Ezekiyeli 28:1-26
28 A mhaka ya Jehovha yi nota kambe ka mina, yi taku:
2 N’wana wa munhu, byela a murangeli wa Tire, uku: ‘Jehovha, a Hosi ya Hombe, i ngalo:
“Lezvi a mbilu ya wena yi vileko ni matshandza,+ u simama uku: ‘Ndzi nungungulu.
Ndzi tshamile citshan’wini ca wuhosi ca nungungulu, mbilwini ya bimbi.’+
Kuveni wova munhu ntsena, a wu nungungulu,Hambu lezvi lomu mbilwini ya wena u alakanyako ku u nungungulu.
3 U tlharihile ku hundza Dhaniyeli.+
A ku na cihundla ci ku fihlalelako.
4 U ganyile hi kota ya wutlhari ga wena ni kupimisisa ka wenaNiku wa ha simama ku hlengeletela a ouro ni prata lomu matshaleni ya wena yo veketela kona titshomba.+
5 A wutlhari ga wena laha ka ku maha mabhindzu gi ku mahile u ganya nguvhu,+Ni mbilu ya wena yi ti kulisile hi kota ya titshomba ta wena.”’
6 “‘Hikwalaho, Jehovha, a Hosi ya Hombe, i ngalo:
“Kota lezvi lomu mbilwini ya wena u alakanyako ku u nungungulu,
7 Ndzi ta ku nehela a vamatiko va ta ku vhukela, a tiko ga xapi a ku hundza wontlhe;+Va ta hlomula zvipadha zvabye va gohetela a kusaseka ka wutlhari ga wena,Va nyenyezisa a wudzundzo ga wena go ngangamela.+
8 Va ta ku releta nkeleni,*U tafa a fela ga xapi mbilwini ya bimbi gi etileko.+
9 Xana wa ha ta simama, uku: ‘Ndzi nungungulu’ ka loyi a ku dayako ke?
U tava munhu wa nyalidede na ku nga hi nungungulu mandleni ya lava va ku nyenyezisako.”’
10 ‘Mandleni ya vamatiko, u tafa a fela ga lava vo kala va nga mahiwangi wukwera,*Hakuva hi mina ha ndzoce ndzi nga wula’, ku wula Jehovha, a Hosi ya Hombe.”
11 A mhaka ya Jehovha yi nota kambe ka mina, yi taku:
12 “N’wana wa munhu, yimbelela a lisimu la cirilo xungetano hi hosi ya Tire, u mu byela, uku: ‘Jehovha, a Hosi ya Hombe, i ngalo:
“U wa hi wena cikombiso ca kumbhelela,Na u tele hi wutlhari+ ni ku saseka u mbhelela.+
13 U wa hi Edheni, a jardhim ya Nungungulu.
U wa sasekiselwa hi maribye ya lisima ya tixaka tontlhe:Rubhi, ni topazi, ni jasperi; krizolite, ni onikisi, ni jadhe; safira, ni turkeza,+ ni esmeraldha;A zvimanyiso zva wona ni zvo ma tiyisa zvi wa hi zva ouro.Zvi longiselwe ka siku legi u nga vangiwa hi gona.
14 Ndzi ku yimisile kota kerubhima gi totilweko ga kuvhikela.
U wa hi citsungeni ci basileko ca Nungungulu,+ niku u wa fambafamba cikari ka maribye ya ndzilo.
15 U wa nga hi na cihoxo tindleleni ta wena kusukela ka siku legi u nga vangiwa hi gonaKala laha ku nga kumiwa a kungalulami cikari ka wena.+
16 Hi kota ya mabhindzu ya wena yo tala,+U no tala hi tihanyi, u sangula ku wonha.+
Hikwalaho, ndzi ta ku hlongola citsungeni ca Nungungulu kota munhu a nyenyezileko, ndzi ku lovisa,+Wena kerubhima ga kuvhikela, cikari ka maribye ya ndzilo.
17 A mbilu ya wena yi nova ni matshandza hi kota ya kusaseka ka wena.+
U gohetele a wutlhari ga wena hi kota ya wudzundzo ga wena go ngangamela.+
Ndzi ta ku hoxa lahasi.+
Ndzi ta ku maha cipetakulo mahlweni ka tihosi.
18 U nyenyezisile a matshamu ya wena yo basa hi nandzu wa wena wa hombe ni wukwevu ga wena go kanganyisa.
Ndzi ta lumekela ndzilo cikari ka wena wu ku hisa.+
Ndzi ta ku maha khuma laha misaveni mahlweni ka vontlhe va ku wonako.
19 Vontlhe lava va nga ku tiva cikari ka matiko va ta ku cuwuka va hlamala.+
A kugumesa ka wena ku tava ka citshuketi ni ko tshisa,U nga ta hava kona kala kupindzuka.”’”+
20 A mhaka ya Jehovha yi nota kambe ka mina, yi taku:
21 “N’wana wa munhu, hundzuluka u cuwuka Sidhoni,+ u mu phrofetela.
22 Wula uku: ‘Jehovha, a Hosi ya Hombe, i ngalo:
“Ndza ku vhukela wena Sidhoni niku ndzi ta dhumiswa cikari ka wena;A vanhu va ta zvi tiva lezvaku hi mina Jehovha laha ndzi to mu lamula ndzi tlhela ndzi basiswa cikari kakwe.
23 Ndzi ta mu rumelela ntungu; ni nkhata wu ta khulunga maruweni yakwe.
Lava va delweko va ta mbambamela cikari kakwe laha a cipadha ci to mu dhumela hi matlhelo wontlhe;Va ta zvi tiva lezvaku hi mina Jehovha.+
24 “‘“A yindlu ya ka Izrayeli yi nga ta ha randzelwa hi zvigetlwani zvi kwarambutako ne mimizwa yo bayisa,+ ku nga lava va va chepetako; a vanhu va ta zvi tiva lezvaku hi mina Jehovha, a Hosi ya Hombe.”’
25 “‘Jehovha, a Hosi ya Hombe, i ngalo: “Laha ndzi to hlengeleta a va yindlu ya ka Izrayeli cikari ka mifumo leyi va hangalasilweko ka yona,+ ndzi ta basiswa cikari kabye mahlweni ka matiko.+ Va ta hanya tikweni gabye+ legi ndzi nyikileko a nandza ga mina Jakobe.+
26 Va ta hanya ka gona kuruleni+ va aka tiyindlu va tlhela va byala zvivhina.*+ Ina, va ta hanya kuruleni laha ndzi to lamula vontlhe va nga matlhelweni yabye lava va va chepetako;+ va ta zvi tiva lezvaku hi mina Jehovha, a Nungungulu wabye.”’”
Mitlhamuselo ya lahasi
^ Kutani: “cilahleni”.
^ Kutani: “tlulisiwangi ngoma”.
^ A zvivhina masimu ya tisinya leti ti pswalako mauvha.
