Ezekiyeli 12:1-28
12 A mhaka ya Jehovha yi nota kambe ka mina, yi taku:
2 “N’wana wa munhu, u hanya ka yindlu ya kuhluwuka. Va na ni matihlo kasi ku wona, kanilezvi a va woni; ni tindleve kasi kuzwa, kanilezvi a vazwi,+ hakuva i yindlu ya kuhluwuka.+
3 Kanilezvi wena, n’wana wa munhu, longela cijumba ca wena kasi uya wukhumbini. Makunu ni hlikanhi, na va kari va ku cuwukela, u taya wukhumbini. Suka hi mutini wa wena uya ka gin’wani wutshamu a ku khwatsi hi loku uya wukhumbini na va kari va ku cuwukela. Kuzvilava va ta gondza cokari, hambu lezvi va nga yindlu ya kuhluwuka.
4 Ni hlikanhi, humesa cijumba ca wena lahandle kasi uya wukhumbini, na va kari va ku cuwukela. Hi kulandzela, ni gambo, u ta huma a ku khwatsi hi loyi a khomilweko a yisiwa wukhumbini,+ na va kari va ku cuwukela.
5 “Na va kari va ku cuwukela, bhoxa vanga laha ka muro u humesela zvibya zva wena hi gona.+
6 Na va kari va ku cuwukela, pinga zvibya zva wena hi katla u huma nazvo lomu munyameni. Fenengeta nghohe ya wena kasi u nga woni lahasi, hakuva ndzi ta ku maha cikombiso ka yindlu ya ka Izrayeli.”+
7 Ndzi no zvi mahisa zvalezvi ndzi nga leleteliswa zvona. Ni hlikanhi, ndzi no humesa a cijumba ca mina ca ku khwatsi cijumba ca kuya wukhumbini. Ni gambo, ndzi no bhoxa vanga laha ka muro hi mandla. Laha makunu gi nga hi munyama, ndzi no humesela a zvibya zva mina lahandle ndzi zvi pinga hi katla na va zvi wona hi mahlo yabye.
8 Ni mixo, a mhaka ya Jehovha yi nota kambe ka mina, yi taku:
9 “N’wana wa munhu, a yindlu ya ka Izrayeli, a yindlu ya kuhluwuka, a yi ku wutisangi, yiku: ‘Zvini u mahako ke?’
10 Va byele, uku: ‘Jehovha, a Hosi ya Hombe, i ngalo: “A ciphrofeto leci ci xungeta a hosana+ leyi yi nga Jerusalema ni yindlu yontlhe ya ka Izrayeli yi nga lomu dhoropeni.”’
11 “Wula, uku: ‘Ndzi cikombiso ka n’wina.+ A ku khwatsi hi lezvi ndzi mahileko, va ta mahiwa zvalezvo. Va taya wukhumbini, va taya kukhotselweni.+
12 A hosana yi nga cikari kabye yi ta pinga zvibya zva yona hi katla yi huma na ku hi munyama. Yi ta bhoxa vanga laha ka muro yi humesela zvibya zva yona hi gona.+ Yi ta ti fenengeta nghohe kasi yi nga woni lahasi.’
13 Ndzi ta hoxela likoka la mina hehla kakwe niku ndzi ta mu phasa hi likoka la mina la ku hlota hi lona.+ Andzhako ka lezvo, ndzi ta mu yisa Bhabhuloni, tikweni ga vaKaldheya, kanilezvi a nga ta gi wona; i ta fela seyo.+
14 Vontlhe lava va to ngha va hi matlhelweni yakwe, a vavhuneteli vakwe ni mabutho yakwe, ndzi ta va hangalasa matlhelweni wontlhe;+ ndzi ta hlomula cipadha ci va hlongolisela.+
15 Makunu va ta zvi tiva lezvaku hi mina Jehovha, a cikhati leci ndzi to va hangalasa cikari ka vamatiko ndzi tlhela ndzi va xwanya cikari ka matiko.
16 Kanilezvi ndzi ta huluxa va tsongwani cikari kabye ka cipadha, ni ndlala, ni tungu, va fela ku hlawutela a mitiro yabye yontlhe yo nyenyeza cikari ka matiko lawa va toya ka wona; va ta zvi tiva lezvaku hi mina Jehovha.”
17 A mhaka ya Jehovha yi nota kambe ka mina, yi taku:
18 “N’wana wa munhu, gana pawa ya wena na u rurumela, unwa mati ya wena na u gavatana ni kukarateka.+
19 Byela a vanhu va tiko, uku: ‘Lezvi hi lezvi Jehovha, a Hosi ya Hombe, a wulako ka vahanyi va Jerusalema, tikweni ga Izrayeli, aku: “Va taga pawa yabye hi kukarateka, vanwa mati yabye na va rurumela hi kuchava, hakuva a tiko gabye gi ta hahlulwa gi ku bhi+ hi kota ya tihanyi ta vontlhe lava va hanyako ka gona.+
20 A madhoropa lawa ma nga ni vaaki ma ta hahlulwa, ni tiko gi tava ciwula;+ mu ta zvi tiva lezvaku hi mina Jehovha.”’”+
21 A mhaka ya Jehovha yi nota kambe ka mina, yi taku:
22 “N’wana wa munhu, i vingu muni legi mu nga nago lomu Izrayeli, gaku: ‘A masiku ma hundza, kanilezvi a miwoniso a yi tatiseki’?+
23 Hikwalaho, va byele, uku: ‘Jehovha, a Hosi ya Hombe, i ngalo: “Ndzi ta fuvisa a vingu legi, va nga ta ha gi tirisa kambe lomu Izrayeli.”’ Kanilezvi va byele, uku: ‘A masiku ma chikela,+ ni miwoniso yontlhe yi ta tatiseka.’
24 Hakuva ku nga ta ha tshuka kuva ni muwoniso wa mawunwa kutani kuvhumba ka kukhohlisa ndlwini ya ka Izrayeli.+
25 ‘“Hakuva mina, Jehovha, ndzi ta wulawula. Ni gihi gezu ndzi to wula gi ta tatiseka handle ka kuhlwela.+ Masikwini ya n’wina,+ n’wina va yindlu ya kuhluwuka, ndzi ta wula gezu ndzi tlhela ndzi gi tatisa”, ku wula Jehovha, a Hosi ya Hombe.’”
26 A mhaka ya Jehovha yi nota kambe ka mina, yi taku:
27 “N’wana wa munhu, lezvi hi lezvi a vanhu* va ka Izrayeli va wulako: ‘A muwoniso lowu a wu wonako wu komba masiku ya le kule niku i phrofeta xungetano hi cikhati ca ha hiko kule.’+
28 Hikwalaho, va byele, uku: ‘Jehovha, a Hosi ya Hombe, i ngalo: “‘Gi hava ni gezu gin’we ga mina gi to hlwela; ni cihi ndzi wulako ci ta tatiseka’, ku wula Jehovha, a Hosi ya Hombe.”’”
Mitlhamuselo ya lahasi
^ Hi kukongoma: “a yindlu”.
