Ezekiyeli 9:1-11
9 Hi kulandzela, i no kanyuluka hi gezu ga hombe tindleveni ta mina, aku: “Vitanani lava va to neha tsayiselelo hehla ka dhoropa, a mun’we ni mun’wani na a hi ni tlhari gakwe ga kulovisa canjeni gakwe!”
2 Ndzi no wona 6 wa vavanuna na vata hi tlhelo ga nyangwa ya le hehla+ yi cuwukeneko ni n’walungu,* a mun’we ni mun’wani na a hi ni nduko yakwe ya ku pfotlosa hi yona canjeni gakwe; cikari kabye, ku wa hi ni wanuna a nga bohile tinguwo ta wukene* na a hi ni linanga la mutsali la ku chela ka lona tinta ciwunwini cakwe; va no nghena va yima tlhelweni ga alati ga kobre.+
3 Hi kulandzela, a kungangamela ka Nungungulu wa Izrayeli+ ku no suka hi laha ku nga tshamile kona, hehla ka makerubhima, kuya laha ka cipimbitsi ca nyangwa ya yindlu.+ I no vitana a wanuna loyi a nga bohile a tinguwo ta wukene, loyi a nga hi ni linanga la mutsali la ku chela ka lona tinta ciwunwini cakwe.
4 Jehovha i te ngalo kakwe: “Fambafamba lomu dhoropeni, fambafamba lomu Jerusalema, u vekela cifungo zvikandzeni zva vanhu lava va nga ni mahika ni ku keta+ hi kota ya zvilo zvontlhe zvo nyenyeza lezvi zvi mahiwako lomu dhoropeni.”+
5 I no byela lava van’wani na ndzi zvizwa, aku: “Mu landzeleni, mu fambafamba lomu dhoropeni mu hlasela. A tihlo ga n’wina gi nga va tsetsi ne mu nga va zweli wusiwana.+
6 Hihiritani a zvikhosana, ni majaha, ni vanhwana,* ni zvivanana ni vavasati va ku bhi.+ Kanilezvi mu nga tshineli ka ni wihi munhu a nga ni cifungo.+ Sangulani hi wutshan’wini ga mina go basa.”+ Hikwalaho, va no sangula hi madhota lawa ma nga hi mahlweni ka yindlu.+
7 I no engeta, aku kabye: “Nyenyezisani yindlu mu tlhela mu tata a mitsendzele hi lava va delweko.+ Fambani!” Hikwalaho, va no huma va ya hlasela vanhu lomu dhoropeni.
8 Laha va nga kari va hlasela, ku no sala mina ndzoce, ndziwa lahasi hi nghohe ndzi rila, ndziku: “O Jehovha, Hosi ya Hombe! Ina u ta lovisa a misalela yontlhe ya ka Izrayeli laha u chululako a khulo ga wena hehla ka Jerusalema ke?”+
9 Hikwalaho, i te ngalo ka mina: “A cigoho ca yindlu ya ka Izrayeli ni ya ka Judha ca hombe a ku hundza mpimo.+ A tiko gi tele hi kuhalatiwa ka nkhata,+ ni dhoropa gi tele hi kukanganyisa.+ Hakuva ve ngalo: ‘Jehovha i tsikile tiko, Jehovha a nga zvi woni.’+
10 Kanilezvi mina, a tihlo ga mina gi nga ta va tsetsa ne ndzi nga ta va zwela wusiwana.+ Ndzi ta neha a mawuyawuya ya ndlela yabye hehla ka hloko yabye.”
11 Hi kulandzela, ndzi no wona a wanuna loyi a nga bohile a tinguwo ta wukene na a hi ni linanga la ku chela ka lona tinta ciwunwini cakwe na a wuya ni gezu, a taku: “Ndzi zvi mahisile zvalezvi u nga ndzi leletelisa zvona.”
