Ezekiyeli 23:1-49
23 A mhaka ya Jehovha yi nota kambe ka mina, yi taku:
2 “N’wana wa munhu, ku wa hi ni vavasati vambiri va nga hi vana va mamani mun’we.+
3 Va nova zvibhayi le Gibhite;+ kusukela wusweni gabye va no maha wubhayi. Kwaleyo, a mavele yabye ma no pswhinyiwa, ni mavele yabye ya wunhwana* ma no khomakhomiwa.
4 A vito ga loyi wa nhondzo ku wa hi Ohola,* a makabye wakwe ku wa hi Oholibha.* Va nova va mina, va pswala a vafana ni vanhanyana. Xungetano hi mavito yabye, Ohola hi Samariya,+ Oholibha hi Jerusalema.
5 “Ohola i no sangula ku maha wubhayi+ na a hi wa mina. I wa vhura hi ku navela zvigango zvakwe,+ ku nga vaakelani vakwe va vaAsiriya.+
6 Va wa hi vagovhernadhori vo boha a tinguwo ta azuli, ni tihosana — vontlhe na va hi majaha yo koka mahlo ma khileleko a mahaxi yabye.
7 I no simama ku maha wubhayi ni vaAsiriya vontlhe lava a nga va hlawula, a ti nyenyezisa+ hi zvifananiso zva manyala* zva lava a nga vhura hi ku va navela.
8 A nga tsikangi a wubhayi legi a nga gi maha Gibhite, hakuva wun’wananeni gakwe va wa etlele naye; va no khomakhoma a mavele yakwe ya wunhwana* va tlhela va chulula a kunavela kabye ka ku hlengela masango hehla kakwe.+
9 Hikwalaho, ndzi no mu nyikela mandleni ya zvigango zvakwe, a vaAsiriya,+ lava a nga vhura hi ku navela ku hlengela navo masango.
10 Va no funungula a wumbyiri gakwe,+ va khoma a vafana vakwe ni vanhanyana vakwe+ va gumesa va mu daya hi cipadha. I nova ni nduma ya hava cikari ka vavasati, va mu lamula.
11 “A cikhati leci a makabye wakwe Oholibha a nga zvi wona, a kunavela kakwe ka ku hlengela masango ku no tshinga nguvhu, ni wubhayi gakwe gi no hundza legi ga makabye wakwe.+
12 I no navela a ku hlengela masango ni vaakelani vakwe, a vaAsiriya,+ a vagovhernadhori ni tihosana leti ti nga boha a tinguwo to ngangamela na ti khilele mahaxi — vontlhe na va hi majaha yo koka mahlo.
13 A cikhati leci a nga ti nyenyezisa, ndzi no wona lezvaku hi wumbiri gabye va wa hi ni hanyela gin’we.+
14 Kanilezvi i no simama ku engetela a mitiro yakwe ya wubhayi. I no wona zvifananiso zva vavanuna zvi nga kehlilwe laha khurisini, zvi nga zvifananiso zva vaKaldheya zvi kehlilweko zvi tlhela zvi pendiwa hi muvala wo pswhuka,
15 zvi bohileko a tibhandi zviwunwini zva zvona, ni titurbhanti* ta hombe tihlokweni ta zvona. Zvi wa tshamisile ku khwatsi masochwa, zvontlhe zvi wa yimela a vaBhabhuloni va pswalilweko tikweni ga vaKaldheya.
16 Laha a nga zvi wona, i no sangula ku vhura hi ku navela ku hlengela nazvo masango, a rumela zvirun’wa ka vavanuna va Kaldheya.+
17 Hikwalaho, a vaBhabhuloni va no simama kuta va ta hlengela naye masango mubhedhini wakwe, va mu nyenyezisa hi kunavela kabye ka ku hlengela masango. Andzhako ka loku va mu nyenyezisile, i* no va nyenya a va tsika.
18 “Laha a nga simama ku maha wubhayi go hundzeleta ni ku funungula a wumbyiri gakwe,+ ndzi no mu nyenya ndzi mu tsika, a ku khwatsi hi lezvi ndzi* nga nyenya a makabye wakwe ndzi mu tsika.+
19 I no simama ku engetela a mitiro yakwe ya wubhayi,+ a alakanya a masiku ya wuswa gakwe a cikhati leci a nga maha wubhayi tikweni ga Gibhite.+
20 I no vhura hi ku navela a zvigango zvakwe a ku fana ni vasati lava va vatsongwani* va vavanuna lava a zviro zvabye zva wununa zvi fanako ni leci ca mbongola ni lava a zviro zvabye zva wubeleki zvi fanako ni leci ca haxi.
