Ezekiyeli 39:1-29
39 “Wena n’wana wa munhu, phrofetela Goge,+ uku kakwe: ‘Jehovha, a Hosi ya Hombe, i ngalo: “Ndza ku vhukela, wena Goge, a hloko ya tihosana ya Mexeke na Tubhale.+
2 Ndzi ta ku hundzulukisa, ndzi ku rangela, ndzi ku maha u kandziha hi zvipandzeni zva le kule nguvhu zva n’walungu*+ kala u chikela zvitsungeni zva Izrayeli.
3 Ndzi taba wura ga wena gi nga canjeni ga wena ga cibhabha, ndzi wisa mipaxa ya wena yi nga canjeni ga wena ga cinene.
4 U tawa zvitsungeni zva Izrayeli,+ wena, ni mabutho ya wena wontlhe, ni matiko lawa ma tova na wena. Ndzi ta ku nyikela u giwa hi tixaka tontlhe ta zvinyanyani zva ku hanya hi nyama ni zvihari zva khwati.”’+
5 “‘U ta wela libalangeni,+ hakuva hi mina ha ndzoce ndzi nga wula’, ku wula Jehovha, a Hosi ya Hombe.
6 “‘Ndzi ta rumela ndzilo hehla ka Magoge ni hehla ka lava va hanyako kuruleni lomu zvihlaleni;*+ va ta zvi tiva lezvaku hi mina Jehovha.
7 Ndzi ta tivekisa a vito ga mina go basa cikari ka vanhu va mina va ka Izrayeli niku ndzi nga ta ha tsika a vito ga mina go basa gi nyenyeziswa kambe; a matiko ma ta zvi tiva lezvaku hi mina Jehovha,+ Loyi a Basileko lomu Izrayeli.’+
8 “‘Ina, lezvi zvata niku zvi ta maheka’, ku wula Jehovha, a Hosi ya Hombe. ‘Legi i siku legi ndzi wulawulileko ha gona.
9 A vaaki va madhoropa ya Izrayeli va ta huma va ya dzivela ndzilo hi matlhari — ku nga zvitlhangu zva hombe ni zva zvitsongwani,* a mawura ni mipaxa, a tinduko ta yimpi ni matlhari. Va ta zvi tirisa kasi ku dzivela ndzilo+ hi 7 wa malembe.
10 Zvi nga taza zvi lava ku va ya rola mahlahla lomu mafusini ne hambu ku ya tshova tihunyi lomu makhwatini, hakuva va ta tirisa matlhari kasi ku dzivela hi wona ndzilo.’
“‘Va ta wutla zvilo ka lava va va wutleleko va tlhela va phanga lava va va phangileko’, ku wula Jehovha, a Hosi ya Hombe.
11 “‘Ka siku lego, Goge+ ndzi ta mu nyika cilahla le Izrayeli, nkoveni wa lava va endzako vaya mutsuwuka-gambo wa bimbi, niku wu ta vhala ndlela ya lava va hundzako. Hi kwaleyo va to mu lahlela kona Goge ni zvontlhe a zvitshungu zvakwe. A wutshamu lego va ta gi vitana ku i Nkova wa Hamoni-Goge.*+
12 A yindlu ya ka Izrayeli yi ta mbheta 7 wa tihweti na yi va lahla kasi ku basisa tiko.+
13 A vanhu vontlhe va tiko va ta hlengela ntirweni wa ku va lahla, niku lezvo zvi ta va nehela wudzundzo sikwini legi ndzi to ti dhumisa hi gona’,+ ku wula Jehovha, a Hosi ya Hombe.
14 “‘Ku ta yimiswa vanhu kasi va simama ku fambafamba lomu tikweni va lahla zvirumbi lezvi zvi seleko laha misaveni kasi ku yi basisa. Va ta simama ku zvi lavetela hi 7 wa tihweti.
