Genesisi 6:1-22
6 Makunu laha a vanhu va nga sangula ku talelana laha misaveni va tlhela va pswala a vanhanyana,
2 a vana va Nungungulu wa lisine*+ va no sangula ku wona lezvaku a vanhanyana va vanhu va sasekile. Hikwalaho, va no teka vontlhe lava va nga va hlawula va maha vasati vabye.
3 Jehovha aku: “A moya wa mina wu nga ta timisela munhu kala kupindzuka,+ hakuva yena i nyama ntsena.* Hikwalaho, a masiku yakwe ma tava* 120 wa malembe.”+
4 Masikwini lawo ni ndzhako ka wona, ku wa hi ni vaNefelime* laha misaveni. Ka cikhati leco, a vana va Nungungulu wa lisine va no simama ku hlengela masango ni vanhanyana va vanhu, niku vona va no va pswalela vana. A vana lavo va wa hi tinhenha ta ntamu ta kaleloko, a vavanuna va nduma.
5 Hi kota ya lezvo, Jehovha i no wona lezvaku a kubiha ka munhu ku wa hi ka hombe laha misaveni ni lezvaku wontlhe a maalakanyo ya mbilu yakwe ma wa bihile contlhe cikhati.+
6 Jehovha i no ti laya hi lezvi a vangileko vanhu laha misaveni, a bayiseka mbilwini yakwe.+
7 Hikwalaho, Jehovha i te ngalo: “Ndzi ta lovisa vanhu lava ndzi va vangileko laha misaveni — a vanhu zvin’we ni zvifuyo, ni zvikokakoka* ni zvivangwa zvi hahako zva matilo — hakuva ndza ti laya hi kuva ndzi zvi vangile.”
8 Kanilezvi Nowa i no kuma thomo mahlweni ka Jehovha.
9 Lawa matimu ya Nowa:
Nowa i wa hi wanuna wo lulama.+ I wa nga hi na nandzu cikari ka vanhu va cikhatini cakwe.* Nowa i no famba na Nungungulu wa lisine.+
10 Hi kufamba ka cikhati, Nowa i nova papayi wa vafana vanharu: Xemi, na Hamu na Jafete.+
11 Kanilezvi a misava yi wa wonhekile mahlweni ka Nungungulu wa lisine niku yi wa tele hi tihanyi.
12 Ina, Nungungulu i no cuwuka misava a wona lezvaku yi wonhekile;+ a vanhu* vontlhe va wa wonhile a tindlela tabye laha misaveni.+
13 Andzhako ka lezvo, Nungungulu i no byela Nowa, aku: “Ndzi bohile ku lovisa nyama yontlhe, hakuva a misava yi tele hi tihanyi hi kota yabye; hikwalaho, ndzi ta va lovisa zvin’we ni misava.+
14 Ti akele taru* hi mapulango ya sinya ya goferi.+ U ta maha tikwartu lomu tarwini u gi bhama hi likatarawu,*+ lomu ndzeni ni lahandle.
15 Gi akise lezvi: A taru gi fanele kuva ni 300 wa mikono* a kuleha, ni 50 wa mikono a kuanama, ni 30 wa mikono a kutlakuka.
16 U ta maha janela ga nkono wun’we a kusukela hehla kasi ku wonekela* lomu tarwini. U ta maha nyangwa ya taru hi laha tlhelweni ga gona.+ U ta gi maha na gi hi ni yindlu ya lahasi, ni andari yo sangula, ni andari ya wumbiri.
17 “Mina ndzi ta neha a vhula ya ndambi+ hehla ka misava kasi yi ta lovisa a nyama yontlhe yi nga lahasi ka matilo leyi yi nga ni moya wa wutomi. Zvontlhe zvi nga laha misaveni zvi ta lova.+
18 Ndza maha civhumelwano na wena; u ta nghena lomu tarwini ni vana va wena, ni sati wa wena, ni vasati va vana va wena.+
19 Niku ka tixaka tontlhe ta zvivangwa zvi hanyako,+ u ta nghenisa zvimbiri-zvimbiri lomu tarwini, matsune ni kati,+ kasi zvi pona zvin’we na wena;
20 ka zvivangwa zvi hahako hi tixaka ta zvona, ni ka zvifuyo hi tixaka ta zvona, ni ka zvikokakoka zvontlhe zva laha misaveni hi tixaka ta zvona, u ta teka zvimbiri-zvimbiri kasi zvi pona.+
21 U fanele ku hlengeletela a tixaka tontlhe ta zvakuga+ u nghena nazvo lomu tarwini kasi zviva zvakuga zva wena ni zva zvihari.”
22 Nowa i no maha zvontlhe lezvi Nungungulu a nga mu leletele. I no zvi mahisa zvalezvo.+
Mitlhamuselo ya lahasi
^ Legi i vingu ga ciHebheru gi wulako tingilozi.
^ Kutani: “hakuva i maha zvilo hi kuya hi nyama”.
^ Kutani: “ndzi ta mu tsika a hanya a”.
^ Kuzvilava zvi wula ku: “vawisi”, ku nga lava va wisako van’wani. Wona Tlhamuselo wa magezu ya Bhibhiliya.
^ Kutani: “zviharana zvo famba hi khwiri”.
^ Hi kukongoma: “ka cizukulwana cakwe”.
^ Hi kukongoma: “nyama”.
^ Hi kukongoma: “bhokisa”. A taru legi gi wa hi ngalava ya hombe yo fana ni bhokisa.
^ Kutani: “bhitume”.
^ Hi ciHebheru i tsóhar. Ahandle ka kuva mbovo yin’we ya ku nghenisa kuwonekela, kutani janela gin’we, zva koteka ku ngha a tsóhar ku hi langwa lo byekela la nkono wun’we a kutlakuka hi tlhelo legi go tlakuka nguvhu.