Ezekiyeli 6:1-14
6 A mhaka ya Jehovha yi nota kambe ka mina, yi taku:
2 “N’wana wa munhu, hundzuluka u cuwuka a zvitsunga zva Izrayeli u zvi phrofetela.
3 Wula lezvi: ‘N’wina zvitsunga zva Izrayeli, zwanani a mhaka ya Jehovha, a Hosi ya Hombe: Jehovha, a Hosi ya Hombe, i ngalo ka zvitsunga, ni ka zvitsungana, ni ka zvibuka ni ka mikova: “Ndzi ta neha a cipadha ci ta mu vhukela, ndzi lovisa a matshamu ya n’wina yo tlakuka.
4 A maalati ya n’wina ma ta khungumulwa, ni maalati ya n’wina yo hisela ka wona a libani ma ta pandzelelwa.+ Ndzi ta hoxela a zvirumbi zva lava va delweko cikari ka n’wina mahlweni ka zvifananiso zva n’wina zva manyala.*+
5 Ndzi ta hoxela a zvirumbi zva vanhu va ka Izrayeli mahlweni ka zvifananiso zvabye zva manyala, ndzi tlhela ndzi hangalasa a marambu ya n’wina matlhelweni ya maalati ya n’wina.+
6 Ka matshamu wontlhe lawa mu hanyako ka wona, a madhoropa ma ta hahlulwa+ ni matshamu ma tlakukileko ma ta khungumulwa mava marumbi.+ A maalati ya n’wina ma ta khungumulwa ma tlhela ma fayetelwa; a zvifananiso zva n’wina zva manyala zvi ta fuva, a maalati ya n’wina yo hisela ka wona libani ma khungumulwa ni mitiro ya n’wina yi swiyelwa.
7 Lava va delweko va tawa cikari ka n’wina;+ mu ta zvi tiva lezvaku hi mina Jehovha.+
8 “‘“Kanilezvi ndzi ta siya a misalela, hakuva a vokari va n’wina va ta pona cipadha cikari ka matiko a cikhati leci mu to hangalaka cikari ka wona.+
9 Lava va to pona va ta ndzi alakanya cikari ka matiko lawa va to yisiwa ka wona kota tikhumbi.+ Va ta zvi tiva lezvaku ndzi wa pandzilwe mbilu hi kota ya kungatsumbeki ka mbilu yabye laha va nga ndzi fularela+ ni lezvi a mahlo yabye ma mbilukelako a zvifananiso zvabye zva manyala.+ Va tawa tingana va tlhela va hlamukiswa hi zvilo zvontlhe zvo biha ni zvo nyenyeza lezvi va mahileko.+
10 Va ta zvi tiva lezvaku hi mina Jehovha ni lezvaku ndzi wa nga va hlakanisi laha ndzi nga wula ku ndzi ta va nehela a khombo legi.”’+
11 “Jehovha, a Hosi ya Hombe, i ngalo: ‘Bana mandla u ginga lahasi hi nkondzo u tlhela u rila hi kota ya zvilo zvontlhe zvo biha ni zva manyala lezvi zvi mahilweko hi yindlu ya ka Izrayeli, hakuva va ta dawa hi cipadha, ni ndlala ni ntungu.+
12 Loyi a nga kule i ta dawa hi ntungu, ni loyi a nga laha kusuhani i ta dawa hi cipadha; ni wihi loyi a to huluka a zvilo lezvi a sala i tafa hi ndlala. Ndzi ta chulula zanga ya mina yontlhe hehla kabye.+
13 Mu ta zvi tiva lezvaku hi mina Jehovha,+ laha lava va delweko cikari kabye va to mbambamela cikari ka zvifananiso zvabye zva manyala, ni matlhelweni wontlhe ya maalati yabye,+ ni ka zvitsungana zvontlhe zvo tlakuka, ni ka wontlhe a madembele ya zvitsunga, ni lahasi ka tisinya tontlhe to tlhuma, ni lahasi ka madhavi ya tisinya ta hombe lomu va nga maha kona a minyikelo yo nuhela kasi ku rulisa a zvifananiso zvabye zvontlhe zvo nyenyeza.+
14 Ndzi ta nawuluta a canja ga mina gi va vhukela, ni tiko gabye gi ta hahlulwa. Kontlhe lomu va hanyako kona ku ta hahlulwa ku hundza a ciwula ca Dhibla. Va ta zvi tiva lezvaku hi mina Jehovha.’”
Mitlhamuselo ya lahasi
^ A gezu ga ciHebheru gi tirisilweko laha kuzvilava hi gona gin’we ni legi gi wulako a “macimba ya zvihari”. Gi tirisiwa kota gezu ga ku chepeta.
