Ezekiyeli 37:1-28
37 A canja ga Jehovha gi wa hi hehla ka mina, na Jehovha i no ndzi tlakula hi moya wakwe a ya ndzi veka cikari ka nkova+ wu nga tele hi marambu.
2 I no ndzi rendzelekelisa cikari ka wona, ndzi wona lezvaku ku wa hi ni marambu ya talela ga cima ma nga mbambamele lomu nkoveni, niku ma wa womile nguvhu.+
3 I no ndzi wutisa, aku: “N’wana wa munhu, ina a marambu lawa ma nga vhuka ma hanya ke?” Ndzi no hlamula, ndziku: “Jehovha, Hosi ya Hombe, hi wena u zvi tivako.”+
4 Aku ka mina: “Phrofetela a marambu lawa, uku ka wona: ‘N’wina marambu yo woma, zwanani a mhaka ya Jehovha:
5 “‘Lezvi hi lezvi Jehovha, a Hosi ya Hombe, a wulako ka marambu lawa: “Ndzi ta nghenisa kuhefemula ndzeni ka n’wina, mu ta vhuka mu hanya.+
6 Ndzi ta vekela misiha ka n’wina, ndzi milisa nyama hehla ka n’wina, ndzi mu fenengeta hi hlonge ndzi tlhela ndzi chela kuhefemula ndzeni ka n’wina, makunu mu vhuka mu hanya; mu ta zvi tiva lezvaku hi mina Jehovha.”’”
7 Ndzi no phrofeta kota lezvi ndzi nga leletelwe. Zvalezvi ndzi nga phrofeta, ku no zwala guwa, a guwa ga wukhokhorokhokhoro, ni marambu ma no sangula ku tlhangana a gin’we ka gin’wani.
8 Hi kulandzela, ndzi no wona a misiha ni nyama na yi mila ka wona, ni hlonge yi no ma fenengeta. Kanilezvi ku wa nga seva ni kuhefemula ndzeni ka wona.
9 Andzhako ka lezvo, i no ndzi byela, aku: “Phrofeta ka moya. N’wana wa munhu, phrofeta u byela moya, uku: ‘Jehovha, a Hosi ya Hombe, i ngalo: “Wena moya,* tana hi ka mune wa mimoya, u pupuxa hehla ka vanhu lava va delweko kasi va vhuka va hanya.”’”
10 Hikwalaho, ndzi no phrofeta kota lezvi a nga ndzi leletele, ni kuhefemula* ku no nghena ndzeni ka vona. Va no sangula ku hanya va suka va yima hi minenge yabye,+ vava butho ga hombe nguvhu.
11 Hi kulandzela, i no ndzi byela, aku: “N’wana wa munhu, a marambu lawa hi yontlhe a yindlu ya ka Izrayeli.+ Vona ve ngalo: ‘A marambu ya hina ma womile ni kutsumba ka hina ku mbhelile.+ Hi fuvisilwe hi ku bhi.’
12 Hikwalaho, phrofeta, uku kabye: ‘Jehovha, a Hosi ya Hombe, i ngalo: “Ndzi ta vhulula a zvilahla zva n’wina+ ndzi mu humesa hi zvilahleni zva n’wina, n’wina vanhu va mina, ndzi tlhela ndzi mu neha tikweni ga Izrayeli.+
13 Mu ta zvi tiva lezvaku hi mina Jehovha a cikhati leci ndzi to vhulula a zvilahla zva n’wina, ndzi mu humesa hi zvilahleni zva n’wina, n’wina vanhu va mina.”’+
14 ‘Ndzi ta chela moya wa mina ndzeni ka n’wina mu vhuka mu hanya,+ niku ndzi ta mu veka tikweni ga n’wina; mu ta zvi tiva lezvaku kuve mina, Jehovha, ha ndzoce ndzi nga wula ndzi tlhela ndzi zvi maha’, ku wula Jehovha.”
