Ezekiyeli 40:1-49
40 Hi lembe ga wu 25 ga wukhumbi ga hina,+ kusanguleni ka lembe, hi siku ga wu 10 ga hweti, hi lembe ga wu 14 andzhako ka kuwa ka dhoropa,+ hi siku galego, a canja ga Jehovha gi wa hi hehla ka mina; i no ndzi teka a ndzi yisa dhoropeni.+
2 Hi miwoniso yi tako hi ka Nungungulu, i no ndzi yisa tikweni ga ka Izrayeli a ndzi yimisa hehla ka citsunga co leha nguvhu,+ ku nga hi ni cilo co khwatsi i dhoropa hi tlhelo ga dzonga.*
3 A cikhati leci a nga ndzi yisa laho, ndzi no wona a munhu a nga tshamisile ku khwatsi i kobre.+ I wa yimile laha nyangweni na a hi ni lingoti la wukene* ni lihlanga* la ku pima hi lona canjeni gakwe.+
4 A wanuna loye i te ngalo ka mina: “N’wana wa munhu, cuwukisisa khwatsi, u ingisela khwatsi u tlhela u veka mbilu ya wena ka zvontlhe lezvi ndzi ku kombako, hakuva hi zvalezvo u tiselweko zvona laha. Byela a yindlu ya ka Izrayeli zvontlhe lezvi u zvi wonako.”+
5 Ndzi no wona a muro wu rendzelekeleko a wutshamu ga lahandle ga tempeli.* Canjeni ga wanuna loye, ku wa hi ni lihlanga la ku pima hi lona la 6 wa mikono (a nkono wun’we ni wun’wani wu wa tlhatekelwe a lipimo li ringanako a kuanama ka canja).* I no sangula ku pima muro: A kudziva ka wona ku wa ringana lihlanga lin’we, ni kutlakuka ka wona ku wa ringana lihlanga lin’we.
6 Hi kulandzela, i nota laha nyangweni leyi yi cuwukeneko ni mutsuwuka-gambo,+ a kandziha zvikadha zva yona. I no pima a cipimbitsi ca nyangwa: ci wa hi lihlanga lin’we a kuanama, ni cipimbitsi leci cin’wani conawu ci wa hi lihlanga lin’we a kuanama.
7 A sala yin’we ni yin’wani ya vagadhi yi wa hi lihlanga lin’we a kuleha, ni lihlanga lin’we a kuanama. A sala yin’we ni yin’wani ya vagadhi yi wa tsawukene ni yin’wani hi ntlhanu wa mikono.+ A cipimbitsi ca nyangwa ci nga hi laha ligumbagumbeni la nyangwa, ci nga cuwukile lomu ndzeni, ci wa ringana a lihlanga lin’we.
8 I no pima a ligumbagumba la nyangwa li cuwukileko lomu ndzeni: li wa hi lihlanga lin’we.
9 Hi kulandzela, i no pima a ligumbagumba la nyangwa: li wa hi ni 8 wa mikono; i no pima a mapilari ya lona ya lomu matlhelweni: ma wa hi ni mikono yimbiri. A ligumbagumba la nyangwa li wa cuwukile lomu ndzeni.
10 Ku wa hi ni tisala tinharu ta vagadhi ka tlhelo gin’we ni gin’wani ga nyangwa ya mutsuwuka-gambo. Hi wunharu ga tona ti wa hi ta lipimo lin’we; ni mapilari ya lomu matlhelweni, ma nga hi ka tlhelo gin’we ni gin’wani, ma wa hi ya lipimo lin’we.
11 Hi kulandzela, i no pima a kuanama ka nyangwa a kuma 10 wa mikono, niku a kuleha ka nyangwa ku wa hi 13 wa mikono.
12 A wutshamu legi gi nga bhiyelwe hi muro, gi nga hi mahlweni ka tisala ta vagadhi ka matlhelo mambiri, gi wa hi ni nkono wun’we. A tisala ta vagadhi ti nga hi ka matlhelo mambiri ti wa hi ni 6 wa mikono.
