Ezekiyeli 14:1-23
14 A madhota yo kari ya ka Izrayeli ma nota ma ta tshama mahlweni ka mina.+
2 Makunu a mhaka ya Jehovha yi nota ka mina, yi taku:
3 “N’wana wa munhu, a vavanuna lava va ti yimisele ku landzela a zvifananiso zvabye zva manyala* niku va vekile cikhunguvanyiso mahlweni ka vanhu ca ku va wonhisa. A ku ndzi nga va tsika va ndzi wutisa ke?+
4 Makunu wulawula navo u va byela, uku: ‘Jehovha, a Hosi ya Hombe, i ngalo: “Loku a muIzrayeli a ti yimisele ku landzela a zvifananiso zvakwe zva manyala a tlhela a yimisa cikhunguvanyiso mahlweni ka vanhu ca ku va wonhisa, andzhako ka lezvo, a ya wutisa muphrofeti, mina, Jehovha, ndzi ta mu hlamula lezvi zvi mu faneleko hi kota ya zvifananiso zvakwe zvo tala zva manyala.
5 Ndzi ta tata a mbilu ya yindlu ya ka Izrayeli hi kuchava,* hakuva vontlhe va ndzi fularele va landzela a zvifananiso zvabye zva manyala.”’+
6 “Hikwalaho, byela a yindlu ya ka Izrayeli, uku: ‘Jehovha, a Hosi ya Hombe, i ngalo: “Wuyani, tsikani a zvifananiso zva n’wina zva manyala, mu fularela a mitiro ya n’wina yontlhe yo nyenyeza.+
7 Hakuva loku a muIzrayeli kutani muluveli a hanyako lomu Izrayeli a ti tsawukanisa na mina a tlhela a ti yimisela ku landzela a zvifananiso zvakwe zva manyala ni ku veka cikhunguvanyiso mahlweni ka vanhu kasi ku va wonhisa, andzhako ka lezvo, a ya wutisa a muphrofeti wa mina,+ mina, Jehovha, ndzi ta mu hlamula ha ndzoce.
8 A nghohe ya mina yi ta vhukela munhu loye ndzi mu maha citlharihiso ni vingu ndzi tlhela ndzi mu tsema cikari ka vanhu va mina;+ mu ta zvi tiva lezvaku hi mina Jehovha.”’
9 “‘Kanilezvi loku a muphrofeti a kanganyisiwa, a hlamula, ku tava ku hi mina, Jehovha, ndzi kanganyisileko a muphrofeti loye.+ Ndzi ta nawuluta a canja ga mina ndzi mu lovisa cikari ka vanhu va mina va ka Izrayeli.
10 Va ta rwala nandzu wabye; a nandzu wa loyi a wutisileko wu ta fana ni nandzu wa muphrofeti
11 kasi a yindlu ya ka Izrayeli yi tsika a ku ti tsawukanisa na mina yi tlhela yi nyima a ku ti nyenyezisa hi zvihambunyeto zvabye zvontlhe. Makunu va tava vanhu va mina, mina ndziva Nungungulu wabye’,+ ku wula Jehovha, a Hosi ya Hombe.”
12 A mhaka ya Jehovha yi nota kambe ka mina, yi taku:
13 “N’wana wa munhu, loku a tiko gi ndzi wonhela hi kungatsumbeki, ndzi ta nawuluta a canja ga mina hehla ka gona ndzi vhala zvakuga zvi nga ha ngheni;*+ ndzi ta rumela ndlala ka gona,+ ndzi fuvisa vanhu ni zvihari ka gona.”+
14 “‘Hambu loku a vavanuna lava va vanharu — Nowa,+ na Dhaniyeli,+ na Joba+ — va wova ka gona, va wa to ponisa a mihefemulo* yabye ntsena hi kota ya kululama kabye’,+ ku wula Jehovha, a Hosi ya Hombe.”
15 “‘Kutani a hi zvi vekeni laha ka ku ndzo rumela zvivandza zva khwati lomu tikweni zvi ta fuvisa a vahanyi va gona, zvi gi maha ciwula ku nga ha hundzi munhu ka gona hi kota ya zvivandza zva khwati.+
16 A ku khwatsi hi lezvi ndzi hanyako’, ku wula Jehovha, a Hosi ya Hombe, ‘hambu loku a vavanuna lava va vanharu va wova ka gona, va wa nga ta ponisa a vafana vabye ne a vanhanyana vabye; va wa to ponisa a mihefemulo yabye ntsena niku a tiko gi wa tava ciwula.’”
17 “‘Kutani a hi zvi vekeni laha ka ku ndzo neha cipadha tikweni lego,+ ndziku: “A cipadha ci wa hundze hi lomu tikweni”, ci hihirita ka gona a vanhu ni zvihari,+
18 a ku khwatsi hi lezvi ndzi hanyako’, ku wula Jehovha, a Hosi ya Hombe, ‘hambu loku a vavanuna lava va vanharu va wova ka gona, va wa nga ta ponisa a vafana vabye ne a vanhanyana vabye; va wa to ponisa a mihefemulo yabye ntsena.’”
19 “‘Kutani a hi zvi vekeni laha ka ku ndzo rumela ntungu tikweni lego+ ndzi tlhela ndzi chulula a khulo ga mina hehla ka gona hi kuhalatiwa ka nkhata kasi ku fuvisa ka gona a vanhu ni zvihari,
20 a ku khwatsi hi lezvi ndzi hanyako’, ku wula Jehovha, a Hosi ya Hombe, ‘hambu loku Nowa,+ na Dhaniyeli,+ na Joba,+ va wova ka gona, va wa nga ta ponisa a vafana vabye ni vanhanyana vabye; va wa to ponisa a mihefemulo* yabye ntsena hi kota ya kululama kabye.’”+
21 “Jehovha, a Hosi ya Hombe, i ngalo: ‘Zvi ta tshamisa zvezvo laha ndzi to rumela a zvitsayiso zva mina zva mune*+ — a cipadha, ni ndlala, ni zvivandza zva khwati, ni ntungu+ — hehla ka Jerusalema kasi ku fuvisa ka gona a vanhu ni zvihari.+
22 Hambulezvo, a vokari va to sala ka gona va ta pona va tlhela va humesiwa+ — a vafana zvin’we ni vanhanyana. Vata ka wena niku laha mu to wona a tindlela tabye ni mitiro yabye, hakunene mu ta chavelelwa ka khombo legi ndzi gi nehileko Jerusalema, ina, ka zvontlhe lezvi ndzi mu mahileko.’”
23 “‘Va ta mu chavelela laha mu to wona a tindlela tabye ni mitiro yabye niku mu ta zvi tiva lezvaku lezvi ndzi nga va maha a ndzi va mahangi halahala’,+ ku wula Jehovha, a Hosi ya Hombe.”
Mitlhamuselo ya lahasi
^ A gezu ga ciHebheru gi tirisilweko laha kuzvilava hi gona gin’we ni legi gi wulako a “macimba ya zvihari”. Gi tirisiwa kota gezu ga ku chepeta.
^ Hi kukongoma: “khoma a yindlu ya ka Izrayeli hi mbilu yabye”.
^ Hi kukongoma: “tshova a nhonga ya pawa”. Kuzvilava ku wuliwa a tinhonga leti va nga veketela ka tona tipawa.
^ Kutani: “kulamula ka mina ka mune ko tshisa”.
