Ezekiyeli 16:1-63
-
Lirandzo la Nungungulu hi Jerusalema (1-63)
16 A mhaka ya Jehovha yi nota kambe ka mina, yi taku:
2 “N’wana wa munhu, tivisa Jerusalema a mitiro yakwe yo nyenyeza.+
3 Wula, uku: ‘Jehovha, a Hosi ya Hombe, i ngalo ka Jerusalema: “Hi ntumbuluko wa wena ni kupswaliwa ka wena u wa tiko ga vaKhanani. A papayi wa wena i wa hi muAmori,+ ni mamani wa wena i wa hi muHiti.+
4 Xungetano hi kupswaliwa ka wena, ka siku legi u nga pswaliwa hi gona, a likavani la wena a li tsemiwangi; a wu hlambisiwangi hi mati kasi u basa, ne ku gurunyiwa hi munyu hambu ku phutselwa ka tinguwo.
5 I hava a nga ku tsetsa laha ka kuza a ku mahela a cin’we ca zvilo lezvi. I hava a nga ku zwela wusiwana. Wutshan’wini ga lezvo, u no hoxiwa khwatini hakuva u* no vengiwa ka siku legi u nga pswaliwa hi gona.
6 “‘“A cikhati leci ndzi nga hundza hi laho, ndzi no ku wona na u chakavinya* nkhateni wa wena. Makunu laha u nga etlele nkhateni wa wena, ndzi te ngalo: ‘Simama ku hanya!’ Ina, ndzi te ngalo ka wena na u etlele laho nkhateni wa wena: ‘Simama ku hanya!’
7 Ndzi no ku maha a citshungu ca hombe nguvhu, a ku fana ni tisinya ti milako lomu khwatini. U no kula, u andza u tlhela u boha a zvilo zva ku ti sasekisa hi zvona zva zvinene nguvhu. A mavele ya wena ma no tiyela, ni misisi ya wena yi kula, kanilezvi u wa ha hi cimbyiri, na u nga bohangi nchumu.”’
8 “‘A cikhati leci ndzi nga hundza ndzi ku wona, ndzi no pola lezvaku u wa hi ka tanga yo ringana ku randza ni ku randziwa. Hikwalaho, ndzi no tshambuluta a nguwo* ya mina hehla ka wena+ ndzi fenengeta a wumbyiri ga wena, ndzi hlambanya ndzi tlhela ndzi maha civhumelwano na wena’, ku wula Jehovha, a Hosi ya Hombe, ‘wena uva wa mina.
9 A ku tsika lezvo, ndzi no ku hlambisa hi mati, ndzi sula a nkhata wa wena ndzi tlhela ndzi ku tota mafura.+
10 Hi kulandzela, ndzi no ku bohisa a nguwo ya ku bhordhariwa, ndzi ku nyika a masandalia ya cikhumba ca cinene nguvhu.* Ndzi no ku phutsela ka nguwo ya wukene* ga ginene ndzi tlhela ndzi ku bohisa a tinguwo to dhura.
11 Ndzi no ku sasekisa hi zvilo zva ku ti sasekisa hi zvona, ndzi ku bohisa maniya mawokweni ya wena, ndzi tlhela ndzi ku bohisa kordhawu nhan’wini ya wena.
12 Ndzi no tlhela ndzi ku vekela phera nhovhini ya wena, ndzi ku bohisa tiphera tindleveni ta wena ni cidlodlo* co saseka hlokweni ya wena.
13 U no simama ku ti sasekisa hi ouro ni prata, u boha tinguwo ta wukene* ga ginene, ni tinguwo to dhura, ni nguwo ya ku bhordhariwa. U waga mapa ma sililweko khwatsi, ni wulombe, ni mafura. U no saseka u tlhela u hundzeleta,+ laha ka kuza u ringana kuva muzindza.’”*
14 “‘A nduma* ya wena yi no sangula ku hangalaka cikari ka matiko+ hi kota ya kusaseka ka wena, hakuva ku wa mbhelele hi kota ya wukosi ga mina legi ndzi nga gi vekile hehla ka wena’,+ ku wula Jehovha, a Hosi ya Hombe.”
15 “‘Kanilezvi u no sangula a ku tsumba kusaseka ka wena,+ u ti maha cibhayi hi kota ya nduma ya wena.+ U no maha wubhayi ni vahundzi va ndlela vontlhe kala u kolwa,+ ni kusaseka ka wena ku nova kabye.
16 U no teka a tinguwo to kari ta wena u maha hi tona a matshamu yo tlakuka ya mivala ya tixakaxaka u maha wubhayi ka wona+ — a zvilo zva ku zvi wa nga faneli ku mahiwa, ne zvi wa nga faneli ku tshuka zvi maheka.
