Ezekiyeli 27:1-36
-
Lisimu la ku rilela a citimela ca Tire ci mbombomelako (1-36)
27 A mhaka ya Jehovha yi nota kambe ka mina, yi taku:
2 “Wena n’wana wa munhu, yimbelela a lisimu la cirilo xungetano hi Tire,+
3 uku ka Tire:‘Wena loyi u hanyako tinyangweni ta bimbi,U nga tsindza ga vaxavi va matiko ya zvihlale* zvo tala,Jehovha, a Hosi ya Hombe, i ngalo:
“Wena Tire, u ti byela hi wece, uku: ‘Ndzi sasekile ndzi mbhelela.’+
4 A zvipandze zva tiko ga wena zvi mbilwini ya bimbi,Ni vaaki va wena va mbhelelisile a kusaseka ka wena.
5 Va mahile a mapulango ya wena wontlhe hi mijunipero ya le Senira,+Va tlhela va ku mahela a mulingwati hi sedhare wa Lebhanoni.
6 Va no maha a makasiya ya wena hi mitule ya Bhaxani,Ni nhovhu* ya wena yi wa hi ya kipresi yi nameketelweko a matino ya tindlovhu ya le zvihlaleni* zva Kitime.+
7 A nguwo ya wukene* ya mivalavala ya le Gibhite yi wa hi tanga ga wena,Ni matenda ya dhambula* ga wena ma wa hi ya tihindza ta azuli ni woya go pswhuka, zva le zvihlaleni* zva le Elixa.+
8 A vaaki va Sidhoni ni va Arvhadhe+ va wa hi vabondzi va wena va makasiya.
A vavanuna va wena vo tlhariha, wena Tire, va wa hi vona vamarinyero va wena.+
9 A vavanuna va kulileko ni vavanuna vo tlhariha va Gebhali+ va wa hi valemi va tifa ta wena.+
A zvitimela* zvontlhe zva bimbi ni vamarinyero va zvona va wata ka wena va ta maha wukwevu.
10 A vavanuna va Persia, ni va Ludhime, ni va Puti+ va wa hi ka butho ga wena, va wa hi valwi wa wena va yimpi.
Va wa hayeka a zvitlhangu zvabye ni makapasete hehla ka wena, va ku nehela wudzundzo.
11 A vavanuna va Arvhadhe va nga hi ka butho ga wena va wa yimisilwe matlhelweni wontlhe ya mimuro ya wena,Ni vavanuna va tinhenha va wa wonelela a tikhokhola* ta wena.
Va wa hayeka a zvitlhangu zva redhonda matlhelweni wontlhe ya mimuro ya wenaVa mbhelelisa a kusaseka ka wena.
12 “‘“Tarxixi+ i wa maha bhindzu na wena hi kota ya kutala ka titshomba ta wena.+ Va wa cicisa a prata, ni simbi, ni estanyo, ni muthovhu hi zvilo zva wena.+
13 Javhani, na Tubhale,+ na Mexeke+ va wa maha wukwevu na wena, va cicisa tikhumbi+ ni zvibya zva kobre hi zvilo zva wena lezvi u nga xavisa.
14 A va yindlu ya ka Togarma+ va wa cicisa a mahaxi ya kurwala, ni mahaxi ya yimpi ni mamula hi zvilo zva wena.
15 A vanhu va Dhedhani+ va wa maha wukwevu na wena; u wa tholile vaxavisi ka zvihlale* zvo tala; va wa ku nyika a matino ya tindlovhu+ ni ebhano kota ndzuvo* wa wena.
16 Edhomi i wa maha bhindzu na wena hi kota ya kutala ka zvilo zva wena. Va wa ku nyika a turkeza, ni woya go pswhukisa kuzvirila, ni tinguwo ta ku bhordhariwa ta mivalavala, ni tinguwo ta tinene, ni makorali, ni maribye ya lisima yo pswhuka* na va cicisa hi zvilo zva wena.
17 “‘“Judha ni tiko ga Izrayeli va wa maha wukwevu na wena, va ku nyika a trigo ya Minite,+ ni zvakuga zva zvinene nguvhu, ni wulombe,+ ni mafura, ni bhalsamu+ na va cicisa hi zvilo zva wena.+
18 “‘“Dhamasku+ i wa maha bhindzu na wena hi kota ya kutala ka zvilo zva wena ni titshomba ta wena tontlhe, na a cicisa hi vhinyo ya Helbhoni ni woya ga Zahara.*
19 Vhedhani na Javhani va le Uzale va wa ku nyika a simbi yo bethiwa, ni kasiya,* ni lihlanga lo nuhela, va cicisa hi zvilo zva wena.
