Hagayi 1:1-15
1 Hi lembe ga wumbiri ga hosi Dhariyusi, hi hweti ya wu 6, hi siku go sangula ga hweti, a mhaka ya Jehovha yi nota hi nomu wa muphrofeti Hagayi*+ ka Zerubhabheli,+ a n’wana wa Salatiyeli, a govhernadhori wa Judha, ni ka Joxuwa, a n’wana wa Jehozadhaki, a mupristi wa hombe, yi taku:
2 “Jehovha wa mabutho i ngalo: ‘A vanhu lava ve: “A cikhati ca ku aka* a yindlu* ya Jehovha a ci se chikela.”’”+
3 A mhaka ya Jehovha yi nota kambe hi nomu wa muphrofeti Hagayi,+ yi taku:
4 “Xana leci cikhati ca ku tshama tindlwini ta n’wina ti sasekisilweko hi mapulangu, kuveni a yindlu leyi yi hahlukele ke?+
5 Makunu Jehovha wa mabutho i ngalo: ‘Ehleketani khwatsi hi tindlela ta n’wina.
6 Mu byalile zvotala kanilezvi mu tshovela zvi tsongwani.+ Maga kanilezvi a mu xuri. Manwa kanilezvi a mu kolwi. Ma boha tinguwo kanilezvi a mu kufumeli. Loyi a tirako i chela muholo wakwe lomu ka cikhwama co bhoxekela.’”
7 “Jehovha wa mabutho i ngalo: ‘Ehleketani khwatsi hi tindlela ta n’wina.’
8 “‘Kandzihani citsungeni mu ya rwala mapulangu.+ Akani yindlu+ kasi ndzi yi tsakela ndzi tlhela ndzi dhumiswa’,+ ku wula Jehovha.”
9 “‘Mu wa rindzela zvotala kanilezvi mu amukele zvi tsongwani; laha mu nga wuya nazvo kaya, ndzi no zvi buvheta zvi hangalaka.+ Hikuyini?’, ku wula Jehovha wa mabutho. ‘Hakuva a yindlu ya mina yi hahlukele kuveni a mun’we ni mun’we wa n’wina i maha wutsanga-tsanga a hlayisa yindlu yakwe.+
10 Hikwalaho, a matilo le hehla ka n’wina ma vhalile a ndzhokati ya wona, ni misava yi vhalile mihandzu ya yona.
11 Ndzi nehile cihala misaveni, ni zvitsungeni, ni ka timbewu, ni ka vhinyo yiswa, ni ka mafura, ni ka lezvi zvi milako laha misaveni, ni ka vanhu, ni ka zvifuyo, ni ka mitiro yontlhe ya mandla ya n’wina.’”
12 Zerubhabheli,+ a n’wana wa Salatiyeli,+ na Joxuwa, a n’wana wa Jehozadhaki,+ a mupristi wa hombe, ni vontlhe a vanhu lava van’wani va no ingisa a gezu ga Jehovha, a Nungungulu wabye, ni timhaka ta muphrofeti Hagayi, hakuva i wa rumilwe hi Jehovha, a Nungungulu wabye. A vanhu va no sangula ku chava Jehovha.
13 Makunu Hagayi, a cirun’wa ca Jehovha, i no byela vanhu a mahungu lawa, kota lezvi a nga rumilwe hi Jehovha, aku: “‘Ndzi na n’wina’,+ ku wula Jehovha.”
14 Hikwalaho, Jehovha i no vhuxa a moya+ wa Zerubhabheli, a n’wana wa Salatiyeli, a govhernadhori wa Judha,+ ni moya wa Joxuwa,+ a n’wana wa Jehozadhaki, a mupristi wa hombe, ni moya wa vontlhe a vanhu lava van’wani; va nota va ta sangula ku tira lomu ndlwini ya Jehovha wa mabutho, a Nungungulu wabye.+
15 Lezvo zvi mahekile hi siku ga wu 24 ka hweti ya wu 6, hi lembe ga wumbiri ga hosi Dhariyusi.+
Mitlhamuselo ya lahasi
^ Zvi wulako ku: “A pswalilweko Mubuzweni”.
^ Kutani: “aketa”.
^ Kutani: “tempeli”.
