Hoseya 4:1-19
4 Zwanani a mhaka ya Jehovha, n’wina vanhu va ka Izrayeli,Hakuva Jehovha i na ni mhaka ya ku kecara a vaaki va tiko,+Hakuva a ku na lisine, ne lirandzo li nga mbheliko, hambu wutivi ga Nungungulu tikweni legi.+
2 A kuhlambanya mawunwa, ni kuhemba,+ ni kudaya,+Ni kuyiva ni wubhayi+ zvi hangalakile matlhelweni wontlhe;A kuhalatwa ka nkhata kuya hi ku tlhatamana.+
3 Hikwalaho, a tiko gi ta rila,+Ni vontlhe a vaaki va tiko va ta wondza.A zvihari zva khwati ni zvinyanyani zva tilo,Hambu ni tinjhanjhi ta bimbi, zvi ta lova.
4 “Hambulezvo, ngha ku ngavi ni munhu a phikizako hambu ku kawuka,+Hakuva a vanhu va wena va fana ni lava va phikizanako ni mupristi.+
5 Hikwalaho, u ta khunguvanyeka ni mumu wa ku jaja,Ni muphrofeti i ta khunguvanyeka zvin’we na wena a ku khwatsi hi loku gi hi wusiku.
Ndzi ta miyeta* a mamani wa wena.
6 A vanhu va mina va ta miyetwa, hakuva a ku na wutivi.
Kota lezvi u alileko a wutivi,+Minawu ndzi ta ku ala kasi u nga tiri kota mupristi wa mina;Kota lezvi u nga rivala a nayo wa* Nungungulu wa wena,+Minawu ndzi ta rivala a vana va wena.
7 Laha va nga kari va simama ku tala, va wa engetela ku ndzi wonhela.+
Ndzi ta hundzula a kungangamela kabye kuva tingana.*
8 Vaga a kuwonha ka vanhu va mina,Niku va na ni makangwa hi kugoha kabye.
9 A vanhu ni mupristi va ta humelelwa hi zvalezvi zva zvin’we;Va ta ti hlamulela ka mina hi kota ya tindlela tabye,Niku ndzi ta va nehela a mawuyawuya ya mitiro yabye.+
10 Va taga kanilezvi va nga ta xura.+
Va ta maha wubhayi go tshisa kanilezvi va nga ta tala,+Hakuva va kombile ku a va na mhaka na Jehovha.
11 A wubhayi, ni vhinyo, ni vhinyo yiswaZvi susa mapimo ya ku maha zvazvinene.+
12 A vanhu va mina va kombela wusungukati ka zvifananiso zvabye zva tisinya,Va maha lezvi a nhonga yabye* yi va byelako;Hakuva a moya wa wubhayi wa va hambukisa,Niku a wubhayi gabye gi va maha va ala ku ti koramisa ka Nungungulu wabye.
13 Va maha miphahlo le hehla ka zvitsunga;+Va hisa miphahlo lomu ka zvitsungana,Lomu hasi ka mitule, ni misihani, ni ka tontlhe tisinya ta hombe+Hi kota ya lezvi ti nga ni ndzhuti wa wunene.
Hi zvalezvo zvi mahako a vanhanyana va wena va maha wubhemba,*Ni vakatamwane va wena va maha wubhayi.
14 Ndzi nga ta tsayisa a vanhanyana va wena hi kota ya wubhemba* gabye,Ne a vakatamwane va wena hi kota ya wubhayi gabye.
Hakuva hambu a vavanuna va huma va famba ni zvibhayiVa tlhela va maha miphahlo ni zvibhayi zva tempeli;A vanhu lavo vo kala ku zwisisa+ va ta lova.
15 Hambu lezvi u mahako wubhayi, wena Izrayeli,+Ngha Judha a ngavi ni nandzu.+
Mu ngayi Gilgali+ kutani Bhet-Avhene,+Ne mu nga hlambanyi, muku: ‘A ku khwatsi hi lezvi Jehovha a hanyako!’+
16 Hakuva Izrayeli i na ni kani yo fana ni ya homu ya kati.+
Xana Jehovha i ta va risa a ku khwatsi i yivhana ya matsune ya lomu ka wuriselo gi anamileko ke?
17 Efrayime i ti nghenisele ka zvifananiso.+
Mu tsikeni!
18 A cikhati leci a byala* gabye gi mbhelako,Va maha mabhemba.*
A vafumeli* vakwe va zvi randza nguvhu a zvilo zva tingana.+
19 A moya wu ta mu phutsela* tipapeni ta wona;Va tawa tingana hi miphahlo yabye.”
Mitlhamuselo ya lahasi
^ Kutani: “lovisa”.
^ Kutani: “a gondziselelo ya”.
^ Zvi nga maha na zvi wula ku: “Va hundzulile a kungangamela ka mina kuva tingana”.
^ Kutani: “nhonga yabye ya ku hlahluva hi yona”.
^ Kutani: “wubhejwa”.
^ Kutani: “wubhejwa”.
^ Kutani: “byala ga trigo”.
^ Kutani: “mabhejwa”.
^ Hi kukongoma: “zvitlhangu”.
^ Kutani: “teka”.