Ezekiyeli 25:1-17
25 A mhaka ya Jehovha yi nota kambe ka mina, yi taku:
2 “N’wana wa munhu, hundzuluka u cuwuka a vaAmoni,+ u va phrofetela.+
3 Byela a vaAmoni, uku: ‘Zwanani a mhaka ya Jehovha, a Hosi ya Hombe. Jehovha, a Hosi ya Hombe, i ngalo: “Kota lezvi mu ngaku: ‘Aha!’ ka wutshamu ga mina go basa a cikhati leci gi nga nyenyeziswa, ni ka tiko ga Izrayeli a cikhati leci gi nga hahlulwa, ni ka yindlu ya ka Judha a cikhati leci va ngaya wukhumbini,
4 ndza mu nyikela ka vanhu va le mutsuwuka-gambo kota tshomba. Va ta zima wugovelo gabye* cikari ka wena va tlhela va gwimba matenda yabye cikari ka wena. Va taga a mihandzu ya wena va tlhela vanwa a masi ya wena.
5 Rabha+ ndzi ta mu maha wuriselo ga makameli, ni tiko ga vaAmoni ndzi gi maha wutshamu ga ku zumba a mitlhambi; mu ta zvi tiva lezvaku hi mina Jehovha.”’”
6 “Hakuva Jehovha, a Hosi ya Hombe, i ngalo: ‘Kota lezvi u nga phakatela mandla,+ u ginga lahasi hi mikondzo u tlhela u* giya hi kota ya hlomulo wa tiko ga ka Izrayeli hi kuchepeta ka hombe,+
7 ndzi ta nawuluta a canja ga mina hehla ka wena ndzi ku nyikela ka matiko kasi ma ku phanga. Ndzi ta ku tsema cikari ka mifumo ndzi tlhela ndzi ku lovisa cikari ka matiko.+ Ndzi ta ku hihirita, niku u ta zvi tiva lezvaku hi mina Jehovha.’
8 “Jehovha, a Hosi ya Hombe, i ngalo: ‘Kota lezvi Mowabhi+ na Seyire+ va ngaku: “Hi nga wonani! A yindlu ya ka Judha yi fana ni wontlhe a matiko lawa man’wani”,
9 ndzi ta vhulula a reve ga Mowabhi hi laha ku nga ni madhoropa ya mbhingano wakwe, ma nga wona wumbhuri ga tiko gakwe, Bhet-Jeximote, na Bhaali-Meyoni, kala Kiriyatayime.+
10 Ndzi ta gi nyikela zvin’we ni vaAmoni kota tshomba ka vanhu va le mutsuwuka-gambo,+ kasi a vaAmoni va nga ha alakanyiwi cikari ka matiko.+
11 Ndzi ta lamula Mowabhi,+ niku va ta zvi tiva lezvaku hi mina Jehovha.’
12 “Jehovha, a Hosi ya Hombe, i ngalo: ‘Edhomi i ti photele ka yindlu ya ka Judha, ava ni nandzu wa hombe hi ku ti photela hehla kabye.+
13 Hikwalaho, Jehovha, a Hosi ya Hombe, i ngalo: “Minawu ndzi ta nawuluta a canja ga mina hehla ka Edhomi ndzi lovisa a vanhu ni zvifuyo, ndzi gi maha rumbi.+ Kusukela Temane kala Dhedhani, va ta dawa hi cipadha.+
14 ‘Ndzi ta ti photela ka Edhomi hi canja ga vanhu va mina va ka Izrayeli.+ Va ta neha a zanga ya mina ni khulo ga mina hehla ka Edhomi, kasi Edhomi azwa a kuphota ka mina’,+ ku wula Jehovha, a Hosi ya Hombe.”’
15 “Jehovha, a Hosi ya Hombe, i ngalo: ‘Hi kota ya wulala gabye go tshisa, a vaFilistiya va zamile ku ti photela ni ku lovisa hi ndlela ya xapi.+
16 Hikwalaho, Jehovha, a Hosi ya Hombe, i ngalo: “Ndza nawuluta a canja ga mina hehla ka vaFilistiya+ niku ndzi ta fuvisa a vaKereti+ ndzi tlhela ndzi lovisa a misalela leyi yi hanyako mbhirini ya bimbi.+
17 Ndzi ta neha hehla kabye a kuphota ko tshisa ni ku va tsayisa hi zanga. Va ta zvi tiva lezvaku hi mina Jehovha a cikhati leci ndzi to ti photela hehla kabye.”’”
Mitlhamuselo ya lahasi
^ Kutani: “wugovelo gabye gi bhiyelweko”.
^ Kutani: “a muhefemulo wa wena wu”.