13 Hi kulandzela, i no pima nyangwa kusukela langweni* la sala yin’we ya vagadhi* kala langweni la yin’wani, a kuma 25 wa mikono a kuanama; a nyangwa ya yin’we yi wa hi mahlweni ka nyangwa ya yin’wani.+
14 I no pima mapilari ya lomu matlhelweni, a kuma 60 wa mikono a kutlakuka, a ku patsa ni mapilari ya lomu matlhelweni ya tinyangwa ti nga matlhelweni wontlhe ya tsendzele.*
15 Kusukela mahlweni ka nyangwa kala mahlweni ka ligumbagumba, ka tlhelo ga nyangwa ya lomu ndzeni, ku wa hi 50 wa mikono.
16 A tisala ta vagadhi ni mapilari ya kona ya lomu matlhelweni, ndzeni ka nyangwa ya tlhelo gin’we ni gin’wani, ti wa hi ni majanela yo hlonga tlhelo gin’we ma anama legi gin’wani.+ Lomu ndzeni ka tigumbagumba konawu ku wa hi ni majanela ka tlhelo gin’we ni gin’wani niku ku wa hi ni mifananiso ya micindzu+ yi nga kehlilwe ka mapilari ya lomu matlhelweni.
17 Hi kulandzela, i no ndzi yisa tsendzeleni wa lahandle. Ndzi no wona a tisala to gela ka tona+ ni wutshamu go bambatelwa matlhelweni ya tsendzele. Ku wa hi ni 30 wa tisala to gela ka tona laha wutshan’wini go bambatelwa.
18 A wutshamu go bambatelwa gi wa kumeka tlhelweni ga tivati, niku a kuanama ka gona ku wa ringana ni kuleha ka tivati — a wutshamu legi go bambatelwa gi wa kumekela hasi.
19 Andzhako ka lezvo, i no pima kuanama kusukela nyangweni ya lahasi kala kusanguleni ka tsendzele wa lomu cikari. Ku wa hi ni 100 wa mikono hi tlhelo ga mutsuwuka-gambo ni tlhelo ga n’walungu.*
20 A tsendzele wa lahandle wu wa hi ni nyangwa yi nga cuwukile n’walungu. I no pima kuleha ka yona ni kuanama ka yona.
21 Ku wa hi ni tisala tinharu ta vagadhi ka tlhelo gin’we ni gin’wani. A mapilari ya kona ya lomu matlhelweni ni ligumbagumba zvi wa hi ni tipimo to fana ni ta nyangwa yo sangula. Zvi wa hi ni 50 wa mikono a kuleha ni 25 wa mikono a kuanama.
22 A majanela ya kona, ni ligumbagumba la kona, ni mifananiso ya kona ya micindzu+ yi nga kehlilwe zvi wa hi ni lipimo lin’we ni lezvi zva nyangwa ya mutsuwuka-gambo. Zvi wa koteka ku nghena ka wona hi ku kandziha 7 wa zvikadha, niku a ligumbagumba la wona li wa hi mahlweni ka zvona.
23 Ku wa hi ni nyangwa ya tsendzele wa lomu cikari yi nga cuwukene ni nyangwa ya le n’walungu, ni yin’wani yi nga cuwukene ni nyangwa ya mutsuwuka-gambo. I no pima pfhuka wa kusukela ka nyangwa yin’we kala ka yin’wani, a kuma 100 wa mikono.
24 Hi kulandzela, i no ndzi yisa dzongeni. Ndzi no wona nyangwa hi tlhelo ga dzonga.+ I no pima mapilari ya kona ya lomu matlhelweni ni ligumbagumba la kona: Zvi wa hi ni lipimo lo fana ni la lezvi zvin’wani.
25 A nyangwa leyo ni ligumbagumba la kona zvi wa hi ni majanela ka tlhelo gin’we ni gin’wani yo fana ni majanela lawa man’wani. Yi wa hi ni 50 wa mikono a kuleha, ni 25 wa mikono a kuanama.
26 Ku wa hi ni 7 wa zvikadha zvo kandziha hi zvona,+ niku a ligumbagumba la kona li wa hi mahlweni ka zvona. Li wa hi ni mifananiso ya micindzu yi nga kehlilwe ka mapilari ya yona ya lomu matlhelweni, a wun’we ka tlhelo ni tlhelo.