15 Laha lava va to ngha va fambafamba lomu tikweni va to wona a rambu ga munhu, va ta yimisa cifungo tlhelweni ga gona. Makunu lava va yimisilweko kasi ku lahla va ta gi lahla Nkoveni wa Hamoni-Goge.+
16 Kwaleyo kambe ku tava ni dhoropa gi to vitaniwa ku i Hamona.* Va ta basisa tiko.’+
17 “Kanilezvi wena n’wana wa munhu, Jehovha, a Hosi ya Hombe, i ngalo: ‘Byela a zvinyanyani zva tixaka tontlhe ni zvihari zvontlhe zva khwati, uku: “Hlengeletanani muta. Hlengeletanani mu randzela a muphahlo wa mina lowu ndzi mu longiselelako, a muphahlo wa hombe hehla ka zvitsunga zva Izrayeli.+ Mu taga nyama mu tlhela munwa nkhata.+
18 Mu taga nyama ya tinhenha mu tlhela munwa nkhata wa tihosana ta misava — a tiyivhu ta vamatsune, ni tiyivhana, ni timhongo, ni madhuna ya tihomu — zvontlhe zvifuyo zvo nona zva Bhaxani.
19 Ka muphahlo lowu ndzi mu longiselelako, mu taga mafura ma kala ma huma hi tinhovhu mu tlhela munwa nkhata kala mu popiwa.”’
20 “‘Mezeni ya mina mu ta xura hi mahaxi ni vafambisi va tikareta, hi tinhenha ni tixaka tontlhe ta masochwa’,+ ku wula Jehovha, a Hosi ya Hombe.
21 “‘Ndzi ta kombisa a wudzundzo ga mina cikari ka matiko, niku a matiko wontlhe ma ta wona a kulamula loku ndzi ku mahileko ni ntamu* lowu ndzi wu kombisileko cikari kabye.+
22 Kusukela ka siku lego zviya mahlweni, a yindlu ya ka Izrayeli yi ta zvi tiva lezvaku hi mina Jehovha, a Nungungulu wabye.
23 Ni matiko wontlhe ma ta zvi tiva lezvaku a yindlu ya ka Izrayeli yi yile wukhumbini hi kota ya cigoho ca yona n’winyi, hakuva a va tsumbekangi ka mina.+ Hikwalaho, ndzi no va fihlela a nghohe ya mina+ ndzi tlhela ndzi va nyikela canjeni ga valala vabye+ niku vontlhe va no dawa hi cipadha.
24 Ndzi va khomile hi kuya hi kungahlazveki kabye ni zvihambunyeto zvabye, ndzi va fihlela a nghohe ya mina.’
25 “Hikwalaho, Jehovha, a Hosi ya Hombe, i ngalo: ‘Ndzi ta tlhelisela lava va khomilweko va Jakobe+ ndzi tlhela ndzi yi mahela wuxinji a yindlu yontlhe ya ka Izrayeli.+ Ndzi ta vhikela a vito ga mina go basa hi kutitsitsirita.+
26 Andzhako ka kuva va wisilwe tingana hi kota ya kungatsumbeki kabye kontlhe mahlweni ka mina,+ va ta hanya kuruleni tikweni gabye, na ku nga hi na wa ku va dzukisa.+
27 Laha ndzi to va wuyisa hi ka mifumo ni ku va hlengeleta hi ka matiko ya valala vabye,+ minawu ndzi ta ti basisa cikari kabye kuwoneni ka matiko yo tala.’+
28 “‘Va ta zvi tiva lezvaku hi mina Jehovha, a Nungungulu wabye, a cikhati leci ndzi to va yisa wukhumbini cikari ka matiko ndzi gumesa ndzi va hlengeleta va wuya tikweni gabye, ndzi nga siyi ne ni mun’we wabye ndzhako.+
29 Ndzi nga ta ha tshuka ndzi va fihlela a nghohe ya mina,+ hakuva ndzi ta chulula a moya wa mina hehla ka yindlu ya ka Izrayeli’,+ ku wula Jehovha, a Hosi ya Hombe.”
Mitlhamuselo ya lahasi
^ Kutani: “norte”.
^ Kutani: “ilhas; zvilundzweni zva mati”.
^ Kutani: “tingenge”, zvitlhangu zva zvitsongwani zvi nga tala ku tiriswa hi van’wamawura.
^ Kutani: “Nkova wa Zvitshungu zva Goge”.
^ Zvi wulako ku: “Zvitshungu”.
^ Hi kukongoma: “canja”.