15 A mhaka ya Jehovha yi nota kambe ka mina, yi taku:
16 “Wena n’wana wa munhu, teka a nhonga u tsala ka yona, uku: ‘Ya Judha ni vanhu va ka Izrayeli lava va nga na yena.’*+ Andzhako ka lezvo, teka yin’wani nhonga u tsala ka yona, uku: Ya Josefa — yi nga nhonga ya Efrayime — ni vontlhe va yindlu ya ka Izrayeli lava va nga na yena.’*+
17 Hi kulandzela, tlhanganisa a tinhonga leto ta timbiri kasi tiva yin’we canjeni ga wena.+
18 A cikhati leci a vanhu va wena* va to ku wutisa, vaku: ‘U nga ta hi byela ku a zvilo lezvi zvi wula yini ke?’,
19 va hlamule, uku: ‘Jehovha, a Hosi ya Hombe, i ngalo: “Ndzi ta teka a nhonga ya Josefa yi nga canjeni ga Efrayime, ni tixaka ta Izrayeli leti ti nga zvin’we naye, ndzi ti tlhanganisa ni nhonga ya Judha; ndzi ta ti maha nhonga yin’we+ niku ti tava yin’we canjeni ga mina.”’
20 A tinhonga leti u to tsala ka tona ti wave canjeni ga wena kasi va ti wona.
21 “Va byele, uku: ‘Jehovha, a Hosi ya Hombe, i ngalo: “Ndzi ta humesa a vaIzrayeli matikweni lawa va yileko ka wona, ndzi va tlhanganisa hi matlhelweni wontlhe, ndzi va wuyisa tikweni gabye.+
22 Ndzi ta va maha mufumo mun’we tikweni lego,+ hehla ka zvitsunga zva Izrayeli; vona vontlhe va ta fumelwa hi hosi yin’we.+ Va nga ta ha tshuka vava matiko mambiri ne va nga ta ha avanyiswa vava mifumo yimbiri.+
23 Va nga ta ha ti nyenyezisa hi zvifananiso zvabye zva manyala* ni mitiro yabye yo nyenyeza ni zvontlhe a zvihambunyeto zvabye.+ Ndzi ta va tlhatlhisa ka kungatsumbeki kabye kontlhe loku va wonhileko ha kona ndzi tlhela ndzi va basisa. Va tava vanhu va mina, mina ndziva Nungungulu wabye.+
24 “‘“A nandza ga mina Dhavhidha i tava hosi yabye;+ vona vontlhe va tava ni murisi mun’we.+ Va ta famba zvibohweni zva mina zva kulamula va tlhela va hlayisa khwatsi a zvileletelo zva mina.+
25 Va ta tshama tikweni legi ndzi nyikileko a nandza ga mina Jakobe, tikweni legi a vakokwani va n’wina va hanyileko ka gona.+ Va ta hanya ka gona kala kupindzuka,+ vona ni vana vabye ni vana va vana vabye;+ Dhavhidha, a nandza ga mina, i tava hosana yabye kala kupindzuka.+
26 “‘“Ndzi ta maha civhumelwano ca kurula zvin’we navo;+ ci tava civhumelwano ca kala kupindzuka zvin’we navo. Ndzi ta va veka tikweni gabye, ndzi va andzisa,+ ni wutshamu ga mina go basa gi tava cikari kabye kala kupindzuka.
27 A tenda* ga mina gi tava hehla kabye;* mina ndzi tava Nungungulu wabye, vona vava vanhu va mina.+
28 A matiko ma ta zvi tiva lezvaku mina Jehovha, ndza basisa Izrayeli a cikhati leci a wutshamu ga mina go basa gi tova cikari kabye kala kupindzuka.”’”+
Mitlhamuselo ya lahasi
^ Kutani: “kuhefemula”.
^ Kutani: “moya”.
^ Kutani: “lava va nga vanghana vakwe”.
^ Kutani: “lava va nga vanghana vakwe”.
^ Hi kukongoma: “a vana va vanhu va wena”.
^ A gezu ga ciHebheru gi tirisilweko laha kuzvilava hi gona gin’we ni legi gi wulako a “macimba ya zvihari”. Gi tirisiwa kota gezu ga ku chepeta.
^ Kutani: “muti”.
^ Kutani: “gi tava navo”.
