Ezekiyeli 7:1-27
7 A mhaka ya Jehovha yi nota kambe ka mina, yi taku:
2 “Wena n’wana wa munhu, lezvi hi lezvi Jehovha, a Hosi ya Hombe, a wulako ka tiko ga ka Izrayeli: ‘A kugumesa! A kugumesa ku chikele hehla ka mune wa makhona ya tiko.
3 Makunu a kugumesa ka wena ku chikele. Ndzi ta tsikeleta a zanga ya mina hehla ka wena, ndzi ku lamula hi kuya hi tindlela ta wena u tlhela u ti hlamulela hi kota ya mitiro ya wena yontlhe yo nyenyeza.
4 A tihlo ga mina gi nga ta ku tsetsa ne ndzi nga ta ku zwela wusiwana,+ hakuva ndzi ta neha hehla ka wena a mawuyawuya ya tindlela ta wena u tlhela u tshovela kubava hi kota ya mitiro ya wena yo nyenyeza.+ Mu ta zvi tiva lezvaku hi mina Jehovha.’+
5 “Jehovha, a Hosi ya Hombe, i ngalo: ‘Ma zvi wona! Kata khombo, a khombo go hambana ni wontlhe.+
6 A kugumesa ka chikela; a kugumesa ku ta chikela; kata hehla ka wena. Wa ku wona! Kata.
7 A khati ga wena gi chikele, wena muhanyi wa tiko. Ca chikela cikhati, a siku gi laha kusuhani.+ Ku na ni nyenganyenga lomu zvitsungeni, a ku na migiyo ya kutsaka.
8 “‘Zvezvanyana ndzi ta chulula a khulo ga mina hehla ka wena,+ ndzi tsikeleta a zanga ya mina yontlhe hehla ka wena+ ndzi ku lamula hi kuya hi tindlela ta wena u tlhela u ti hlamulela hi kota ya mitiro ya wena yontlhe yo nyenyeza.
9 A tihlo ga mina gi nga ta ku tsetsa ne ndzi nga ta ku zwela wusiwana.+ Ndzi ta neha hehla ka wena a mawuyawuya ya tindlela ta wena u tlhela u tshovela kubava hi kota ya mitiro ya wena yo nyenyeza. Mu ta zvi tiva lezvaku hi mina Jehovha ndzi mu bako.+
10 “‘Ma gi wona a siku! Ma gi wona, gata!+ A khati ga wena gi chikele; a nhonga yi pfepfile, ni matshandza ma balekile.
11 A tihanyi ti kulile tiva nhonga ya kubiha.+ Ne vona, ne titshomba tabye, ne zvitshungu zvabye ne hambu nduma yabye zvi nga ta pona.
12 A cikhati ci tata, a siku gi ta chikela. Ngha a muxavi a nga tsaki, ni muxavisi a nga tsan’wi, hakuva a zanga yi hehla ka citshungu cabye contlhe.*+
13 Hakuva a muxavisi a nga ta tlhelela petsweni lowu a xavisileko, hambu loku a wutomi gakwe gi ponisiwa, hakuva a muwoniso wu khumba a citshungu contlhe. I hava a to tlhela, niku hi kota ya cihoxo cakwe,* i hava a to ponisa wutomi gakwe.
14 “‘Va bile mpundzu,+ niku vontlhe va longile, kanilezvi i hava a yako yimpini, hakuva a zanga ya mina yi hehla ka citshungu contlhe.+
15 Le handle ku na ni cipadha,+ lomu ndzeni ku na ni ntungu ni ndlala. Ni wihi loyi a nga le handle ka dhoropa i ta dawa hi cipadha; a ndlala ni ntungu zvi ta daya lava va nga lomu dhoropeni.+
16 Lava va ponileko cikari kabye va huluka va taya zvitsungeni, niku a ku khwatsi zvipomba zva lomu nkoveni, a mun’we ni mun’wani i ta rila hi kota ya cigoho cakwe.+
17 A mandla yabye wontlhe ma ta rereka, ni madzolo yabye wontlhe ma ta choma mati.*+
18 Va bohile tisakwa+ va tlhela va khon’wa hi kururumela. Vontlhe va ta wisiwa tingana, niku a tihloko tontlhe ti tava tigwalo.*+
19 “‘Va ta hoxa prata yabye maruweni, ni ouro yabye yi ta va hlamukisa. A prata yabye ni ouro yabye zvi nga ta zvi kota a ku va ponisa sikwini ga zanga ya Jehovha.+ Va* nga ta eneliswa, ne ku tata makhwiri yabye, hakuva a prata yabye ni ouro yabye zvi mahile a cikhunguvanyiso ca ku va gohisa.
20 Va milile matshandza hi kota ya wumbhuri ga zvilo zvabye zva ku ti sasekisa hi zvona va tlhela va maha hi zvona* a zvifananiso zvabye zvo nyenyeza, a zvifananiso zvabye zva manyala.+ Hi cigelo leco, ndzi ta maha lezvaku a prata yabye ni ouro yabye zvi va hlamukisa.
21 Ndzi ta zvi nyikela* canjeni ga vamatiko kota muphango ni ka vakubiha va laha misaveni kota zvilo zvi wutlilweko, niku va ta zvi nyenyezisa.
22 “‘Ndzi ta jikisa a nghohe ya mina ndzi nga va cuwuki;+ vona va ta nyenyezisa a wutshamu ga mina go fihlala,* niku a vaphangi va ta nghena ka gona va gi nyenyezisa.+
23 “‘Maha a machini,*+ hakuva a tiko gi tele hi kulamula ka nkhata,+ ni dhoropa gi tele hi tihanyi.+
24 Ndzi ta neha a tiko ga kubiha a ku hundza wontlhe+ gi ta teka a tiyindlu tabye.+ Ndzi ta fuvisa a matshandza ya lava va ntamu, ni matshamu yabye yo basa ma ta nyenyeziswa.+
25 Laha a kukarateka kabye ku to chikela, va ta hlota kurula kanilezvi ku nga tava kona.+
26 Ku tata khombo hehla ka khombo ni mubiko hehla ka mubiko. A vanhu va ta hlota muwoniso ka muphrofeti,+ kanilezvi a nayo* wu ta n’walala ka mupristi, ni wusungukati gi ta n’walala ka madhota.+
27 A hosi yi tava cirilweni,+ a hosana yi ta kayakaya, ni mandla ya vanhu va tiko ma ta rurumela hi kuchava. Ndzi ta va tlhelisela hi kuya hi tindlela tabye, ndzi va lamulisa zvalezvi va nga lamulisa zvona van’wani. Va ta zvi tiva lezvaku hi mina Jehovha.’”+
Mitlhamuselo ya lahasi
^ Ku nga lezvaku ne lava va xavako petso ne lava va wu xavisako va nga ta vhuneka, hakuva a kuloviswa ku tata hehla ka vontlhe.
^ Zvi nga maha na zvi wula ku: “hi cihoxo cakwe”.
^ Ku nga lezvaku ma ta dona mixixito hi kota ya kuchava.
^ Ku nga lezvaku va ta halula tihloko kota cikombiso ca cirilo.
^ Kutani: “A mihefemulo yabye yi”.
^ Ku nga zvibya zvabye zva ouro ni zva prata.
^ Ku nga prata yabye ni ouro yabye leyi va mahileko hi yona zvifananiso.
^ Zvi nga maha na ku wuliwa a cipandze ca lomu ndzeni nguvhu ca wutshamu go basa ga Jehovha.
^ Ku nga machini ya ku boha hi wona lava va khomilweko.
^ Kutani: “gondziselelo”.