Isaya 13:1-22
13 A ciphrofeto ca ku vhukela Bhabhuloni,+ leci Isaya+ a n’wana wa Amozi a ci wonileko lomu muwonisweni:
2 “Yimisani a sinya ya cikombiso+ citsungeni ca maribye.
Kanyulukani mu va vitana, mu va tlakusela mandla,Kasi va ta nghena hi tinyangwa ta vahombe.
3 Ndzi layile lava ndzi va yimisileko.*+
Ndzi vitanisile a masochwa ya mina kasi ma ta phofula a zanga ya mina,Lawa ma tsakako na ma tizwa matshandza.
4 Hi nga zwani, a citshungu lomu zvitsungeni!A guwa gabye go khwatsi ga citshungu ca hombe!
Hi nga zwani a gujeguje ya mifumo,Ya matiko ma nga hlengeletana!+
Jehovha wa mabutho wa tlhanganisa a butho kasi gilwa yimpi.+
5 Vata hi le tikweni ga le kule,+Hi le magemeta-musi ya matilo,Jehovha ni matlhari ya zanga yakwe,Kasi ku ta lovisa a misava yontlhe.+
6 Banani huwa hakuva a siku ga Jehovha gi laha kusuhani!
Gata hi ka wa Ntamu Wontlhe gi ta lovisa.+
7 Hikwalaho, a mandla wontlhe ma ta mbhela ntamu,Ni timbilu ta vanhu vontlhe ti ta nyeka hi kuchava.+
8 A vanhu va rurumela hi kuchava.+
Va bhubha, vazwa kubayisa,A ku khwatsi wasati a lun’wako.
Va cuwukana na va chava,A tinghohe tabye na ti karatekile nguvhu.
9 Hi nga wonani! A siku ga Jehovha gata,Gita ni tihanyi, ni khulo, ni zanga yi vhurako,Kasi gi ta hahlula a tiko giva nchumu wo tshisa,+Ni ku hihirita a vawonhi va tiko.
10 Hakuva a tinyeleti ta tilo ni mitlawa ya tona+Ti nga ta humesa a kuwonekela ka tona;A gambo gi ta tsuwuka na gi hi munyama,Ni hweti yi nga ta humesa a kuwonekela ka yona.
11 Ndzi ta tsayisa a misava hi kota ya kubiha ka yona,+Ni wakubiha hi kota ya kugoha kakwe.
Ndzi ta mbheta a matshandza ya lava va ti kulisako,Ndzi bohlisa a kutikukumukisa ka lava va xapi.+
12 Ndzi ta maha munhu a kala nguvhu a ku hundza ni ouro yi hlutilweko,+Ni vanhu va ta kala a ku hundza ni ouro ya Ofira.+
13 Hikwalaho, ndzi ta rurumelisa a matilo;Ni misava yi ta tsekatsekiswa yi suka wutshan’wini ga yona+Hi kota ya khulo ga Jehovha wa mabutho, sikwini ga zanga yakwe yi vhurako.
14 A ku fana ni mhuti yi hlongolisiwako, ni ntlhambi wu nga hava wa ku wu hlengeleta,A mun’we ni mun’wani i ta tlhela ka vanhu vakwe,A mun’we ni mun’wani a tsutsumela tikweni gakwe.+
15 Loyi a to kumiwa i ta tlhaviwa,Ni loyi a to khomiwa i ta wisiwa hi cipadha.+
16 A vanana vabye va ta tsemelelwa mahlweni kabye,+A tiyindlu tabye ti ta phangiwa,Ni vasati vabye va ta pfinyiwa.
17 Ndzi ta va vhuxela a vaMedhi va va vhukela,+Lava va nga khataliko hi prata,Ne va nga tsakisiwiko hi ouro.
18 A mawura yabye ma ta fayetela a majaha;+Va nga ta tsetsa a handzu wa nyimba,Ne hambu ku va mahela wuxinji a vanana.
19 Bhabhuloni, a dzundzekako* nguvhu cikari ka mifumo,+A kusaseka ni wudzundzo ga vaKaldheya,+I ta fana ni Sodhoma ni Gomora, a cikhati leci Nungungulu a nga ma lovisa.+
20 Ku nga ta ha tshuka ku aka munhu ka yena,Ne hambu ku tshama munhu kakwe zvizukulwaneni zvontlhe.+
A muArabhiya a nga ta gwimba a tenda gakwe lomo,Ne ni varisi va nga ta tshama lomo ni mitlhambi yabye.
21 A zvihari zva lomu ciwuleni zvi ta etlela lomo;Ni tiyindlu tabye ti ta tala hi zvikhovha.
A timbhuwu* ti ta tshama lomo,+Ni timbuti ta khwati* ti ta khana lomo.
22 Ku ta zwala a guwa ga zvihari lomu tikhokholeni* takwe,Ni makhanga lomu tindlwini takwe ta wuhosi* to chandza.
A cikhati cakwe ci tshinele, niku a masiku yakwe ma nga ta engetelwa.”+
Mitlhamuselo ya lahasi
^ Hi kukongoma: “a vabasisilweko va mina”.
^ Kutani: “a sasekileko”.
^ Kutani: “avestruzes”.
^ Zvi nga maha na zvi wula ku: “timbuti to fana ni madhimoni”.
^ Kutani: “torres”.
^ Kutani: “palácios”.
