Isaya 3:1-26
3 Hakuva hi nga wonani! A Hosi ya lisine, Jehovha wa mabutho,I ta susa zvontlhe lezvi zvi va vhunako ni lezvi va hanyako hi zvona lomu Jerusalema ni lomu Judha,A zvakuga* zvontlhe ni mati;+
2 A nhenha ni musochwa;A mulamuli ni muphrofeti;+ a muvhumbi ni dhota;
3 A hosana ya ntlawa wa 50 wa vanhu,+ ni wahombe, ni sungukati;A tlhari ya masalamuso ni noyi wo tlhariha.+
4 Ndzi ta yimisa vafana vava tihosana tabye,Va ta fumelwa hi vanhu va timbilu timbiri.*
5 A vanhu va ta xanisana,A mun’we ni mun’wani a xanisa munhu-kuloni.+
A jaha gi ta dhumela a cikhosana,Ni loyi wo chepetiwa i ta vhukela loyi a chaviwako.+
6 A mun’we ni mun’wani i ta khoma a makabye wakwe lomu ndlwini ya papayi wakwe, aku:
“Wena u na ni jasi — maha komandante wa hina.
Fumela a nhulu leyi ya maribye.”
7 Kanilezvi ka siku lego, yena i ta ala, aku:
“Ndzi nga ta bhandicha a zvilondza zva wena;*A ndzi na zvakuga ne tinguwo ndlwini ya mina.
Mu nga ndzi mahi komandante wa vanhu.”
8 Hakuva Jerusalema i ti gumulile,Na Judha i wile,Hakuva va vhukela Jehovha hi magezu ni mitiro;Va mu vhukela kungangameleni kakwe.*+
9 A tinghohe tabye ta va kona.Va huwelela a ciwonho cabye a ku fana ni Sodhoma;+A va zami ku ci fihla.
Khombo ka vona* hakuva va ti nehela khombo ha voce!
10 Byela a vakululama lezvaku zvi ta va fambela khwatsi;Va ta chachazelwa hi lezvi va mahako.*+
11 Khombo ka wakubiha!
I ta welwa hi khombo,Hakuva i ta mahelwa zvalezvi a mandla yakwe ma mahileko!
12 A vanhu va mina va xaniswa hi varangeli vabye,Va fumelwa hi vavasati.
O vanhu va mina, a varangeli va n’wina va mu pepetsekisa,Va mu lahlekisa ndlela.+
13 Jehovha i longile ku wula a mhaka yakwe;I sukile a yima kasi ku tsema mhaka ya matiko.
14 Jehovha i ta lamula madhota ni tihosana ta vanhu vakwe.
“Mu hisile a civhina,*Niku lezvi mu yiveleko a zvisiwana zvi lomu tindlwini ta n’wina.+
15 Mu tiyisa kuyini ku fayetela a vanhu va minaNi ku sila a tinghohe ta zvisiwana lomu ntshurini ke?”,+ ku wula a Hosi ya Hombe, Jehovha wa mabutho.
16 Jehovha i ngalo: “Kota lezvi a vanhanyana va Ziyoni va ti kulisako,Va fambako na va tlakusile tihloko,*Va xenga hi matihlo yabye, va tlhela va famba hi kutinyanga,Na va vanga guwa hi masindza yabye ya lomu minengeni,
17 Jehovha i taba a hloko ya vanhanyana va Ziyoni hi mathasi.Jehovha i ta funungula a cikandza* cabye ci sala kubaseni.+
18 Ka siku lego, Jehovha i ta susa zvontlhe lezvi va ti sasekisako hi zvona: a masindza,Ni mabhanduleta, ni zvilo zvo ti sasekisa hi zvona zvo khwatsi i hweti,+
19 Ni tiphera ta tindleve,* ni maniya, ni tivhewu,*
20 Ni zva ku sasekisa a hloko, ni masindza ya lomu minengeni, ni bhandi ga lomu cifuveni,Ni mabotori ya tiperfume,* ni zvitshungulo.
21 Ni tiphera ta titiho ni ta tinhovhu,
22 Ni tinguwo ta mubuzo, ni mabhaji, ni majasi, ni tipasta,
23 Ni mawoni* ya mandla,+ ni tinguwo ta wukene,*Ni titurbhanti ni tivhewu.
24 Wutshan’wini ga mafura ya bhalsamu,+ ku tava ni masema yo nuha;Wutshan’wini ga libhandi, ku tava ni lingoti;Wutshan’wini ga misisi yi lukilweko yi saseka, ku tava ni pandla;+Wutshan’wini ga tinguwo to chandza, ku tava ni tinguwo ta tisakwa;+Wutshan’wini ga kusaseka, ku tava ni mapswhapswhati ya kuhiswa hi simbi.
25 A vavanuna va wena va ta wisiwa hi cipadha,Ni tinhenha ta wena ti tawa yimpini.+
26 A tinyangwa ta dhoropa ti tava hlomulweni, ti rila;+Ziyoni i ta tshama lahasi a rila.+
Mitlhamuselo ya lahasi
^ Hi kukongoma: “pawa”.
^ Kutani: “va cicacicako”.
^ Kutani: “Ndzi nga tava muhanyisi wa wena”.
^ Hi kukongoma: “mahlweni ka kungangamela kakwe.”
^ Kutani: “mihefemulo yabye”.
^ Hi kukongoma: “Va taga mihandzu ya zvimaho zvabye”.
^ A civhina i simu ga tisinya leti ti pswalako mauvha.
^ Hi kukongoma: “na va tlakusile nhamu (nkolo)”.
^ Kutani: “cimombo”.
^ Kutani: “tikalavhu”.
^ A tivhewu tinguwo to vangamela ti tiriselwako ku ti fenengeta hloko kutani nghohe.
^ Hi kukongoma: “tiyindlu ta muhefemulo”.
^ Kutani: “linho”.
^ Kutani: “zvibuko”.