17 U no teka kambe a zvilo zva wena zvo saseka zva ouro ni zva prata zva ku ti sasekisa hi zvona, lezvi ndzi nga ku nyikile, u ti mahela hi zvona a zvifananiso zva vavanuna u maha nazvo wubhayi.+
18 U no teka a tinguwo ta wena ta ku bhordhariwa u zvi* fenengeta u tlhela u zvi nyika a mafura ya mina ni libani la mina.+
19 A pawa leyi ndzi nga ku nyikile — yo mahiwa hi mapa ma sililweko khwatsi, ni mafura, ni wulombe, lezvi ndzi nga ku nyikile kasi uga — zvonawu u no zvi nyikela ka zvifananiso lezvo kota masema yo nuhela.+ Hi zvalezvo futsi zvi nga maheka’, ku wula Jehovha, a Hosi ya Hombe.”
20 “‘U no teka a vafana va wena ni vanhanyana va wena lava u nga ndzi pswalele+ u va nyikela ka zvifananiso kota miphahlo+ — ina a wu kolwangi hi mitiro ya wena ya wubhayi ke?
21 U no daya a vafana va mina, u va nyikela kota miphahlo hi ku va hundzisa hi lomu ndzilweni.+
22 A cikhati leci u nga maha mitiro ya wena yontlhe yo nyenyeza ni ku maha wubhayi, a wu alakanyangi a masiku ya wuswa ga wena laha u nga hi cimbyiri na u nga bohangi nchumu, na u chakavinya* nkhateni wa wena.
23 Andzhako ka ku maha kubiha loku kontlhe, khombo, khombo ka wena’,+ ku wula Jehovha, a Hosi ya Hombe.
24 ‘U ti mahele a citsungana, u ti akela a matshamu yo tlakuka ka prasa* yin’we ni yin’wani.
25 U akile a matshamu ya wena yo tlakuka ka wutshamu go woneka nguvhu ka ruwa gin’we ni gin’wani, u hundzula a kusaseka ka wena kuva nchumu wo nyenyeza hi ku ti nyikela* ka vahundzi vontlhe,+ u endzelekisa a mitiro ya wena ya wubhayi.+
26 U no maha wubhayi ni vaGibhite,+ va nga vaakelani va wena va vhurako hi ku navela masango,* u ndzi khunguvanyisa hi mitiro ya wena ya wubhayi ya tsandza-vahlayi.
27 Ndzi ta neha a canja ga mina hehla ka wena, ndzi hungula a zvakuga zva wena.+ Ndzi ta ku nyikela ka vavasati lava va ku vengako va maha kurandza hi wena,+ va nga vanhanyana va vaFilistiya, lava va nga tsemeka hlanha hi kota ya mahanyela ya wena ya tingana.+
28 “‘Lezvi u nga kala ku kolwa, u no maha wubhayi ni vaAsiriya.+ Kanilezvi, hambu andzhako ka ku maha wubhayi navo, a wu kolwangi.
29 Hikwalaho, u no endzelekisa a wubhayi ga wena kala tikweni ga Khanani ni ga vaKaldheya,+ kanilezvi hambu andzhako ka lezvo, a wu kolwangi.
30 Hi nga wona lezvi yi nga babyisa zvona a mbilu ya wena’,* ku wula Jehovha, a Hosi ya Hombe, ‘a cikhati leci u nga maha a zvilo lezvi zvontlhe, u hanyisa ku khwatsi u bhemba!*+
31 Kanilezvi a cikhati leci u nga maha a citsungana ca wena ka wutshamu go woneka ga ruwa gin’we ni gin’wani, ni ku aka a wutshamu ga wena go tlakuka ka prasa* yin’we ni yin’wani, u wa nga hanyisi ku khwatsi u cibhayi, hakuva u wa nga vhumeli ku hakhelwa.
32 U sati wa cibhayi a etlelako ni vambe vanhu a tsika nuna wakwe!+
33 A zvibhayi zvontlhe zvi amukela zvinyikiwo,+ kanilezvi wena hi wena u va nyikako zvinyikiwo vontlhe lava va vhurako hi ku ku navela.+ U va xavelela lezvaku vata hi ka matlhelo wontlhe kasi u ta maha navo wubhayi.+
34 Wena u hambene ni van’wani vavasati lava va mahako wubhayi. I hava a mahako wubhayi a ku khwatsi hi lezvi wena u mahisako zvona! Wena u hakhela van’wani, wutshan’wini ga ku vona va hakhela wena. A mahela ga wena gi hambene ni ga vanghana.’
35 “Hikwalaho, wena cibhayi,+ zwana a mhaka ya Jehovha.
