Ezekiyeli 34:1-31
34 A mhaka ya Jehovha yi nota kambe ka mina, yi taku:
2 “N’wana wa munhu, phrofetela a varisi va ka Izrayeli. Phrofeta, u byela varisi, uku: ‘Jehovha, a Hosi ya Hombe, i ngalo: “Khombo ka varisi va ka Izrayeli,+ lava va ti gisako wutsumbu gabye! Xana a varisi va wa nga faneli ku gisa ntlhambi ke?+
3 Muga mafura, mu boha tinguwo ta woya, mu daya a cifuyo leci co kuluka a ku hundza zvontlhe,+ kanilezvi a mu gisi a ntlhambi.+
4 A mu tiyisetangi leti to rereka, a mu hanyisangi leti ti nga babya, a mu bhandichangi leti ti nga bayisilwe, a mu wuyisangi leti ti nga hambukile, ne a mu lavetelangi leti ti nga lahlekile;+ wutshan’wini ga lezvo, mu no ti fumela hi xapi ni tihanyi.+
5 Hikwalaho, ti no hangalaka hakuva ku wa nga hi na murisi;+ ti no hangalaka tiva zvakuga zva zvihari zvontlhe zva khwati.
6 A tiyivhu ta mina ti lahlekile lomu zvitsungeni zvontlhe ni lomu ka zvitsungana zvontlhe zvo tlakuka; a tiyivhu ta mina ti hangalakile misaveni yontlhe, na ku nga hi na munhu wa ku ya ti lavetela ne ku ti landzelela.
7 “‘“Hikwalaho, n’wina varisi, zwanani a mhaka ya Jehovha:
8 ‘“A ku khwatsi hi lezvi ndzi hanyako”, ku wula Jehovha, a Hosi ya Hombe, “kota lezvi a tiyivhu ta mina ti mahileko zvakuga, ti giwa hi zvihari zvontlhe zva khwati, hakuva ku wa nga hi na murisi, ni lezvi a varisi va mina va nga kala ku lavetela a tiyivhu ta mina; kanilezvi va gisa wutsumbu gabye va tsika ku gisa a tiyivhu ta mina”’,
9 hikwalaho, n’wina varisi, zwanani a mhaka ya Jehovha.
10 Jehovha, a Hosi ya Hombe, i ngalo: ‘Ndza vhukela a varisi, ndzi ta londza lezvaku va ti hlamulela hi kota ya tiyivhu ta mina,* ndzi va tsikisa a ku gisa* a tiyivhu ta mina,+ niku a varisi va nga ta ha ti gisa vona wutsumbu. Ndzi ta tlhatlhisa a tiyivhu ta mina non’wini wabye, niku ti nga ta hava zvakuga zvabye kambe.’”
11 “‘Hakuva Jehovha, a Hosi ya Hombe, i ngalo: “Hi mina loyi, mina ha ndzoce ndzi ta lavetela a tiyivhu ta mina ndzi ti hlayisa.+
12 Ndzi ta hlayisa a tiyivhu ta mina a ku khwatsi murisi a kumileko tiyivhu takwe ti nga hangalakile, a ti gisa.+ Ndzi ta ti tlhatlhisa matshan’wini wontlhe lawa ti nga hangalakile ka wona sikwini ga marefu ni munyama wo tshisa.+
13 Ndzi ta ti humesa cikari ka mifumo, ndzi ti hlengeleta hi ka matiko ndzi tlhela ndzi ti yisa tikweni ga tona. Ndzi ta ti gisa lomu zvitsungeni zva ka Izrayeli+ kusuhani ni micongo ni ka matshamu wontlhe ma akilweko ya tiko.
14 Ndzi ta ti gisa lomu wuriselweni ga ginene, niku a wuriselo ga tona gi tava zvitsungeni zvo tlakuka zva ka Izrayeli.+ Ti ta etlela wuriselweni ga ginene,+ tiga lomu wuriselweni go nona hehla ka zvitsunga zva ka Izrayeli.”
15 “‘“Mina ha ndzoce ndzi ta gisa a tiyivhu ta mina,+ niku mina ha ndzoce ndzi ta ti lata”,+ ku wula Jehovha, a Hosi ya Hombe.
16 “Ndzi ta lavetela leyi yi lahlekileko,+ ndzi wuyisa leyi yi hambukileko, ndzi bhandicha leyi yi bayisilweko, ndzi tlhela ndzi tiyisa leyi yi rerekileko; kanilezvi ndzi ta lovisa leyi yo kuluka ni leyi ya ntamu. Leti ndzi ta ti gisa a kulamula.”
