Ezekiyeli 4:1-17
4 “Makunu wena, n’wana wa munhu, teka citini u ci veka mahlweni ka wena. Kehla dhoropa ka cona — a dhoropa ga Jerusalema.
2 Gi randzele,+ u aka muro wa ku gi randzela matlhelweni ya gona,+ u yimisa rampa ya ku dhumela hi yona,+ u zima magovelo ma gi randzela u tlhela u gi randzela hi michini ya ku bhoxa hi yona.+
3 Teka a pani ga simbi u gi yimisa kota muro wa simbi cikari ka wena ni dhoropa. Hi kulandzela, hundzuluka u gi cuwuka, gi tava gi randzelwe; wena u fanele ku gi randzela. Leci cikombiso ka yindlu ya ka Izrayeli.+
4 “Andzhako ka lezvo, etlela hi reve ga wena ga cibhabha u veka a nandzu wa yindlu ya ka Izrayeli hehla ka wena.*+ U ta rwala a nandzu wabye ka masiku wontlhe lawa u to etlela hi reve ga wena.
5 Ndzi ta ku gemela a 390 wa masiku, ma ringanako ni malembe ya nandzu wabye,+ niku u ta rwala a nandzu wa yindlu ya Izrayeli.
6 U fanele ku ma tlhanganisa.
“Makunu hi khati ga wumbiri, u ta etlela hi reve ga wena ga cinene, u rwala a nandzu wa yindlu ya ka Judha+ hi 40 wa masiku. A siku i lembe, a siku i lembe, hi lezvi ndzi ku gemeleko.
7 U ta hundzuluka u cuwuka Jerusalema gi randzelweko,+ a woko ga wena na gi funungulilwe, u gumesa u phrofeta xungetano hi gona.
8 “Wa zvi wona! Ndzi ta ku boha hi tingoti kasi u nga zvi koti ku hundzuluka u etlela hi reve legi gin’wani kala u tlhanganisa a masiku ya wena ya ku randzela.
9 “U fanele ku teka a trigo, ni sevhadha, ni tidzumani, ni tichumba, ni mahuva, ni trigo yo pswhuka u zvi chela ka cibya cin’we u ti mahela tipawa hi zvona. Hakuva hi tona u toga ka masiku wontlhe ya 390 u to mbheta na u etlele hi reve ga wena.+
10 U ta peza u tlhela uga a 20 wa maxekeli* ya zvakuga hi siku. U ta zviga hi zvikhati zvi yimisilweko.
11 “U tanwa mati hi lipimo, ku nga cipandze ca wu 6 ca hini.* U ta manwa hi zvikhati zvi yimisilweko.
12 “U taga pawa ya wena a ku khwatsi i pawa ya redhonda ya sevhadha; yi woce kuwoneni kabye, u yi woca hi macimba ya vanhu yo woma.”
13 Jehovha i no engeta, aku: “Lezvi hi lezvi a vaIzrayeli va to yi gisa zvona a pawa yabye — yi nga hlazvekangiko — cikari ka matiko lawa ndzi to va hangalasa ka wona.”+
14 Makunu ndzi te: “Ahihi, Jehovha, Hosi ya Hombe! Kusukela wusweni ga mina kala lezvi, a ndzi* se ti nyenyezisa hi kuga a nyama ya cihari ci kumilweko na ci file kutani hi cihari ci delweko,+ niku a ku se nghena nyama yi nga hlazvekangiko* non’wini wa mina.”+
15 Hikwalaho, i te ngalo ka mina: “Zvi lulamile, ndzi ta ku tsika u tirisa a macimba ya tihomu kasi ku woca hi wona a pawa ya wena wutshan’wini ga ku woca hi macimba ya vanhu.”
16 Hi kulandzela, i no ndzi byela lezvi: “N’wana wa munhu, ndzi ta vhala a zvakuga zvi nga ha ngheni* lomu Jerusalema;+ a vanhu va taga pawa yi pezilweko hi cikalo hi kukarateka ka hombe,+ vanwa a mati ma pimilweko hi lipimo na va chava.+
17 Lezvi zvi ta maheka kasi ku laha va to vhumala pawa ni mati, va cuwukana hi ku hlamala va tlhela va wondza hi kota ya cigoho cabye.
Mitlhamuselo ya lahasi
^ Hi kukongoma: “gona”, ku nga reve ga cibhabha ga Ezekiyeli”.
^ Kutani: “muhefemulo wa mina a wu”.
^ Kutani: “yo nyenyeza”.
^ Hi kukongoma: “tshova a nhonga ya pawa”. Kuzvilava ku wuliwa a tinhonga leti va nga veketela ka tona tipawa.
