Ka Filemoni 1:1-25
1 Pawule, a cibochwa+ hi kota ya Kristu Jesu, na Timote,+ a makabye wa hina, ka Filemoni, a mutiri-kulori wo randzeka,
2 na Apfiya, a makabye wa hina wa cisati, na Arkipusi,+ a musochwa-kulori, ni ka bandla legi gi nga laha mutini wa wena:+
3 Ngha muva ni tipswalo ni kurula zvi tako hi ka Nungungulu, a Papayi wa hina, ni ka Hosi Jesu Kristu.
4 Ndza bonga Nungungulu wa mina contlhe cikhati ndzi ku kumbukako mikhongelweni ya mina,+
5 hakuva ndzi tshamela kuzwa mahungu ya kukholwa ka wena ni lirandzo leli u nga nalo hi Hosi Jesu ni vobasa vontlhe.
6 Ndzi khongelela lezvaku a kukholwa loku hi hlengelako ku ku kuca a ku tiva zvilo zvontlhe zvo saseka lezvi hi nga nazvo hi kota ya Kristu.
7 Hakuva ndzi tsakile nguvhu ndzi tlhela ndzi chavelelwa laha ndzi ngazwa hi lirandzo la wena, hakuva a timbilu ta vobasa ti tangalisilwe hi wena, makabye.
8 Hi cigelo leco, hambu lezvi ndzi nga ni ntamu wa hombe ka Kristu wa ku ku laya lezvaku u maha lezvi zvi faneleko,
9 ndzi hlawula ku ku khongotela hi kota ya lirandzo, mina Pawule wa cikhosana, ndzi nga cibochwa ka cikhati leci hi kota ya Kristu Jesu.
10 Ndza ku khongotela hi kota ya n’wana wa mina Onesimusi,+ loyi ndzi ngava papayi wakwe+ na ndzi hi paxweni.*
11 A kale i wa nga vhuni nchumu ka wena, kanilezvi zvezvi wa vhuna ka wena ni ka mina.
12 Ndza mu tlhelisa ka wena, ina, yena loyi a nga mbilu ya mina.
13 Ndzi wa lava ku tshama naye a fela ku ndzi tirela wutshan’wini ga wena ka cikhati leci ndzi vhalelweko hi kota ya mahungu ya manene.+
14 Kanilezvi a ndzi lavi ku maha nchumu na u nga ndzi vhumelelangi, kasi a ntiro wa wena wa wunene wu ngavi wa kukurumetwa, kanilezvi wuva wa kuzvirandza.+
15 Kuzvilava hakunene hi zvona zvi nga mu maha a tsutsuma zva cikhatana,* kasi a wuya ka wena a ta tshamela magumo,
16 na a nga ha hi khumbi,+ kanilezvi na a hi wo hundza khumbi, na a hi makabye wo randzeka+ nguvhu ka mina, kanilezvi nguvhunguvhu ka wena, hi nyameni ni le Hosini.
17 Hikwalaho, loku u ndzi wona kota munghana,* mu amukele hi mandla mambiri a ku khwatsi hi loku ku wa hi mina.
18 Ahandle ka lezvo, loku a ku gohele cokari kutani a ku dhevha nchumu, zvi hlayele ka mina.
19 Mina, Pawule, ndza tsala hi canja ga mina wutsumbu: Ndzi ta hakhela — ne a zvizi zvi lava ku ndzi ku byela lezvaku wa ndzi dhevha hambu a wutomi ga wena.
20 Ina, makabye, ngha ndzi amukela a civhuno leco hi ka wena Hosini; tangalisa a mbilu ya mina ka Kristu.
21 Ndza tsumba lezvaku u ta maha lezvi ndzi ku kombelako, hikwalaho ndza ku tsalela na ndzi zvi tiva lezvaku u ta maha zvo hundza ni lezvi ndzi wulako.
22 Ahandle ka lezvo, ndzi longiselele ko tshama kona, hakuva ndza tsumba lezvaku hi kota ya mikhongelo ya n’wina, ndzi ta wuya* ka n’wina.+
23 Epafrasi,+ a cibochwa-kulori ka Kristu Jesu, wa ku rungula,
24 na Marku, na Aristarkusi,+ na Dhemasi,+ na Luka,+ a vatiri-kulori.
25 A tipswalo ta Hosi Jesu Kristu a tive zvin’we ni moya lowu mu wu kombisako.
Mitlhamuselo ya lahasi
^ Hi kukongoma: “machinini”.
^ Hi kukongoma: “hora yin’we”.
^ Hi kukongoma: “muhlengeli”.
^ Kutani: “tlhatlhiswa ndzita”.