Hoseya 6:1-11
6 “Tanani hi tlhelela ka Jehovha,Hakuva i hi phatlulele,+ kanilezvi i ta hi hanyisa.
I hi bayisile, kanilezvi i ta bhandicha zvilondza zva hina.
2 Andzhako ka masiku mambiri, i ta hi hanyisa.
Hi siku ga wunharu, i ta hi vhuxa,Niku hi ta hanya mahlweni kakwe.
3 Hi ta tiva Jehovha, hi ta hlota ku mu tiva hi kutitsitsirita.
A kuhuma kakwe ku tiyile a ku khwatsi kutsuwuka ka gambo;I tata ka hina a ku khwatsi i vhula ya hombe;A ku fana ni vhula yo gumesa yi tsakamisako misava.”
4 “Ndzi ku maha yini, wena Efrayime?
Ndzi ku maha yini, wena Judha?
Hakuva a lirandzo la n’wina li nga mbheliko li fana ni marefu ya ni mixo,Li fana ni ndzhokati leyi yi n’walalako hi cihatla.
5 Hi caleci ci to ndzi maha ndzi va tsema hi ku tirisa vaphrofeti;+Ndzi ta va daya hi magezu ya nomu wa mina.+
Ni kulamulwa ka wena ku ta hatima a ku fana ni kuwonekela.+
6 Hakuva ndzi tsakisiwa hi lirandzo li nga mbheliko,* na ku nga hi miphahlo,Ni ku tiva Nungungulu wutshan’wini ga minyikelo ya kuhiswa ya murumba.+
7 Kanilezvi vona kota vanhu, va tshovile civhumelwano.+
A va tsumbekangi ka mina tikweni gabye.
8 Gileyadhe i dhoropa ga vamahi va zvakubiha,+Gi tele hi mikondzo ya nkhata.+
9 A citshungu ca vapristi ci fana ni zvigevenga zvi tumbelako zvi lavelela vanhu.
Va daya vanhu ruweni ga kuya Xekemi,+Hakuva a mahanyela yabye ma wisa tingana.
10 Ndzi wonile nchumu wo tshisa ka yindlu ya ka Izrayeli.
Efrayime i maha wubhayi lomo;+Izrayeli i ti nyenyezisile.+
11 Wena Judha, u vekelwe cikhati ca kutshovela,Laha ndzi to wuyisa vanhu va mina va khomilweko.”+
Mitlhamuselo ya lahasi
^ Kutani: “wuxinji”.