17 “‘Kanilezvi n’wina tiyivhu ta mina, Jehovha, a Hosi ya Hombe, i ngalo: “Ndzi laha kusuhani ni ku lamula cikari ka yivhu ni yivhu, cikari ka tiyivhu ta vamatsune ni timhongo.+
18 Xana a mu xuri hi kuga wuriselweni gi nene ke? Xana mu wa fanele ku tlhela mu kandzihetela hi mikondzo ya n’wina a wuriselo ga n’wina legi gi seleko ke? Andzhako ka kunwa a mati yo basa ku hundza wontlhe, mu wa fanele a ku vhindlusa lawa ma seleko hi mikondzo ya n’wina ke?
19 Xana a tiyivhu ta mina ti fanele kuga lomu wuriselweni gi kandzihetelweko hi mikondzo ya n’wina ni kunwa mati lawa ma vhindlusilweko hi mikondzo ya n’wina ke?”
20 “‘Jehovha, a Hosi ya Hombe, i ngalo kabye: “Hi mina loyi, mina ha ndzoce ndzi ta lamula cikari ka yivhu yo kuluka ni yivhu yo wondza,
21 hakuva mu no simama a ku ti chovha hi mihlanha ni makatla ya n’wina mu tlhela mu simama a ku vhindla tontlhe leti to babya hi timhondzo ta n’wina kala mu ti hangalasa.
22 Ndzi ta ponisa a tiyivhu ta mina niku ti nga ta ha khomelwa ti giwa;+ ndzi ta lamula cikari ka yivhu ni yivhu.
23 Ndzi ta yimisa a murisi mun’we hehla ka tona,+ a nandza ga mina Dhavhidha,+ na yena i ta ti gisa. Yena ha yece i ta ti gisa ava murisi wa tona.+
24 Mina Jehovha, ndzi tava Nungungulu wa tona,+ ni nandza ga mina Dhavhidha i tava hosana cikari ka tona.+ Hi mina, Jehovha, ha ndzoce ndzi nga wula.
25 “‘“Ndzi ta maha civhumelwano ca kurula zvin’we nato,+ ndzi tlhatlhisa a tiko legi ka zvivandza zvo leva,+ kasi ti hanya kuruleni lomu ciwuleni ti tlhela ti etlela lomu makhwatini.+
26 Ti tava cikatekiso, tona ni wutshamu legi gi randzeleko a citsungana ca mina.+ Ndzi ta nisa vhula hi cikhati ci faneleko, ni makatekwa ma tana a ku khwatsi tivhula.+
27 A tisinya ta khwati ti ta pswala mihandzu ya tona, a misava yi humesa a pfuno wa yona,+ ni tiyivhu ta mina ti ta hanya kuruleni tikweni legi. Va ta zvi tiva lezvaku hi mina Jehovha a cikhati leci ndzi to tshova a kanga wabye+ ndzi va tlhatlhisa ka lava va nga va maha tikhumbi.
28 Ti nga ta hava nyama ya ku phurelwa hi matiko, ne a zvihari zva khwati zva laha misaveni zvi nga ta ha ti khadamula. Ti ta hanya kuruleni na ku nga hi na wa ku ti dzukisa.+
29 “‘“Ndzi ta ti kulisela a zvibyalo lezvi zvi tova ni nduma,* niku ti nga ta ha tshuka tifa hi ndlala lomu tikweni,+ ne ti nga ta ha tshuka ti chepetiwa kambe hi matiko.+
30 ‘Makunu va ta zvi tiva lezvaku mina Jehovha, a Nungungulu wa tona, ndzi zvin’we nato niku tona, ku nga yindlu ya ka Izrayeli, vanhu va mina’,+ ku wula Jehovha, a Hosi ya Hombe.”’
31 “‘N’wina tiyivhu ta mina,+ a tiyivhu leti ndzi ti hlayisako, mu vanhu ntsena, mina ndzi Nungungulu wa n’wina’, ku wula Jehovha, a Hosi ya Hombe.”
Mitlhamuselo ya lahasi
^ Kutani: “ndzi ta lava a tiyivhu ta mina mandleni yabye”.
^ Kutani: “ku hlayisa”.
^ Hi kukongoma: “ni vito”.
