Ezekiyeli 43:1-27
43 Hi kulandzela, i no ndzi yisa nyangweni yi cuwukileko mutsuwuka-gambo.+
2 Kwalaho, ndzi no wona a kungangamela ka Nungungulu wa Izrayeli na kuta hi mutsuwuka-gambo,+ ni gezu gakwe gi wa ku khwatsi i guwa ga mati ya ntamu;+ a misava yi no woningelwa hi kungangamela kakwe.+
3 Leci ndzi nga ci wona ci wa fana ni muwoniso lowu ndzi nga wu wonile a cikhati leci ndzi* ngata kasi ku ta lovisa dhoropa, ci ku khwatsi hi leci ndzi nga ci wonile kusuhani ni congo wa Kebhare;+ ndzi nowa lahasi hi nghohe ya mina.
4 Hi kulandzela, a kungangamela ka Jehovha ku no nghena lomu tempeleni* hi nyangwa yi cuwukileko mutsuwuka-gambo.+
5 Makunu a moya wu no ndzi tlakula wu ndzi yisa tsendzeleni* wa lomu cikari, ndzi wona lezvaku a tempeli yi wa tele hi kungangamela ka Jehovha.+
6 Makunu ndzi nozwa a wokari na a wulawula na mina hi lomu tempeleni, niku a wanuna loye i no ta yima tlhelweni ga mina.+
7 I te ngalo ka mina:
“N’wana wa munhu, legi hi gona a wutshamu ga citshamu ca mina ca wuhosi+ ni wutshamu ga ku veka kona a mikondzo ya mina,+ laha ndzi to tshama kona cikari ka vanhu va ka Izrayeli kala kupindzuka.+ A yindlu ya ka Izrayeli yi nga ta ha nyenyezisa a vito ga mina go basa,+ ne vona ne tihosi tabye, hi wubhayi gabye ga moya ni zvirumbi zva tihosi tabye leti ti delweko.
8 Va vekele a cipimbitsi cabye kusuhani ni cipimbitsi ca mina, ni tiaro tabye tlhelweni ga tiaro ta mina, na ku hi ni khurisi ntsena cikari ka mina na vona,+ hi ndlela leyo va nyenyezisa a vito ga mina go basa hi zvilo zvo nyenyeza lezvi va zvi mahileko. Hikwalaho, ndzi no va lovisa zangeni ya mina.+
9 Makunu va wa suse a wubhayi gabye ga moya ni zvirumbi zva tihosi tabye zviya kule na mina, ndzi ta tshama cikari kabye kala kupindzuka.+
10 “Kanilezvi wena n’wana wa munhu, tlhamusela a matshamela ya tempeli ka yindlu ya ka Izrayeli+ kasi vawa tingana hi kota ya zvigoho zvabye,+ niku va wa gondze a planta ya yona.*
11 Loku vawa tingana hi kota ya zvontlhe va zvi mahileko, va tlhamusele a planta ya tempeli, ni maakelwa ya yona, ni tinyangwa ta yona ta ku huma hi tona, ni tinyangwa ta yona ta ku nghena hi tona.+ Va kombe a tiplanta ta yona tontlhe ni zvileletelo zva yona, a tiplanta ta yona ni milayo ya yona. Tsala zvontlhe kuwoneni kabye kasi va fela ku hlayisa a planta ya yona yontlhe ni ku landzela a zvileletelo zva yona.+
12 A nayo wa tempeli hi lowu: A wutshamu gontlhe gi rendzelekeleko a madembele ya citsunga wutshamu go basabasa.+ Ina, lowu hi wona a nayo wa tempeli.
13 “Leti tipimo ta alati hi mikono+ (a nkono wun’we ni wun’wani wu wa tlhatekelwe a lipimo li ringanako a kuanama ka canja).* A tshako ga gona i nkono wun’we a kutlakuka, ni nkono wun’we a kuanama. Matlhelweni ya gona wontlhe, ku na ni ndleve ya palmo* gin’we a kuanama. Legi i tshako ga alati.
