Ezekiyeli 38:1-23
38 A mhaka ya Jehovha yi nota kambe ka mina, yi taku:
2 “N’wana wa munhu, hundzuluka u cuwuka Goge wa le tikweni ga Magoge,+ a hloko ya tihosana ya Mexeke na Tubhale,+ u mu phrofetela,+
3 uku: ‘Jehovha, a Hosi ya Hombe, i ngalo: “Ndza ku vhukela wena Goge, a hloko ya tihosana ya Mexeke na Tubhale.
4 Ndzi ta ku hundzulukisa ndzi tlhomeka tihuka tihlayeni ta wena+ ndzi ku humesa ni butho ga wena gontlhe,+ a mahaxi ni vakhileli va mahaxi, vontlhe na va bohile tinguwo to ngangamela, a butho ga hombe na gi hi ni zvitlhangu zva hombe ni zva zvitsongwani,* vontlhe na va hi ni zvipadha;
5 Persia, na Etiopia, na Puti+ va zvin’we navo, vontlhe na va hi ni zvitlhangu zva zvitsongwani ni makapasete.
6 Gomere ni mabutho yakwe wontlhe, ni yindlu ya Togarma+ ya le zvipandzeni zva le kule nguvhu zva n’walungu,* zvin’we ni mabutho ya yona wontlhe — ina, a matiko yo tala ma zvin’we na wena.+
7 “‘“Ti longiseleni, mu tshama na mu longile, wena ni mabutho ya wena wontlhe lawa ma tsombeneko na wena, niku wena u tava komandante* wabye.
8 “‘“Andzhako ka masiku yo tala, u ta vitaniwa. Kugumeseni ka malembe, u ta dhumela tiko legi a vanhu va gona va wuyisilweko ni ku tlhatlhiswa ka cipadha, va tlhanganisilweko hi ka matiko yo tala va nehiwa zvitsungeni zva Izrayeli, lezvi zvi nga tshamile a cikhati co leha na zvi hahlulilwe. A vaaki va tiko legi va wuyisilwe hi ka matiko, niku vontlhe va hanya kuruleni.+
9 U ta va dhumela a ku khwatsi cingulo, u fenengeta tiko a ku fana ni marefu, wena ni mabutho ya wena wontlhe ni matiko yo tala lawa ma nga na wena.”’
10 “Jehovha, a Hosi ya Hombe, i ngalo: ‘Ka siku lego ku ta nghena a maalakanyo mbilwini ya wena, niku u ta luka mano yo biha.
11 U taku: “Ndzi ta dhumela a tiko ga maaldheya ma nga vhikelwangiko.*+ Ndzi ta ya vhukela lava va hanyako kuruleni, lava va nga hiko na nchumu wa ku va jusa, vontlhe lava va hanyako maaldheyeni ma nga vhikelwangiko hi mimuro ni zvikwinyaro kutani tivati.”
12 A kungo ga wena ku tava ku wunga titshomba to tala ni ku phanga, ni ku dhumela a matshamu ma nga hahlulilwe lawa makunu ma nga ni vaaki,+ ni vanhu va tsombanisilweko hi ka matiko,+ lava va hlengeletelako a titshomba ni zvibya,+ va hanyako cikari ka misava.
13 “‘Xebha,+ na Dhedhani,+ ni vaxavisi va Tarxixi+ ni masochwa ya kona wontlhe* va ta ku byela, vaku: “Xana u dhumela kasi ku wunga titshomba to tala ni ku phanga ke? U tsombanisile a mabutho ya wena kasi ku wunga prata ni ouro, u teka titshomba ni zvibya, u teka muphango wa talela ga cima ke?”’
14 “Hikwalaho, phrofeta, n’wana wa munhu, u byela Goge, uku: ‘Jehovha, a Hosi ya Hombe, i ngalo: “Ka siku lego, laha a vanhu va mina va ka Izrayeli va to ngha va hanya kuruleni, u nga ta zvi tiva ke?+
15 U tata hi wutshan’wini ga wena, hi zvipandzeni zva le kule nguvhu zva n’walungu,+ wena zvin’we ni matiko yo tala lawa ma nga na wena, vontlhe na va khilele mahaxi, a citshungu ca hombe ni butho ga hombe nguvhu.+
16 U tata u ta vhukela vanhu va mina va ka Izrayeli a ku khwatsi i refu gi fenengetako tiko. Masikwini ya kugumesa, ndzi ta ku neha u ta vhukela tiko ga mina+ kasi a matiko ma ndzi tiva a cikhati leci ndzi to ti basisa ha wena kuwoneni kabye, wena Goge.”’+
17 “Jehovha, a Hosi ya Hombe, i ngalo: ‘A hi wena loyi ndzi nga wulawula hi yena a kaleloko na ndzi tirisa a malandza ya mina, a vaphrofeti va ka Izrayeli, lava hi malembe yo tala va nga phrofeta lezvaku u ta nehiwa u ta va vhukela ke?’
18 “‘Ka siku lego, a siku legi Goge a to dhumela a tiko ga ka Izrayeli’, ku wula Jehovha, a Hosi ya Hombe, ‘a khulo ga mina ga hombe gi ta vhura.+
19 Kutitsitsiriteni ka mina, ndzilweni wa khulo ga mina, ndzi ta wulawula; ka siku lego, ku tava ni kutsekatseka ka hombe ka misava tikweni ga ka Izrayeli.
20 Hi kota ya mina, a tinjhanjhi ta lomu bimbini, ni zvinyanyani zva tilo, ni zvihari zva khwati, ni zvikokakoka* zvontlhe zvi fambako laha misaveni, ni vanhu vontlhe va nga laha misaveni, va ta rurumela. A zvitsunga zvi ta khungumulwa,+ a maribye mawa, ni mimuro yontlhe yi tawa lahasi.’
21 “‘Ndzi ta vitanisa cipadha ci talwa naye zvitsungeni zva mina zvontlhe’, ku wula Jehovha, a Hosi ya Hombe. ‘A cipadha ca mun’we ni mun’wani ci ta vhukela a makabye wakwe.+
22 Ndzi ta neha kulamula ka mina hehla kakwe hi ntungu+ ni kuhalatwa ka nkhata. Ndzi ta nisa a vhula ya hombe, ni maralala,+ ni ndzilo,+ ni solufa*+ hehla kakwe, ni ka mabutho yakwe, ni ka matiko yo tala lawa ma nga zvin’we naye.+
23 Hakunene ndzi ta ti kulisa, ndzi ti basisa ni ku ti tivekisa kuwoneni ka matiko yo tala; va ta zvi tiva lezvaku hi mina Jehovha.’
Mitlhamuselo ya lahasi
^ Kutani: “tingenge”, zvitlhangu zva zvitsongwani zvi nga tala ku tiriswa hi van’wamawura.
^ Kutani: “norte”.
^ Hi kukongoma: “mugadhi”.
^ Kutani: “ya laha libalangeni, ya lehandle ka dhoropa”.
^ Kutani: “ni zvontlhe a zvinghalana zva kona zva malevhu”.
^ Kutani: “zviharana zvo famba hi khwiri”.
^ Kutani: “enxofre”.
