Ezekiyeli 29:1-21
29 Hi lembe ga wu 10, ka hweti ya wu 10, hi siku ga wu 12 ga hweti, a mhaka ya Jehovha yi nota ka mina, yi taku:
2 “N’wana wa munhu, hundzuluka u cuwuka Faro, a hosi ya Gibhite, u mu phrofetela, yena ni tiko gontlhe ga Gibhite.+
3 Wula magezu lawa: ‘Jehovha, a Hosi ya Hombe, i ngalo:
“Ndza ku vhukela, wena Faro, a hosi ya Gibhite,+A cingondzomu ca hombe ca lomu bimbini ci etleleko cikari ka minonga ya Nilo* wa cona,+Leci ci nge ngalo: ‘A Congo wa mina wa Nilo wu lumba mina.
Ndzi wu mahele mina.’+
4 Kanilezvi ndzi ta tlhomeka tihuka tihlayeni ta wena ndzi maha lezvaku a tinjhanjhi ta Nilo wa wena ti namarela ka magwaru ya wena.
Ndzi ta ku humesa lomu Nilo wa wena zvin’we ni tinjhanjhi tontlhe ta Nilo ti namareleko ka magwaru ya wena.
5 Ndzi ta ku tsika lomu ciwuleni, wena ni tinjhanjhi tontlhe ta Nilo wa wena.
U tawa laha libalangeni, niku u nga ta hlengeletiwa ne ku rolelwa.+
Ndzi ta ku nyikela u giwa hi zvihari zva khwati zva laha misaveni ni zvinyanyani zva tilo.+
6 A vaaki vontlhe va Gibhite va ta zvi tiva lezvaku hi mina Jehovha,Hakuva kota ciseketelo, va wa fana ni lihlanga lo woma ka yindlu ya ka Izrayeli.+
7 A cikhati leci va nga khoma a canja ga wena, u no tshoveka,U maha a katla gabye gi hapuka.
A cikhati leci va nga tiya hi wena, u no pfotloka,U maha ku a minenge* yabye yi dhedhereka.”+
8 “‘Hikwalaho, Jehovha, a Hosi ya Hombe, i ngalo: “Ndza neha cipadha hehla ka wena;+ ndzi ta lovisa a vanhu ni zvihari cikari ka wena.
9 A tiko ga Gibhite gi tava ciwula ni wutshamu gi hahlulilweko;+ va ta zvi tiva lezvaku hi mina Jehovha, hakuva u* te ngalo: ‘A Congo wa Nilo wa mina; hi mina ndzi nga wu maha.’+
10 Hikwalaho, ndza ku vhukela wena ni Nilo wa wena, ndzi ta maha lezvaku a tiko ga Gibhite gi hahlulwa gi tlhela gi woma ni kuva ciwula ci hahlulilweko,+ kusukela Migdhole+ kala Sevhene,+ kala mbhinganweni wa Etiopia.
11 Ku nga ta tsemakanya munhu ne cihari hi lomo hi mikondzo,+ ne gi nga ta tshama munhu hi 40 wa malembe.
12 Ndzi ta maha a tiko ga Gibhite giva rumbi a ku pala wontlhe matiko, niku a madhoropa ya gona ma tava marumbi a ku pala madhoropa wontlhe hi 40 wa malembe;+ ndzi ta hangalasa a vaGibhite cikari ka mifumo ndzi tlhela ndzi va xwanya cikari ka matiko.”+
13 “‘Hakuva Jehovha, a Hosi ya Hombe, i ngalo: “Andzhako ka 40 wa malembe, ndzi ta hlengeleta a vaGibhite hi ka mifumo leyi va hangalasilweko ka yona;+
14 ndzi ta wuyisa lava va khomilweko cikari ka vaGibhite tikweni ga Patrosi,+ tikweni gabye ga mabeleko, niku seyo va tava mufumo wa nyalidede.
15 Gibhite i tava mutsongwani ka yin’wani mifumo niku a nga ta ha fumela man’wani matiko.+ Ndzi ta va maha vatsongwani nguvhu laha ka kuza va nga ha zvi koti a ku khozisa man’wani matiko.+
16 A yindlu ya ka Izrayeli+ yi nga ta ha tshuka yi tsumba kambe Gibhite, kanilezvi i to va alakanyisa ntsena a cigoho cabye ca ku tsutsumela ka vaGibhite va ya kombela civhuno. Makunu va ta zvi tiva lezvaku hi mina Jehovha, a Hosi ya Hombe.”’”
17 Hi lembe ga wu 27, ka hweti yo sangula, hi siku go sangula ga hweti, a mhaka ya Jehovha yi nota ka mina, yi taku:
18 “N’wana wa munhu, Nebhukadnezare,*+ a hosi ya Bhabhuloni, i korokisile a butho gakwe tsimeni ga ku dhumela Tire.+ A tihloko tontlhe ti no mbhela misisi, ni makatla wontlhe ma pswhomukela. Kanilezvi yena ni butho gakwe a va kumangi muholo hi tsima va gi mahileko le Tire.
19 “Hikwalaho, Jehovha, a Hosi ya Hombe, i ngalo: ‘Ndza nyikela a tiko ga Gibhite ka Nebhukadnezare,* a hosi ya Bhabhuloni.+ I ta teka a titshomba ta gona a tlhela a teka muphango wa hombe ka gona; zvi tava muholo wa butho gakwe.’
20 “‘Kota hakhelo ya tsima gakwe ga ku dhumela Tire, ndzi ta mu nyika a tiko ga Gibhite hakuva va ndzi tirele’,+ ku wula Jehovha, a Hosi ya Hombe.
21 “Ka siku lego, ndzi ta milisa limhondzo* ka yindlu ya ka Izrayeli+ ndzi tlhela ndzi ku nyika cikhati ca ku wulawula cikari kabye; va ta zvi tiva lezvaku hi mina Jehovha.”
Mitlhamuselo ya lahasi
^ Ka vhesi legi ni ka lawa ma landzelako, a gezu “Nilo” gi wula congo ni minonga leyi yi phakako ka wona.
^ Hi kukongoma: “tinyonga”.
^ Hi kukongoma: “i”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “ndzi ta nyika ntamu”.
