Habhakuka 1:1-17
1 A ciphrofeto leci muphrofeti Habhakuka* a nyikilweko hi muwoniso:
2 O Jehovha, ndzi ta rila kala rini ndzi kombela ku vhuniwa, kanilezvi u nga ndzizwi?+
Ndzi ta kombela kala rini lezvaku u ndzi tlhatlhisa ka tihanyi, kanilezvi u nga mahi nchumu?*+
3 U ndzi tsikela yini ndzi wona kubiha?
Hikuyini u tsikako vanhu va xanisiwa?
Hikuyini ku nga ni kuphanga ni tihanyi mahlweni ka mina ke?
Kona hikuyini ku talileko a tiholova ni kulwa?
4 A nayo a wa ha hi na ntamu,Niku a ku tshuki ku mahiwa kululama.
Hakuva a vakubiha va randzela vakululama;Hikwalaho, a kululama ka soholotiwa.+
5 “Cuwukani cikari ka matiko, mu chela kota!
Cuwukani hi kuhlamala, mu ku kaye;Hakuva ku ta maheka zvilo masikwini ya n’winaZva ku mu nga ta kholwa hambu loku mu byeliwa.+
6 Hakuva ndza tisa vaKaldheya,+Gi nga tiko ga tihanyi ni go leva.
Va dhumela matshamu yo tala ya misavaKasi va teka miti yo kala yi nga hi yabye.+
7 Va tshisa niku a va tiyeleki.
Va ti yimisela a kululama kabye ni wukosi.+
8 A mahaxi yabye ma tsutsuma nguvhu a ku hundza ni tiyingwe,Ma leva a ku hundza ni mahlolwa ni wusiku.+
A mahaxi yabye ya yimpi maya hi ku haha;A mahaxi yabye mata hi kule nguvhu.
Ma dhumelisa ku khwatsi i gama gi tsutsumelako nyama.+
9 Vontlhe vata na va longile a ku maha tihanyi.+
A tinghohe tabye ti fana ni moya wa cikobani,*+Va wungeletela a tikhumbi a ku khwatsi misava.
10 Va poyila tihosiVa tlhela va hleka tihosana.+
Va hleka matshamu wontlhe ma bhiyelweko;+Va maha rampa hi misava, va ma teka.
11 Va hundza vaya mahlweni a ku khwatsi i moya,Kanilezvi va tava ni nandzu,+Hakuva ve a ntamu wabye va wu kuma ka nungungulu wabye.”*+
12 O Jehovha, kasi wena a wu wa kupindzukeni ke?+
Nungungulu wa mina, Loyi a Basileko wa mina, wena a wufi.*+
O Jehovha, u va yimisile kasi va lamula;Ribye ga mina,+ u va yimisile lezvaku va tsayisa.*+
13 A matihlo ya wena ma basile nguvhu kasi ma wona zvakubiha,U nga ta tsika a kubiha ku simama.+
Makunu, hikuyini u wonako wukanganyisi u nga mahi nchumu,+U miyela loku a wakubiha a mita loyi a lulamileko ku hundza yena?+
14 Hikuyini u mahako munhu a fana ni tinjhanjhi ta lomu bimbini,A fana ni zvikokakoka* zvi kalako zvi nga hi na hosi?
15 Zvontlhe lezvi i* zvi phasa hi cimemba.*
I zvi phasa hi likoka* lakwe,A zvi hlengeleta lomu ka likoka lakwe la tinjhanjhi.
Hikwalaho, wa tsaka nguvhu.+
16 Hikwalaho, i nyikela miphahlo ka likoka lakweNi ku maha miphahlo* ka likoka lakwe la tinjhanjhi;Hakuva hi kota ya zvona a ciavelo cakwe ci nonile,Ni zvakuga zvakwe hi lezvi zva zvinene.*
17 Xana i ta simama ku chululela a likoka lakwe?*
I ta simama ku daya matiko na a nga ma zweli wusiwana ke?+
Mitlhamuselo ya lahasi
^ Kuzvilava zvi wula ku: “Kubharasara ko kufumela”.
^ Kutani: “u nga ndzi hanyisi”.
^ Kutani: “moya wa mutsuwuka-gambo”.
^ Zvi nga maha na zvi wula ku: “a ntamu wabye i nungungulu wabye”.
^ Zvi nga maha na zvi wula ku: “hi nga tafa”.
^ Kutani: “va kawuka”.
^ Kutani: “zviharana zvo famba hi khwiri”.
^ Ku nga vaKaldheya va valala.
^ Kutani: “cilowe; anzol”.
^ Kutani: “juya”.
^ Kutani: “Ni ku tuvikisa musi wa muphahlo”.
^ Hi kukongoma: “zvi chelilweko mafura ma enela”.
^ Zvi nga maha na zvi wula ku: “ku hlomula ciphadha cakwe”.