14 Kusukela ka tshako gi nga lahasi kala le hehla ka citubhu ca seno hasi mikono yimbiri, niku a kuanama ka ndleve ya cona i nkono wun’we. Kusukela ka citubhu leci ca citsongwani kala ka citubhu leci ca hombe mune wa mikono, niku a kuanama ka ndleve ya cona i nkono wun’we.
15 A kutlakuka ka khumbari ga alati mune wa mikono, na ku hi ni mune wa timhondzo ti humako hi khumbarini ga alati tiya hehla.+
16 A khumbari ga alati i kwadradho: 12 wa mikono a kuleha ni 12 wa mikono a kuanama.+
17 A mune wa matlhelo ya citubhu ma na ni 14 wa mikono a kuleha ni 14 wa mikono a kuanama; a ndleve leyi yi rendzelekeleko i khihlanya ga nkono, ni tshako ga yona i nkono wun’we matlhelweni wontlhe.
“A zvikadha zva alati zvi cuwukile mutsuwuka-gambo.”
18 Makunu i te ngalo ka mina: “N’wana wa munhu, Jehovha, a Hosi ya Hombe, i ngalo: ‘Lezvi zvileletelo zvi faneleko ku landzelwa a cikhati leci a alati gi to akiwa, kasi ku mahela kona a minyikelo ya kuhiswa ya mirumba ni ku n’watsekela nkhata hehla ka gona.’+
19 “‘U ta nyikela a cidhunana ca lomu ntlhambini kota munyikelo wa ciwonho+ ka vapristi va vaLevhi va pswalo wa Zadhoki,+ lava va tshinelako ka mina kasi ku ndzi tirela’, ku wula Jehovha, a Hosi ya Hombe.
20 ‘U ta teka nkhata wo kari wa cona u wu tota ka mune wa timhondzo ta alati, ka mune wa makhona ya citubhu, ni ka ndleve matlhelweni wontlhe, kasi ku gi basisa ka ciwonho ni ku gi mahela muphahlo wa ku kombela ku tsetselelwa zviwonho.+
21 Andzhako ka lezvo, teka a cidhunana ca munyikelo wa ciwonho u ya ci hisa wutshan’wini gi yimisilweko ga tempeli, lahandle ka wutshamu go basa.+
22 Hi siku ga wumbiri, u ta nyikela a mhongo ya yinene kota munyikelo wa ciwonho; va ta basisa a alati ka ciwonho a ku khwatsi hi lezvi va nga gi basisa ka ciwonho hi cidhunana.’
23 “‘A cikhati leci u to mbheta a ku gi basisa ka ciwonho, u ta nyikela a cidhunana ca cinene ca lomu ntlhambini ni yivhu ya matsune ya yinene ya lomu ntlhambini.
24 U ta zvi nyikela ka Jehovha, niku a vapristi va ta zvi chela munyu,+ va zvi nyikela kota munyikelo wa kuhiswa wa murumba ka Jehovha.
25 Hi 7 wa masiku, u ta nyikela a mhongo siku ni siku kota munyikelo wa ciwonho+ zvin’we ni cidhunana ca homu ca lomu ntlhambini ni yivhu ya matsune ya lomu ntlhambini; u ta nyikela zvifuyo zvo kala cisolo.*
26 Hi 7 wa masiku, va ta mahela alati a muphahlo wa ku kombela ku tsetselelwa zviwonho, va gi basisa va tlhela va gi kangula.
27 Loku a masiku lawo ma mbhelile, kusukela ka siku ga wu 8+ zviya mahlweni, a vapristi va ta nyikela a minyikelo ya n’wina* ya kuhiswa ya mirumba ni miphahlo ya kuhlengela* laha alatini niku ndzi ta xalala hi n’wina’,+ ku wula Jehovha, a Hosi ya Hombe.”
Mitlhamuselo ya lahasi
^ Zvi nga maha na zvi wula ku: “a”.
^ Hi kukongoma: “ndlwini”.
^ Kutani: “pátio”.
^ Hi kukongoma: “pime a cikombiso ca yona”.
^ Kutani: “zvo mbhelela”.
^ Yi nga minyikelo ya vanhu.
^ Kutani: “miphahlo ya kurula”. Wona Tlhamuselo wa magezu ya Bhibhiliya.
