Hagayi 2:1-23
2 Hi siku ga wu 21, ka hweti ya wu 7, a mhaka ya Jehovha yi nota hi nomu wa muphrofeti Hagayi,+ yi taku:
2 “Wutisa Zerubhabheli,+ a n’wana wa Salatiyeli, a govhernadhori wa Judha,+ na Joxuwa,+ a n’wana wa Jehozadhaki,+ a mupristi wa hombe, ni vanhu lava van’wani, uku:
3 ‘Himani a seleko cikari ka n’wina loyi a nga wona a yindlu* leyi ka wudzundzo ga yona ga kale ke?+ Makunu mu yi wonisa kuyini zvezvi? A yi mahisi ku khwatsi a hi nchumu loku yi fananiswa ni leyi ya kale ke?’+
4 “‘Kanilezvi, makunu tiya hlanha wena Zerubhabheli’, ku wula Jehovha; ‘tiya hlanha na wena Joxuwa, n’wana wa Jehozadhaki, a mupristi wa hombe’.
“‘Tiyani hlanha, n’wina vanhu vontlhe va tiko,+ mu tira’, ku wula Jehovha.
“‘Hakuva ndzi na n’wina’,+ ku wula Jehovha wa mabutho.
5 ‘Alakanyani lezvi ndzi nga mu tsumbisa a cikhati mu nga huma hi le Gibhite,+ niku a moya wa mina wu simama cikari ka n’wina.*+ Mu nga chavi.’”+
6 “Hakuva Jehovha wa mabutho i ngalo: ‘Khati gin’we kambe — ndzeni ka cikhatana — ndzi ta tsekatsekisa matilo, ni misava, ni bimbi ni misava yo woma.’+
7 “‘Ndzi ta tsekatsekisa a matiko wontlhe, niku a titshomba ta matiko wontlhe ti ta ta nghena ndlwini leyi.+ Ndzi ta tata a yindlu leyi hi wudzundzo’,+ ku wula Jehovha wa mabutho.
8 “‘A prata ya mina, ni ouro ya mina’, ku wula Jehovha wa mabutho.
9 “‘A wudzundzo ga ha tako ga yindlu leyi gi tava ga hombe a ku hundza legi ga kale’,+ ku wula Jehovha wa mabutho.
“‘Ndzi ta gi nyika kurula a wutshamu legi’,+ ku wula Jehovha wa mabutho.”
10 Hi siku ga wu 24, ka hweti ya wu 9, hi lembe ga wumbiri ga Dhariyusi, a mhaka ya Jehovha yi nota ka muphrofeti Hagayi,+ yi taku:
11 “Jehovha wa mabutho i ngalo: ‘Wutisa vapristi xungetano hi nayo,+ uku:
12 “Loku a munhu a welela nyama yi basileko hi cipetswa ca nguwo yakwe, kanilezvi a nguwo yakwe yi henya a pawa, kutani zvakuga zvi bhikilweko, kutani vhinyo, kutani mafura, kutani tixaka tin’wani ta zvakuga, zvi ta basa ke?”’”
A vapristi va no hlamula, vaku: “Ayeyi!”
13 Hagayi i no wutisa, aku: “Loku a munhu a nga hlazvekangi hi kuva a khumbile a cirumbi,* a gumesa a henya a cin’we ca zvilo lezvi, ci nga ta maha cilo co kala ku hlazveka ke?”+
A vapristi va hlamula, vaku: “Ina, ci ta maha cilo co kala ku hlazveka”.
14 Hikwalaho Hagayi i te: “‘A vanhu lava va tshamisile lezvo, ni tiko legi gi tshamisile lezvo mahlweni ka mina’, ku wula Jehovha, ‘ni mitiro yontlhe ya mandla yabye yi tshamisile lezvo. Zvontlhe lezvi va zvi nyikelako laho a zvi hlazvekangi’.
15 “‘Kanilezvi kusukela nyamutlha ehleketani khwatsi hi mhaka leyi: Na ku nga se vekiwa a ribye gin’we hehla ka gin’wani tempeleni ya Jehovha,+
16 zvini zvi nga kari zvi maheka? Laha a munhu a ngaya ka nhulu ya timbewu na a alakanya ku i ta kuma 20 wa tipimo, i wo kuma 10 basi; ni laha a munhu a ngaya ka muphongolo wa vhinyo kasi ku yakha 50 wa tipimo ta vhinyo, i wo kuma 20 basi.+
17 Ndzi mu bile — yontlhe a mitiro ya mandla ya n’wina — hi moya wo hisa, ni kukuruka,+ ni maralala, kanilezvi i hava ni mun’we wa n’wina a nga hundzuluka a wuya ka mina’, ku wula Jehovha.
18 “‘Ehleketani khwatsi hi mhaka leyi kusukela nyamutlha, siku ga wu 24 ka hweti ya wu 9, ku nga siku legi ku nga zimiwa a ciseketelo ca tempeli ya Jehovha;+ ehleketani khwatsi hi lezvi:
19 Ka ha hi ni mbewu lomu tshaleni* ke?+ A vhina,* ni nkuwu, ni romazeira, ni olivha, a zvi pswalangi mihandzu, a hi zvona ke? Kusukela nyamutlha ndzi ta mu katekisa.’”+
20 A mhaka ya Jehovha yi nota ka Hagayi hi khati ga wumbiri, hi siku ga wu 24 ga hweti,+ yi taku:
21 “Byela Zerubhabheli, a govhernadhori wa Judha, uku: ‘Ndzi ta tsekatsekisa a matilo ni misava.+
22 Ndzi ta khungumula a zvitshamu zva wuhosi zva mifumo, ndzi lovisa a ntamu wa mifumo ya matiko;+ ndzi ta lovisa tikareta ni vakhileli va tona; a mahaxi ni vakhileli va wona va tawa, a mun’we ni mun’wani hi cipadha ca makabye wakwe.’”+
23 “‘Hi siku lego’, ku wula Jehovha wa mabutho, ‘ndzi ta ku teka, wena nandza ga mina Zerubhabheli,+ n’wana wa Salatiyeli’,+ ku wula Jehovha, niku ‘ndzi ta ku maha u fana ni phera ya karimbo, hakuva hi wena ndzi ku hlawulileko’, ku wula Jehovha wa mabutho.”
Mitlhamuselo ya lahasi
^ Kutani: “tempeli”.
^ Zvi nga maha na zvi wula ku: “ni cikhati leci a moya wa mina wu nga yimile cikari ka n’wina”.
^ Kutani: “hi kota ya muhefemulo”. Wona Tlhamuselo wa magezu ya Bhibhiliya.
^ A vhina i sinya leyi yi pswalako mauvha.
^ Kutani: “nkeleni wa timbewu”.