27 A tsendzele wa lomu cikari wu wa hi ni nyangwa yi nga cuwukile dzongeni; i no pima a pfhuka wa kusuka ka nyangwa yin’we kala ka yin’wani, hi tlhelo ga dzonga, a kuma 100 wa mikono.
28 Hi kulandzela, i no ndzi nghenisa tsendzeleni wa lomu cikari hi nyangwa ya le dzongeni; a cikhati leci a nga pima a nyangwa ya le dzongeni, yi wa hi ni lipimo lo fana ni la leti tin’wani.
29 A tisala ta kona ta vagadhi, ni mapilari ya kona ya lomu matlhelweni, ni ligumbagumba la kona, zvi wa hi zva lipimo lin’we ni lezvi zvin’wani. A nyangwa leyo ni ligumbagumba la kona zvi wa hi ni majanela ka tlhelo gin’we ni gin’wani. Yi wa hi ni 50 wa mikono a kuleha, ni 25 wa mikono a kuanama.+
30 Ku wa hi ni tigumbagumba matlhelweni wontlhe; ti wa hi ni 25 wa mikono a kuleha, ni ntlhanu wa mikono a kuanama.
31 A ligumbagumba la kona li wa cuwukene ni tsendzele wa lahandle; ku wa hi ni mifananiso ya micindzu yi nga kehlilwe ka mapilari ya yona ya lomu matlhelweni,+ ni 8 wa zvikadha zva ku kandziha hi zvona.+
32 A cikhati leci a nga ndzi nghenisa lomu tsendzeleni wa lomu cikari hi tlhelo ga mutsuwuka-gambo, i no pima nyangwa. Yi wa hi ni lipimo lo fana ni leti tin’wani.
33 A tisala ta kona ta vagadhi, ni mapilari ya kona ya lomu matlhelweni, ni ligumbagumba la kona, zvi wa hi zva lipimo lin’we ni lezvi zvin’wani. A nyangwa leyo ni ligumbagumba la kona zvi wa hi ni majanela ka tlhelo gin’we ni gin’wani. Yi wa hi ni 50 wa mikono a kuleha, ni 25 wa mikono a kuanama.
34 A ligumbagumba la kona li wa cuwukene ni tsendzele wa lahandle, niku ku wa hi ni mifananiso ya micindzu yi nga kehlilwe ka mapilari ya yona ya mambiri ya lomu matlhelweni, ni 8 wa zvikadha zva ku kandziha hi zvona.
35 Hi kulandzela, i no ndzi yisa nyangweni ya le n’walungu,+ a yi pima; yi wa hi ni lipimo lo fana ni la leti tin’wani.
36 A tisala ta kona ta vagadhi, ni mapilari ya kona ya lomu matlhelweni, ni ligumbagumba la kona, zvi wa hi zva lipimo lin’we ni lezvi zvin’wani. Yi wa hi ni majanela matlhelweni ya yona ya mambiri. Yi wa hi ni 50 wa mikono a kuleha, ni 25 wa mikono a kuanama.
37 A mapilari ya yona ya lomu matlhelweni ma wa cuwukene ni tsendzele wa lahandle. Ku wa hi ni mifananiso ya micindzu yi nga kehlilwe ka mapilari ya yona ya mambiri ya lomu matlhelweni, ni 8 wa zvikadha zva ku kandziha hi zvona.
38 Kusuhani ni mapilari ya lomu matlhelweni ya tinyangwa, ku wa hi ni sala yo gela ka yona yi nga hi ni nyangwa, lomu ku nga hlazvelwa kona a minyikelo ya kuhiswa ya mirumba.+
39 Ka tlhelo gin’we ni gin’wani ga ligumbagumba la nyangwa, ku wa hi ni timeza timbiri laha ku nga dayelwa kona a minyikelo ya kuhiswa ya mirumba,+ ni minyikelo ya ciwonho,+ ni minyikelo ya nandzu.+
40 Hi lahandle ka nyangwa, hi laha ku kandzihiwako hi kona a kuya nyangweni ya le n’walungu, ku wa hi ni timeza timbiri. Ku wa hi ni timeza timbiri kambe ka tlhelo legi gin’wani ga ligumbagumba la nyangwa.
