Isaya 21:1-17
21 A ciphrofeto ca ku vhukela ciwula ca bimbi:*+
A khombo gata, gata a ku khwatsi zvingulo zvi swiyelako le dzongeni;*Gata hi le ciwuleni, tikweni go chavisa.+
2 Ndzi wonisilwe a muwoniso wo tshisa:
A mukanganyisi wa kanganyisa,Ni mulovisi wa lovisa.
Kandziha, wena Elami! Randzela, wena Medhi!+
Ndzi ta miyeta miketo yontlhe leyi a yi vangileko.+
3 Hikwalaho, ndzi bayisekile nguvhu.*+
Ndza bhubha,A ku khwatsi wasati a pswalako.
Ndzi karatekile nguvhu laha ka ku a ndzi zvi koti ku ingisa;Ndzi jujekile nguvhu kupima laha ka ku a ndzi zvi koti ku wona.
4 A mbilu ya mina ya bhikitana; ndza rurumela hi kuchava.
A kuphuma loku ndzi nga ku xuva ka ndzi chavisa.
5 Longiselani a meza, mu veketela zvitulo!
Ganani, munwa!+
Sukani, n’wina tihosana, mu tota* a citlhangu!
6 Hakuva Jehovha i ndzi byelile lezvi:
“Famba u ya veka murindzeli kasi a wula lezvi a zvi wonako.”
7 I no wona a kareta ya yimpi yi nga kokiwa hi mahaxi mambiri,Ni kareta ya yimpi ya timbongola,Ni kareta ya yimpi ya makameli.
I no cuwuka nguvhu, a cuwukisisa khwatsi.
8 Andzhako ka lezvo, i no kanyuluka a ku khwatsi i nghala, aku:
“O Jehovha, ndzi yimile laha likhokholeni* gontlhe siku,Ndzi yima laha wutshan’wini ga mina go rindzela ka wusiku gin’we ni gin’wani.+
9 Hi nga wonani lezvi zvi tako:
Vavanuna va khileleko a kareta ya yimpi yi kokiwako hi mahaxi mambiri!”+
I no engeta, aku:
“I wile! Bhabhuloni i wile!+
Zvontlhe a zvifananiso zvi kehlilweko zva vanungungulu vakwe zvi fayetelwe lahasi!”+
10 Mayo, a vanhu va mina va hulilweko!A mihandzu* ya wutshamu ga mina go hulela kona timbewu;+Ndzi mu byelile lezvi ndzi nga zvizwa ka Jehovha wa mabutho, a Nungungulu wa Izrayeli.
11 A ciphrofeto ca ku vhukela Dhuma:*Ku na ni munhu a kanyulukako a ndzi vitana hi le Seyire, aku:+
“Murindzeli, go yini wusiku?
Murindzeli, go yini wusiku?”
12 A Murindzeli a hlamula, aku:
“A mixo yata, ni wusiku gonawu gata.
Loku mu lava ku wutisa, wutisani.
Tanani kambe!”
13 A ciphrofeto ca ku vhukela ciwula:
Mu ta etlela lomu khwatini, lomu ciwuleni,N’wina vaendzi va Dhedhani.+
14 Tanani ni mati mu ta nyika lava va zwako tora,N’wina vaaki va tiko ga Tema,+Tanani ni zvakuga* mu ta nyika lava va tsutsumako.
15 Hakuva va tsutsuma a zvipadha, a cipadha ci hlomulilweko,Ni wura gi kondlilweko, ni xapi ya yimpi.
16 Hakuva Jehovha i ndzi byelile, aku: “Ndzeni ka lembe gin’we, a ku fana ni malembe ya mutiri a tholilweko,* a wudzundzo gontlhe ga Kedhare+ gi ta mbhela.
17 A vakondli va mawura lava va to sala ka tinhenha ta Kedhare va tava va tsongwani, hakuva Jehovha, a Nungungulu wa Izrayeli, i wulile lezvo.”
Mitlhamuselo ya lahasi
^ Zvi nga maha na ku wuliwa a tiko ga Bhabhuloni wa kale.
^ Kutani: “sul”.
^ Hi kukongoma: “a tinyonga ta mina a to ku bayisa”.
^ Kutani: “mu ci tota mafura”.
^ Kutani: “torre”.
^ Hi kukongoma: “n’wana”.
^ Zvi wulako ku: “Ku miyela”.
^ Hi kukongoma: “pawa”.
^ Kutani: “gi hlayilweko khwatsi a ku fana ni lezvi a mutiri a tholilweko a mahako”; ku nga lembe go tala.