36 Jehovha, a Hosi ya Hombe, i ngalo: ‘Kota lezvi u hundzeletileko hi ku navela masango ni lezvi u kombekisileko a wumbyiri ga wena a cikhati leci u nga maha wubhayi ni zvigango zva wena zvin’we ni zvifananiso zva wena zvo nyenyeza ni zva manyala,*+ lezvi u ngaza u zvi phahlela hi nkhata wa vana va wena,+
37 ndzi ta tsombanisa a zvigango zva wena zvontlhe lezvi u nga zvi tsakisa, vontlhe lava u nga va randza zvin’we ni vontlhe lava u nga va venga. Ndzi ta va tsombanisa hi matlhelweni wontlhe va ta ku vhukela, ndzi va funungulela a wumbyiri ga wena. Va ta wona gontlhe a wumbyiri ga wena.+
38 “‘Ndzi ta ku tsayisa hi tsayiselelo wu ringanako a vavasati va zvibhayi+ ni lava va halatako nkhata,+ niku a nkhata wa wena wu ta halatwa hi zanga ni ciluse.+
39 Ndzi ta ku nyikela canjeni gabye; va ta khungumula a zvitsungana zva wena va tlhela va hahlula a matshamu ya wena yo tlakuka.+ Va ta ku tlhatlhelela a tinguwo ta wena,+ va ku tekela a zvilo zva wena zva ku ti sasekisa hi zvona+ va ku siya na u hi cimbyiri, na u nga bohangi nchumu.
40 Va ta ku nehela citshungu ci ta ku vhukela,+ va ku gandla hi maribye+ va tlhela va ku daya hi zvipadha zvabye.+
41 Va ta hisa a tiyindlu ta wena hi ndzilo+ va tlhela va ku lamula mahlweni ka vavasati vo tala; ndzi ta fuvisa a wubhayi ga wena+ niku u nga ta ha va hakhela kambe.
42 Ndzi ta xurisa a khulo ga mina hehla ka wena,+ ni zanga ya mina yi ta suka ka wena.+ Ndzi ta rula ndzi nga ha khunguvanyeki kambe.’
43 “‘Kota lezvi u nga kala ku alakanya a masiku ya wuswa ga wena+ ni lezvi u nga ndzi zangarisa hi ku maha a zvilo lezvi zvontlhe, ndzi ta neha a mawuyawuya ya tindlela ta wena hehla ka hloko ya wena’, ku wula Jehovha, a Hosi ya Hombe, ‘u nga ta ha simama mahanyeleni ya wena ya tingana ni mitirweni ya wena yontlhe yo nyenyeza.
44 “‘Vontlhe lava va wulawulako hi mavingu va ta tirisa a vingu legi gaku: “A n’wana i fana ni mamani wakwe!” na va wula wena.+
45 Hakunene u nhanyana wa mamani wa wena, loyi a nga chepeta a nuna wakwe ni vana vakwe. Hakunene u makabye wa vamakabye va wena va cisati, lava va nga chepeta a vanuna vabye ni vana vabye. A mamani wa wena i wa hi muHiti, ni papayi wa wena i wa hi muAmori.’”+
46 “‘A nhondzo ya wena ya cisati hi Samariya,+ loyi a hanyako tlhelweni ga wena ga cibhabha* ni vanhanyana vakwe,*+ ni ndzisana ya wena ya cisati hi Sodhoma,+ loyi a hanyako tlhelweni ga wena ga cinene* ni vanhanyana vakwe.+
47 A wu fambangi tindleleni tabye ntsena ni ku pimanyisa a mitiro yabye yo nyenyeza, kanilezvi hi cikhati ci tsongwani, u no ti goha nguvhu a ku hundza vona mahanyeleni ya wena wontlhe.+
48 A ku khwatsi hi lezvi ndzi hanyako’, ku wula Jehovha, a Hosi ya Hombe, ‘Sodhoma, a makabye wa wena, ni vanhanyana vakwe a va mahangi lezvi wena ni vanhanyana va wena mu nga maha.
49 A cihoxo ca makabye wa wena Sodhoma cive leci: Yena ni vanhanyana vakwe+ va wa hi ni matshandza,+ na va hi ni zvakuga zvo tala nguvhu+ va tlhela va hanya na va nga karateki hi nchumu;+ hambulezvo, a va vhunangi a muxaniseki ni cisiwana.+
50 Va no simama ku ti kulisa+ ni ku maha a zvilo zvo nyenyeza kuwoneni ka mina,+ hikwalaho ndzi no zvi wona na zvi hi chukwana a ku va lovisa.+
51 “‘Phela hambu Samariya+ a nga mahangi ne khihlanya ga zviwonho zva wena. U no maha zvilo zvo tala zvo nyenyeza a ku hundza vamakabye va wena laha ka kuza a vamakabye va wena va wonekisa ku khwatsi va lulamile hi kota ya mitiro ya wena yontlhe yo nyenyeza.+
52 Makunu rwala a tingana ta wena hakuva u yimelele* a mahanyela ya vamakabye va wena. Hi kota ya ciwonho ca wena, hi lezvi u mahileko a mitiro yo nyenyeza a ku hundza leyi yabye, vona va lulamile a ku hundza wena. Makunu dhana, u rwala a tingana ta ku maha a vamakabye va wena va wonekisa ku khwatsi va lulamile.’