21 U wa xuva a mahanyela ya tingana ya wuswa ga wena le Gibhite,+ a cikhati leci va nga khomakhoma a mavele ya wena, a mavele ya wuswa ga wena.+
22 “Hikwalaho, wena Oholibha, Jehovha, a Hosi ya Hombe, i ngalo: ‘Ndza kucetela a zvigango zva wena,+ lezvi u* nga zvi nyenya u zvi tsika; ndzi ta zvi neha hi matlhelweni wontlhe zvi ta ku vhukela,+
23 a vaBhabhuloni+ ni vontlhe a vaKaldheya,+ a vavanuna va Pekodhe,+ ni va Xowa, ni va Kowa, zvin’we ni vontlhe a vaAsiriya. Vontlhe majaha yo koka mahlo, a vagovhernadhori ni tihosana, a valwi va yimpi ni vavanuna va hlawulilweko, vontlhe va khileleko mahaxi.
24 Va ta ku dhumela hi tikareta ta yimpi ti vangako guwa, ni marodha, ni mabutho ya hombe, ni zvitlhangu zva hombe ni zva zvitsongwani,* ni makapasete. Va ta ku randzela matlhelweni wontlhe niku ndzi ta va chusa lezvaku va ku lamula; va ta ku lamula kota lezvi va to zvi lavisa zvona.+
25 Ndzi ta kombisa a khulo ga mina hehla ka wena niku va ta ku khoma hi zanga. Va ta ku tsema nhovhu ni tindleve niku lava va to sala cikari ka wena va ta dawa hi cipadha. Va ta khoma a vafana va wena ni vanhanyana va wena va famba navo, niku lava va to sala cikari ka wena va ta hisiwa hi ndzilo.+
26 Va ta ku tlhatlhelela tinguwo+ va tlhela va ku tekela a zvilo zva wena zva ku ti sasekisa hi zvona.+
27 Ndzi ta fuvisa a mahanyela ya wena ya tingana ni wubhayi ga wena,+ lezvi zvi nga sangulela tikweni ga Gibhite.+ U nga ta ha va cuwuka ne hambu ku alakanya Gibhite kambe.’
28 “Hakuva Jehovha, a Hosi ya Hombe, i ngalo: ‘Ku kiyela kutsongwani kasi ndzi ku nyikela mandleni ya lava u va vengako, lava u* nga va fularela hi ku va nyenya.+
29 Va ta ku venga va tlhela va ku tekela zvontlhe lezvi u nga zvi dzunukela+ va ku siya na u hi cimbyiri, na u te tlandlala. A wumbyiri ga tingana ga wubhayi ga wena, ni mahanyela ya wena ya tingana, ni wubhemba* ga wena zvi ta kombekiswa kubaseni.+
30 U ta mahiwa a zvilo lezvi hi kota ya lezvi u nga hlongolisela matiko u fana ni cibhayi+ ni lezvi u nga ti nyenyezisa hi zvifananiso zvabye zva manyala.+
31 U landzele a ndlela ya makabye wa wena,+ hikwalaho ndzi ta veka a kopo yakwe canjeni ga wena.’+
32 “Hikwalaho, Jehovha, a Hosi ya Hombe, i ngalo:
‘U tanwa a kopo yo eta ni yo anama ya makabye wa wena,+Uva cihlekiso ni nchumu wo poyilelwa, ku nga lezvi a kopo yi teleko hi zvona.+
33 U ta peziwa* hi kupopiwa ni kubayiseka,Hi kopo ya kuchava ni kuhahlula,A kopo ya makabye wa wena Samariya.
34 U tanwa kala u minyeta,+ u phura ni zvirengele zva yona,Andzhako ka lezvo, u ti sukuruta mavele hi kubayiseka.
“Hakuva mina ha ndzoce ndzi zvi wulile”, ku wula Jehovha, a Hosi ya Hombe.’
35 “Hikwalaho, Jehovha, a Hosi ya Hombe, i ngalo: ‘Kota lezvi u ndzi riveleko u tlhela u ndzi chokola hi kumbhelela,*+ u ta rwala a mawuyawuya ya mahanyela ya wena ya tingana ni ya mitiro ya wena ya wubhayi.’”
36 Makunu Jehovha i te ngalo ka mina: “N’wana wa munhu, xana u ta kanela a mahungu ya ku lamula Ohola na Oholibha,+ u va komamisa hi mitiro yabye ya manyala ke?
