Ezekiyeli 3:1-27
3 Makunu i no ndzi byela, aku: “N’wana wa munhu, gana leci ci nga mahlweni ka wena.* Gana a bhuku legi go songiwa, u famba u ya wulawula ka yindlu ya ka Izrayeli.”+
2 Hikwalaho, ndzi no vhulula a nomu wa mina a ndzi gisa a bhuku go songiwa.
3 I no engeta, aku ka mina: “N’wana wa munhu, gana a bhuku legi go songiwa ndzi ku nyikako, u tata a khwiri ga wena hi gona.” Hikwalaho, ndzi no sangula ku giga; gi wa tsombela a ku khwatsi wulombe non’wini wa mina.+
4 I te ngalo ka mina: “N’wana wa munhu, famba u ya nghena cikari ka yindlu ya ka Izrayeli u va byela timhaka ta mina.
5 Hakuva a wu rumiwi a kuya ka vanhu va wulawulako lirimi li nga zwisisekiko kutani lirimi li nga tiviwiko, kanilezvi u rumelwa ka yindlu ya ka Izrayeli.
6 A wu rumelwi ka matiko yo tala ma wulawulako lirimi li nga zwisisekiko kutani lirimi li nga tiviwiko, lawa ya ku a magezu yabye a wu nge ma zwisisi. Loku ndzi wo ku rumela kabye, va wa ta ku ingisela.+
7 Kanilezvi a yindlu ya ka Izrayeli yi ta ala a ku ku ingisela, hakuva a va zvi lavi a ku ndzi ingisela.+ Vontlhe a va yindlu ya ka Izrayeli vanhu va tihloko to nonoha ni timbilu to nonoha.+
8 Ndzi nonohisile a nghohe ya wena yi ku khwatsi tinghohe tabye ni cikandza* ca wena ci nonoha a ku khwatsi zvikandza zvabye.+
9 Ndzi nonohisile a cikandza ca wena ci ku khwatsi i dhayimani, ci nonoha a ku hundza ni ribye go tiya.+ U nga va chavi kutani ku rurumeliswa hi tinghohe tabye,+ hakuva vona i yindlu yo hluwuka.”
10 I no engeta, aku ka mina: “N’wana wa munhu, amukela mbilwini ya wena u tlhela u ingisela a timhaka tontlhe leti ndzi ku byelako.
11 Famba cikari ka va ka n’wina*+ lava va nga wukhumbini u ya wulawula navo. Va byele, uku: ‘Lezvi hi lezvi Jehovha, a Hosi ya Hombe, a wulako’, kani va ingisela kutani a va ingiseli.”+
12 Hi kulandzela, ndzi no tekiwa hi moya+ makunu ndzizwa a gezu go dzindza hi le ndzhako ka mina, giku: “Ku wa dhumiswe a kungangamela ka Jehovha hi wutshan’wini gakwe.”
13 Ndzi nozwa kambe a guwa ga tipapa ta zvivangwa zvi hanyako ti nga kari ti henyana,+ ni guwa ga marodha ma nga hi matlhelweni ya zvona,+ ni kudzindza ka hombe.
14 A moya wu no ndzi tlakula wu ndzi susa ka wutshamu lego. Ndzi no famba na ndzi tsuvile ni ku swireka moyeni wa mina, ni canja ga Jehovha gi nova ni ntamu hehla ka mina.
15 Hikwalaho, ndzi noya ka lava va nga hi wukhumbini le Tel-Abhib, lava va nga hanya mbhirini ya congo wa Kebhare,+ ndzi ya tshama laho va nga hanya kona; ndzi no tshama cikari kabye a 7 wa masiku na ndzi no kaye.+
16 Kumbheleni ka 7 wa masiku, a mhaka ya Jehovha yi nota ka mina, yi taku:
17 “N’wana wa munhu, ndzi ku yimisile kota murindzeli ka yindlu ya ka Izrayeli.+ A cikhati leci u tozwa a mhaka na yi huma non’wini wa mina, va nyike a citlharihiso ca mina.+
18 Loku ndzi byela wakubiha, ndziku: ‘Hakunene u tafa’, kanilezvi wena u nga mu tlharihisi, u tlhela u tsika ku wulawula kasi ku tlharihisa a wakubiha lezvaku a hundzuluka ndleleni yakwe ya kubiha kasi a simama ku hanya,+ i tafa hi kota ya cigoho cakwe hakuva i bihile,+ kanilezvi a nkhata wakwe ndzi ta wu londza ka wena.*+
19 Kanilezvi loku u tlharihisa a wakubiha yena a nga hundzuluki kubiheni kakwe ni ndleleni yakwe ya kubiha, i tafa hi kota ya cigoho cakwe, kanilezvi wena hakunene u ta ponisa a wutomi* ga wena.+
20 Kanilezvi loku a wakululama a tsika a kululama kakwe a maha zvahava,* ndzi ta veka cikhunguvanyiso mahlweni kakwe niku i tafa.+ Loku u nga mu tlharihisi, i tafa hi kota ya ciwonho cakwe niku a mitiro yakwe ya kululama yi nga ta ha alakanyiwa, kanilezvi a nkhata wakwe ndzi ta wu londza ka wena.*+
21 Kanilezvi loku u tlharihisa a wakululama lezvaku a nga wonhi, yena a nga wonhi, hakunene i ta simama ku hanya hakuva i tlharihisilwe,+ wenawu u tava u ponisile a wutomi* ga wena.”
22 A canja ga Jehovha gi nota hehla ka mina na ndzi hi seyo, aku ka mina: “Suka uya nkoveni, ndzi ta wulawula na wena na u hi seyo.”
23 Hikwalaho, ndzi no suka ndziya nkoveni. Ndzi no wona a kungangamela ka Jehovha laho,+ ko fana ni kungangamela loku ndzi nga ku wona na ndzi hi mbhirini ya congo wa Kebhare,+ ndzi sewa hi nghohe.
24 Hi kulandzela, a moya wu no nghena ndzeni ka mina wu ndzi yimisa hi mikondzo ya mina,+ yena a wulawula na mina, aku:
“Famba u ya ti vhalela ndlwini ya wena.
25 Makunu, wena n’wana wa munhu, va ta ku tlhateka tingoti va ku boha hi tona kasi u nga zvi koti a ku ya nghena cikari kabye.
26 Ndzi ta namarelisa a lirimi la wena le hehla ka nomu wa wena, u maha mbeveve, u nga zvi koti ku va kawuka, hakuva vona i yindlu yo hluwuka.
27 Kanilezvi a cikhati leci ndzi to wulawula na wena, ndzi ta vhulula a nomu wa wena u va byela, uku:+ ‘Lezvi hi lezvi Jehovha, a Hosi ya Hombe, a wulako.’ Loyi a ingiselako i wa ingisele,+ ni loyi a alako ku ingisela i wa ale, hakuva vona i yindlu yo hluwuka.+
Mitlhamuselo ya lahasi
^ Hi kukongoma: “gana leci u ci kumako”.
^ Kutani: “cimombo”.
^ Hi kukongoma: “ka vana va vanhu va wena”.
^ Kutani: “kanilezvi u ta ti hlamulela ka mina hi kota ya nkhata wakwe”.
^ Kutani: “muhefemulo”.
^ Kutani: “a maha zvingalulamangiko”.
^ Kutani: “u ta ti hlamulela ka mina hi kota ya nkhata wakwe”.
^ Kutani: “muhefemulo”.