20 Dhedhani+ i wa xaviselana na wena a tinguwo ta ku gabhatsela hi tona mahaxi.
21 U wa thola a vaArabhiya ni tihosana tontlhe ta Kedhare,+ va nga hi vaxavisi va tiyivhana, ni tiyivhu ta vamatsune ni timhongo.+
22 A vaxavisi va le Xebha ni va le Raama+ va wa maha wukwevu na wena; va wa ku nyika a tixaka tontlhe ta tiperfume leti to nuhela khwatsi, ni maribye ya lisima, ni ouro, va cicisa hi zvilo zva wena.+
23 Harani,+ na Kane, na Edheni,+ ni vaxavisi va le Xebha,+ na Asure,+ na Kilmadhe va wa maha wukwevu na wena.
24 Laha merkadho ya wena va wa xavisa a tinguwo to saseka, ni majasi yo mahiwa hi nguwo ya azuli ma bhordhariwa mivalavala, ni matapeti ya mivala ya tixakaxaka, zvontlhe na zvi bohelelwe hi tingoti zvi tiya.
25 A zvitimela* zva Tarxixi+ hi zvona zvi nga rwala a zvilo zva wena,Laha ka kuza u tala u ku khapa u tlhela u bindziwa* mbilwini ya bimbi gi etileko.
26 A vabondzi va wena va makasiya va ku yisile mabimbini yo leva;A moya wa cikobani* wu ku pandzelele mbilwini ya bimbi gi etileko.
27 A titshomba ta wena, ni zvilo zva wena, ni bhindzu ga wena, ni vatiri va wena va lomu zvitimeleni, ni vamarinyero va wena,A valemi va wena va tifa, lava va fambisako a bhindzu ga wena,+ ni vontlhe a valwi va yimpi+— Contlhe a citshungu* ci nga ka wena —Vontlhe va ta mbombomela mbilwini ya bimbi gi etileko sikwini ga kuwa ka wena.+
28 A cikhati leci a vamarinyero va wena va toba huwa, a matiko ma nga mbhirini ya bimbi ma ta rurumela.
29 Vontlhe a vabondzi va makasiya, ni vatiri va lomu zvitimeleni, ni vamarinyeroVa ta chika hi lomu zvitimeleni zvabye va yima misaveni.
30 Va ta tlakusa magezu yabye va kanyuluka hi kubayiseka hi kota ya wena+Na va ti paletela ntshuri tihlokweni tabye ni ku puluwundza khumeni.
31 Va ta ti halula tihloko, va boha tisakwa;Va ta ku rilela hi hlomulo,* vaba tihuwa ta hombe.
32 Kurileni kabye, va ta yimbelela a lisimu la cirilo xungetano hi wena, vaku:
‘Himani a fanako na Tire, loyi makunu a miyeleko cikari ka bimbi?+
33 A cikhati leci a zvilo zva wena zvi ngata hi bimbi gi etileko, u wa xurisa a matiko yo tala.+
A titshomba ta wena to tala ni bhindzu ga wena zvi ganyisile a tihosi ta misava.+
34 Zvezvi u pandzelelwe bimbini gi etileko, matini yo eta,+Ni bhindzu ga wena gontlhe ni vanhu va wena va mbombomele zvin’we na wena.+
35 A vahanyi vontlhe va zvihlale* va ta ku cuwuka va hlamala,+Ni tihosi tabye ti ta rurumela hi kuchava+ — a tinghohe tabye ti ta karateka.
36 A vaxavisi va matiko va taba noti hi kota ya lezvi zvi nga ku mahekela.
A magumo ya wena ma tava ya citshuketi ni yo tshisa,Niku u nga ta hava kona kala kupindzuka.’”’”+
Mitlhamuselo ya lahasi
^ Kutani: “ilhas; zvilundzo zva mati”.
^ Kutani: “phorowa; proa”.
^ Kutani: “ilhas; zvilundzweni zva mati”.
^ Kutani: “linho”.
^ Kutani: “convés”.
^ Kutani: “ilhas; zvilundzweni zva mati”.
^ Kutani: “mapaketi; tinavhiyo”.
^ Kutani: “torres”.
^ Kutani: “ilhas; zvilundzweni zva mati”.
^ Kutani: “tributo”, wona laha kaku: “ndzuvo” ka Tlhamuselo wa magezu ya Bhibhiliya.
^ Kutani: “rubis”.
^ Kutani: “woya go pswhukisa wukhuma”.
^ I sinya ya lixaka lin’we ni kanela.
^ Zvi nga maha na zvi wula ku: “u tlhela u ngangamela”.
^ Kutani: “mapaketi; tinavhiyo”.
^ Kutani: “moya wa mutsuwuka-gambo”.
^ Hi kukongoma: “bandla”.
^ Kutani: “hi kubayiseka ka muhefemulo”.
^ Kutani: “ilhas; zvilundzo zva mati”.
