Ezekiyeli 35:1-15
-
Ciphrofeto ca ku vhukela a zvitsunga zva Seyire (1-15)
35 A mhaka ya Jehovha yi nota kambe ka mina, yi taku:
2 “N’wana wa munhu, hundzuluka u cuwuka tikweni ga zvitsunga ga Seyire,+ u gi phrofetela.+
3 Gi byele, uku: ‘Jehovha, a Hosi ya Hombe, i ngalo: “Ndza ku vhukela, wena tiko ga zvitsunga ga Seyire, ndzi ta nawuluta canja ga mina gi ku vhukela, ndzi ku maha ciwula ci hahlulilweko.+
4 Ndzi ta hahlula madhoropa ya wena mava marumbi, na wena u tava ciwula ci hahlulilweko;+ u ta zvi tiva lezvaku hi mina Jehovha.
5 Hakuva u kombisile a wulala go tshisa+ u tlhela u nyikela vaIzrayeli lezvaku va dawa hi cipadha cikhatini ca khombo gabye, cikhatini ca kutsayiswa kabye ko gumesa.”’+
6 “‘Hikwalaho, a ku khwatsi hi lezvi ndzi hanyako’, ku wula Jehovha, a Hosi ya Hombe, ‘ndzi ta ku nyikela kuhalatweni ka nkhata, niku a kuhalatiwa ka nkhata ku ta ku hlongolisela.+ Kota lezvi wu nga nkhata u nga wu venga, a kuhalatiwa ka nkhata ku ta ku hlongolisela.+
7 Ndzi ta maha a tiko ga zvitsunga ga Seyire giva ciwula ci hahlulilweko,+ ndzi lovisa ni wihi a hundzako hi laho, kani wa ku famba kutani wa ku wuya.
8 Ndzi ta tata a zvitsunga zva gona hi lava va delweko; lava va delweko hi cipadha va ta wela lomu ka zvitsungana zva wena, ni lomu mikoveni ya wena, ni lomu micongweni ya wena yontlhe.
9 Ndzi ta ku maha ciwula ca kala kupindzuka, ni madhoropa ya wena ma nga ta hava ni vaaki.+ Mu ta zvi tiva lezvaku hi mina Jehovha.’
10 “Kota lezvi u ngaku: ‘A mifumo leyi ya yimbiri ni matiko lawa ya mambiri ma tava ya mina, hi ta ma teka hi wumbiri ga wona hi ma fumela’,+ hambu lezvi Jehovha ha yece a nga hi laho,
11 ‘hikwalaho, a ku khwatsi hi lezvi ndzi hanyako’, ku wula Jehovha, a Hosi ya Hombe, ‘ndzi ta ku khoma hi zanga ni ciluse ku nga zvalezvi u zvi kombisileko ka livengo la wena ha vona+ niku ndzi ta ti tivekisa cikari kabye a cikhati leci ndzi to ku lamula.
12 Makunu u ta zvi tiva lezvaku mina, Jehovha, ndzi zvi zwile a zviruko zvontlhe lezvi u nga byela a zvitsunga zva Izrayeli, a cikhati leci u ngaku: “Zvi hahlulilwe, zvi nyikelwe ka hina a kuva hi zvi khadamula.”*
13 Mu wulawulile zvahava hi mina hi kutikulisa, mu andzisa a magezu ya n’wina ya ku ndzi rukatela.+ Ndzi zvi zwile zvontlhe.’
14 “Jehovha, a Hosi ya Hombe, i ngalo: ‘A misava yontlhe yi ta tsaka laha ndzi to ku maha ciwula ci hahlulilweko.
15 A ku khwatsi hi lezvi u nga tsaka a cikhati leci a tshomba ya yindlu ya ka Izrayeli yi nga hahluliwa, minawu ndzi ta ku maha zvalezvo.+ U tava rumbi gi hahlulilweko, wena tiko ga zvitsunga ga Seyire, ina, a Edhomi yentlhe.+ Va ta zvi tiva lezvaku hi mina Jehovha.’”
Mitlhamuselo ya lahasi
^ Hi kukongoma: “a kuva zvakuga”.