37 Va mahile wubhayi*+ niku ku na ni nkhata mandleni yabye. A va mahangi wubhayi ntsena ni zvifananiso zvabye zva manyala, kanilezvi va tlhelile va teka vana vabye lava va ndzi pswaleleko va va hundzisa hi lomu ndzilweni kota zvakuga zva zvifananiso zvabye.+
38 A ku tsika lezvo, va ndzi mahele lezvi kambe: Va nyenyezisile a wutshamu ga mina go basa ka siku lego, va tlhela va nyenyezisa a masabhadho ya mina.
39 Andzhako ka ku daya vana vabye kota miphahlo ka zvifananiso zvabye zva manyala,+ va no nghena wutshan’wini ga mina go basa va gi nyenyezisa+ ka siku galego. Hi zvalezvo va nga maha lomu ndzeni ka yindlu ya mina.
40 Va zile va rumela cirun’wa ci ya vitanisa vavanuna va le kule.+ Na va kari vata, mu no hlamba, mu penda matihlo ya n’wina mu tlhela mu ti sasekisa hi zvilo zva ku ti sasekisa hi zvona.+
41 U no tshama ka sofa ga ginene nguvhu+ na ku vekilwe meza mahlweni ka gona,+ laha u nga veka a libani la mina+ ni mafura ya mina.+
42 Hi laho, ku wa zwala a guwa ga citshungu ca vavanuna va nga khataliko hi nchumu, lava a cikari kabye ku nga hi ni zvidhakwa zvi nehilweko hi ciwuleni. Va no vekela maniya mawokweni ya vavasati ni ku va bohisa a zvidlodlo* zvo saseka tihlokweni tabye.
43 “Andzhako ka lezvo, ndzi no wula xungetano hi wasati loyi a nga hlakele hi ku maha wubhayi, ndziku: ‘Makunu i ta simama ku maha wubhayi gakwe.’
44 Hikwalaho, va no simama kuya kakwe, a ku khwatsi hi loku a munhu aya ka cibhayi. Hi zvalezvo va nga yisa zvona ka Ohola ni ka Oholibha, a vavasati va mahanyela ya tingana.
45 Kanilezvi a vanhu vo lulama va ta mu lamula hi malamulelwa ya zvibhayi+ ni ya lava va halatako nkhata;+ hakuva zvibhayi niku va na ni nkhata mandleni yabye.+
46 “Hakuva Jehovha, a Hosi ya Hombe, i ngalo: ‘Va ta vitanelwa a butho gi ta va vhukela ni ku va maha nchumu wo tshisa gi tlhela gi va phanga.+
47 A butho gi ta hoxela maribye hehla kabye+ ni ku va tsemelela hi zvipadha zvabye. Va ta daya vafana vabye ni vanhanyana vabye+ va tlhela va hisa tiyindlu tabye hi ndzilo.+
48 Ndzi ta fuvisa a mahanyela ya tingana lomu tikweni, ni vavasati vontlhe va ta gondza cokari va nga pimanyisi a mahanyela ya n’wina ya tingana.+
49 Va ta mu nehela a mawuyawuya ya mahanyela ya n’wina ya tingana ni ya zviwonho lezvi mu mahileko ni zvifananiso zva n’wina zva manyala; makunu mu ta zvi tiva lezvaku hi mina Jehovha, a Hosi ya Hombe.’”+
Mitlhamuselo ya lahasi
^ Kutani: “virgindade”.
^ Zvi wulako ku: “Tenda gakwe”.
^ Zvi wulako ku: “A tenda ga mina gi ka yena”.
^ A gezu ga ciHebheru gi tirisilweko laha kuzvilava hi gona gin’we ni legi gi wulako a “macimba ya zvihari”. Gi tirisiwa kota gezu ga ku chepeta.
^ Kutani: “virgindade”.
^ Kutani: “a muhefemulo wakwe wu”.
^ Kutani: “a muhefemulo wa mina”.
^ Kutani: “a muhefemulo wa wena wu”.
^ Kutani: “tingenge”, zvitlhangu zva zvitsongwani zvi nga tala ku tiriswa hi van’wamawura.
^ Kutani: “a muhefemulo wa wena wu”.
^ Kutani: “wubhejwa”.
^ Hi kukongoma: “U ta tala”.
^ Hi kukongoma: “cukumeta ndzhako ka wena”.
^ Ku nga wubhayi ga moya.
^ Kutani: “tikorowa”.