41 Ku wa hi ni mune wa timeza ka tlhelo gin’we ni gin’wani ga nyangwa — 8 wa timeza a ku patsa tontlhe — laha a miphahlo yi nga dayelwa kona.
42 A timeza leto ta mune ta munyikelo wa kuhiswa wa murumba ti wa hi ta maribye yo vatliwa. Ti wa hi ni nkono wun’we ni khihlanya a kuleha, ni nkono wun’we ni khihlanya a kuanama, ni nkono wun’we a kutlakuka. Hehla ka tona, ku wa tlhatekiwa zvibya zva ku daya hi zvona a minyikelo ya kuhiswa ni miphahlo.
43 Ku wa hi ni maprateleira yo anama ku ringana canja ma nga hi ka makhurisi ya lomu ndzeni ma rendzelekela matlhelo wontlhe; ni nyama ya minyikelo yi wa vekiwa timezeni.
44 Hi tlhelo ga lehandle ga nyangwa ya lomu cikari, ku wa hi ni tisala to gela ka tona ta vayimbeleli;+ ti wa hi tsendzeleni wa lomu cikari, kusuhani ni nyangwa ya le n’walungu, ti cuwuka dzongeni. A sala yin’wani yo gela ka yona yi wa hi kusuhani ni nyangwa ya mutsuwuka-gambo, yi cuwuka n’walungu.
45 I te ngalo ka mina: “A sala leyi yo gela ka yona yi cuwukileko dzongeni ya vapristi lava va yimisilweko kasi ku maha mitiro ya lomu tempeleni.+
46 A sala yo gela ka yona yi cuwukileko n’walungu ya vapristi lava va yimisilweko kasi ku maha mitiro ya alati.+ I vana va Zadhoki,+ va humako hi ka vaLevhi lava va yimiselweko a ku tshinela ka Jehovha va mu tirela.”+
47 Hi kulandzela, i no pima a tsendzele wa lomu cikari. Wu wa hi ni 100 wa mikono a kuleha, ni 100 wa mikono a kuanama. Wontlhe a matlhelo ma wa ringana. A alati gi wa hi mahlweni ka tempeli.
48 Andzhako ka lezvo, i no ndzi nghenisa lomu ka ligumbagumba la tempeli,+ a gumesa a pima a mapilari ya lomu matlhelweni ka ligumbagumba. A ga tlhelo gin’we gi wa hi ni ntlhanu wa mikono, ni ga tlhelo legi gin’wani gonawu gi wa hi ni ntlhanu wa mikono. A kuanama ka nyangwa ku wa hi mikono yinharu ka tlhelo gin’we, ni mikono yinharu ka tlhelo legi gin’wani.
49 A ligumbagumba li wa hi ni 20 wa mikono a kuleha, ni 11* wa mikono a kuanama. Zvi wa koteka a ku nghena ka lona hi ku kandziha a zvikadha. Ku wa hi ni timhandze kusuhani ni mapilari ya lomu matlhelweni, gin’we ka tlhelo ni tlhelo.+
Mitlhamuselo ya lahasi
^ Kutani: “sul”.
^ Kutani: “linho”.
^ Hi kukongoma: “lihlanga la ku pima hi lona la 6 wa mikono, nkono ni kuanama ka canja”. Ku wuliwa mikono yo leha. Wona Ap. B14.
^ Hi kukongoma: “yindlu”. A gezu legi gi hundzuluselwa giku “tempeli” ka zvipimo 40-48 loku gi wula miako yontlhe ya laha tempeleni kutani tempeli ha yoce.
^ Kutani: “denga; terraço”.
^ Kuzvilava ku wuliwa le hehla ka khurisi ga sala ya vagadhi.
^ Kutani: “pátio”.
^ Kutani: “norte”.
^ Zvi nga maha na zvi wula ku: “12”.