53 “‘Ndzi ta hlengeleta lava va khomilweko cikari kabye, a tikhumbi ta Sodhoma ni vanhanyana vakwe ni tikhumbi ta Samariya ni vanhanyana vakwe; ndzi ta hlengeleta kambe lava va khomilweko cikari ka wena zvin’we navo,+
54 kasi u rwala a tingana ta wena; u ta tsakama hi tingana hi kota ya lezvi u zvi mahileko, lezvi zvi nga va chavelela.
55 A vamakabye va wena, ku nga Sodhoma ni vanhanyana vakwe, va ta tlhela ka ciyimo cabye ca kale, na Samariya ni vanhanyana vakwe va ta tlhela ka ciyimo cabye ca kale. Wenawu ni vanhanyana va wena mu ta tlhela ka ciyimo ca n’wina ca kale.+
56 Sodhoma, a makabye wa wena, i wa nga ringani ni ku kumbukiwa hi wena masikwini ya matshandza ya wena,
57 a kubiha ka wena na ku nga se kombekiswa kubaseni.+ Makunu, a vanhanyana va Siriya ni vaakelani vabye va ku rukatela, ni vanhanyana va vaFilistiya,+ vontlhe va nga matlhelweni ya wena, va ku chepeta.
58 U ta rwala a mawuyawuya ya mahanyela ya wena ya tingana ni mitiro ya wena yo nyenyeza’, ku wula Jehovha.”
59 “Hakuva Jehovha, a Hosi ya Hombe, i ngalo: ‘Makunu ndzi ta ku tlhelisela hi kuya hi mitiro ya wena,+ hakuva u kanyisile a cihlambanyo hi ku tshova a civhumelwano ca mina.+
60 Kanilezvi mina, ndzi ta alakanya a civhumelwano leci ndzi mahileko zvin’we na wena masikwini ya wuswa ga wena, ndzi yimisa civhumelwano ca kala kupindzuka zvin’we na wena.+
61 U ta alakanya a mahanyela ya wena uwa tingana+ a cikhati leci u to amukela a vamakabye va wena, lava va tinhondzo ka wena zvin’we ni lava va tindzisana ka wena. Ndzi ta ku nyika vona vava vanhanyana va wena, kanilezvi na ku nga hi hi kota ya civhumelwano ca wena.’
62 “‘Mina ha ndzoce ndzi ta yimisa a civhumelwano ca mina zvin’we na wena; u ta zvi tiva lezvaku hi mina Jehovha.
63 A cikhati leci ndzi to ku mahela muphahlo wa ku kombela ku tsetselelwa zviwonho, hambu lezvi u mahileko a zvilo zvontlhe lezvi,+ u ta alakanya a zvilo lezvi u tsakama hi tingana u nga ha vhululi ni nomu hi kota ya tingana ta wena’,+ ku wula Jehovha, a Hosi ya Hombe.”
Mitlhamuselo ya lahasi
^ Kutani: “a muhefemulo wa wena wu”.
^ Kutani: “khavetela”.
^ Kutani: “saya”.
^ Kutani: “bhebhe ga macalo”.
^ Kutani: “linho”.
^ Kutani: “korowa”.
^ Kutani: “linho”.
^ Hi kukongoma: “vito”.
^ Ku nga zvifananiso zva cinuna.
^ Kutani: “khavetela”.
^ Hi kukongoma: “vhulula minenge ya wena”.
^ Hi kukongoma: “vaakelani va wena va nyama ya hombe”.
^ Zvi nga maha na zvi wula ku: “Hi nga wona lezvi ndzi nga ku zangarelisile zvona”.
^ Kutani: “bhejwa”.
^ A gezu ga ciHebheru gi tirisilweko laha kuzvilava hi gona gin’we ni legi gi wulako a “macimba ya zvihari”. Gi tirisiwa kota gezu ga ku chepeta.
^ Kutani: “dzonga”.
^ Zvo khwatsi ku wuliwa a zvidhoropana zva kona.
^ Kutani: “n’walungu”.
^ Kutani: “lwele”.
