Genesisi 16:1-16
-
Hagari na Ixmayeli (1-16)
16 Sarayi, a sati wa Abrama, i wa nga mu pswalelangi vana,+ kanilezvi i wa hi ni nandza ga muGibhite ga ku hi Hagari.+
2 Hikwalaho, Sarayi i no byela Abrama, aku: “Jehovha i ndzi vhalile marumbu kasi ndzi nga pswali vana. Ndzi kombela ku u hlengela masango ni nandza ga mina. Kuzvilava ndzi nga kuma vana hi laha kakwe.”+ Hikwalaho, Abrama i no ingisa lezvi Sarayi a nga wula.
3 Andzhako ka loku Abrama a hanyile a 10 wa malembe tikweni ga Khanani, Sarayi, a sati wakwe, i no teka Hagari, a nandza gakwe ga muGibhite, a mu nyikela ka nuna wakwe, Abrama, ava sati wakwe.
4 Hikwalaho, Abrama i no hlengela masango na Hagari, Hagari a xura nyimba. A cikhati leci Hagari a nga pola lezvaku i na ni nyimba, i no sangula ku chepeta a n’winyi wakwe wa cisati.
5 Hikwalaho, Sarayi i no byela Abrama, aku: “Ndzi xanisiwa hi kota ya wena. Hi mina ndzi nga veka a nandza ga mina cifuveni ca wena, kanilezvi laha gi nga pola lezvaku gi xurile nyimba, gi no sangula ku ndzi chepeta. Jehovha i wa lamule cikari ka mina na wena.”
6 Makunu Abrama i no byela Sarayi, aku: “A nandza ga wena gi mandleni ya wena. Mu mahe ni cihi u ci wonako na ci hi cinene.” Hi kulandzela, Sarayi i no mu gisa mbhinyeto Hagari, Hagari a se mu tsutsuma.
7 Hi ndzhako ka cikhati, a ngilozi ya Jehovha yi no kuma Hagari laha cibukeni ca mati lomu ciwuleni, ku nga cibuka leci ci nga ndleleni ya kuya Xure.+
8 Yiku kakwe: “Hagari, nandza ga Sarayi, uta hi kwihi, kona uya kwihi?” Hagari aku: “Ndzo tsutsuma a n’winyi wa mina, Sarayi.”
9 Hi kulandzela, a ngilozi ya Jehovha yi te ngalo kakwe: “Tlhela ka n’winyi wa wena u ya ti koramisa mahlweni kakwe.”
10 A ngilozi ya Jehovha yi no tlhela yiku: “Ndzi ta andzisa nguvhu a pswalo* wa wena wu tala nguvhu laha ka ku zvi nga koteki a ku wu hlaya.”+
11 A ngilozi ya Jehovha yi no engeta, yiku: “U xurile nyimba niku u ta pswala n’wana wa mufana. Mu chule a ku hi Ixmayeli,* hakuva Jehovha i zwile a hlomulo wa wena.
12 I tava mbongola ya khwati.* A canja gakwe gi ta vhukela vontlhe; ni canja ga vontlhe gi ta mu vhukela. I ta hanya mahlweni ka vontlhe a vamakabye vakwe.”*
13 Hi kulandzela, Hagari i no khongela vitweni ga Jehovha, loyi a nga kari a wulawula naye, aku: “Wena u Nungungulu a wonako”,+ hakuva Hagari i waku: “A ku hakunene ndzi mu wonile laha loyi a ndzi wonako ke?”
14 Hi cigelo leco, a hlowo leyo yi no chuliwa ku Bheera-Lahayi-Royi.* (Yi cikari ka Kadhexe ni Bheredhi.)
15 Makunu Hagari i no mu pswalela mufana Abrama; Abrama i no chula a n’wana wakwe, loyi a nga pswalelwa hi Hagari, aku hi Ixmayeli.+
16 Abrama i wa hi ni 86 wa malembe a cikhati leci Hagari a nga mu pswalela Ixmayeli.
Mitlhamuselo ya lahasi
^ Hi kukongoma: “mbewu”.
^ Zvi wulako ku: “Nungungulu wazwa”.
^ Kutani: “onagro”, li nga lixaka lo kari la timbongola ta khwati. Hambu lezvi a vokari va alakanyako ku i zebra, laha ko khwatsi ku khanyisiwa a moya wa kutifuma.
^ Zvi nga maha na zvi wula ku: “I ta hanya na a vengana ni vontlhe a vamakabye vakwe”.
^ Zvi wulako ku: “hlowo ya Loyi a Hanyako a ndzi wonako”.
