a muwoniso lowu ndzi wu wonileko wu no suka ka mina.
25 Makunu ndzi no sangula ku hlawutela a vanhu lava va nga hi wukhumbini zvontlhe lezvi Jehovha a nga ndzi kombile.
Mitlhamuselo ya lahasi
^ Hi kukongoma: “Yena”, gi nga dhoropa ga Jerusalema, ku nga lomu a vaJudha va nga alakanya ku va vhikelekile.
^ Kutani: “bhota ga nomu wo anama”.
^ Ku nga mbilu yi amukelako a zvileletelo zva Nungungulu.
