Isaya 33:1-24
33 Khombo ka wena mulovisi u kalako u nga se lovisiwa;+Wena mutokometi u kalako u nga se tokometwa!
Laha u to mbheta ku lovisa, u ta lovisiwa.+
Laha u to mbheta ku tokometa, u ta tokometiwa.
2 O Jehovha, hi mahele wuxinji.+
Hi tsumba wena.
Ngha uva woko* ga hina+ mixo ni mixo,Ina, a kuhanyiswa ka hina zvikhatini zva zvikarato.+
3 A mifumo ya tsutsuma loku yizwa a woyonga,
Ni loku u suka u yima a matiko ma hangalaka.+
4 A muphango wa n’wina wu ta hlengeletiwa a ku khwatsi kuhlengeletana ka humbi* yi lambileko;A matiko ma ta ti hoxela hehla ka muphango a ku khwatsi i butho ga humbi.
5 Jehovha i ta tlakusiwa,Hakuva i hanya le hehla-hehla.
I ta tata Ziyoni hi nongameto ni kululama.
6 Hi yena a tiyisako a zvikhati zva wena;A kuhanyisa ka hombe,+ ni wutlhari, ni wutivi, ni kuchava Jehovha+— Hi yona a tshomba yakwe.
7 Hi nga wonani! A tinhenha tabye ta rila lomu ruweni;A zvirun’wa zva kurula zva rila hi civiti.
8 A maruwa ma te cuwe;Lomu tindleleni a ka ha fambi munhu.
I* tshovile a civhumelwano;I tsikile a madhoropa;A nga na mhaka ni munhu wa ku wafa.+
9 A tiko ga rila* ni ku khanyana.
Lebhanoni i wile tingana;+ i bolile.
Xaroni i khwatsi ciwula,Bhaxani na Karmeli va tlhatlheka matluka.+
10 “Makunu ndzi ta suka ndzi yima”, ku wula Jehovha;“Makunu ndzi ta ti tlakusa;+Makunu ndzi ta ti dhumisa.
11 Mu xurile nyimba ya byanyi go woma, mu pswala a tihlanga.
A moya wa n’wina wutsumbu wu ta mu hisa a ku khwatsi i ndzilo.+
12 A matiko ma ta ku khwatsi i mhemba* yi swako.
A ku khwatsi mimizwa yi tsemilweko, ma ta lumekelwa ndzilo maswa.+
13 N’wina lava mu nga kule, ingiselani lezvi ndzi lavako ku maha!
Na n’wina mu tshamako kusuhani, tivani a ntamu wa mina!
14 A vawonhi va le Ziyoni va chava;+A vadhuki* va rurumela hi kuchava, vaku:
‘Himani ka hina wa ku a nga hanya lomu ku vhurako ndzilo?+
Himani ka hina wa ku a nga hanya lomu ka malangavi ma nga timekiko ke?’
15 A munhu loyi a fambako hi kululama contlhe cikhati,+Loyi a wulawulako zvazvinene,+Loyi a alako bhindzu go biha ni ga wukanganyisi,Loyi a mandla yakwe ma alako ku xavelelwa, ma nga ku amukeli,+Loyi a ti vhalako tindleve kasi a ngazwi mabhulo ya ku halata nkhata,A tlhela a vhala a matihlo yakwe kasi a nga woni zvakubiha
16 — I ta hanya ka matshamu ma tlakukileko;A wuchavelo gakwe go tiya* gi tava lomu makhokholeni ya maribye,I ta nyikiwa pawa yakwe,Niku a mati yakwe ma nga ta mbhela.”+
17 A matihlo ya wena ma ta wona a hosi kungangameleni ka yona;
Ma ta wona tiko ga le kule.
18 Mbilwini ya wena, u ta alakanya a* cikhati ca kuchava, uku:
“I kwihi a matsalani?
I kwihi loyi a nga kari a peza a ndzuvo?*+
I kwihi loyi a nga hlayela tikhokhola?”*
19 U nga ta ha wona a vanhu vo kala cichavo,A vanhu lava a lirimi labye li karatako* nguvhu ku li zwisisa,Va lirimi la manghakamela la ku a zvi koteki ku li zwisisa.+
20 Cuwuka Ziyoni, a dhoropa ga mibuzo ya hina!+
A matihlo ya wena ma ta wona Jerusalema kota wutshamu go rula go hanya kona,A tenda gi to kala gi nga rurisiwi.+
A zvikhongwani zva gona zvi nga ta tshuka zvi simuliwa,Ne ni lingoti lin’we la gona li nga ta phewuliwa.
21 Kanilezvi Jehovha, Loyi wa Hombe, i tava lomo,Ava wutshamu ga hina ga micongo ni ga minonga yo anama,Lomu ku nga ngheniko a tingalava to fambisiwa hi makasiyaNi lomu a zvitimela* zva hombe zvi nga hundziko hi kona.
22 Hakuva Jehovha Mulamuli wa hina;+Jehovha hi yena Munyiki wa hina wa nayo;+Jehovha i Hosi ya hina;+Hi yena a to hi hanyisa.+
23 A tingoti ta wena* ti ta nyeseka;Ti nga ta zvi kota ku tiyisa mulingwati ne ku gwimba a tanga.
Ka cikhati leco, ku ta aveliwa a muphango wa hombe;Hambu a zvilima zvi ta teka a muphango wo tala.+
24 A ku na muaki ni mun’we a to: “Ndza babya.”+
A vanhu va akileko lomu tikweni va ta tsetselelwa a cigoho cabye.+
Mitlhamuselo ya lahasi
^ Kutani: “ntamu”.
^ A humbi zviharana zvo fana ni bhandzala.
^ Ku wuliwa a nala.
^ Zvi nga maha na zvi wula ku: “ga woma”.
^ Kutani: “cal”.
^ A vadhuki hi lava va fularelako ni ku vhukela a wukhozeli ga lisine.
^ Kutani: “wuchavelo gakwe wutshan’wini gi tlakukileko”.
^ Kutani: “ehleketa hi”.
^ Kutani: “tributo”, wona laha kaku: “ndzuvo” ka Tlhamuselo wa magezu ya Bhibhiliya.
^ Kutani: “torres”.
^ Hi kukongoma: “li etileko”.
^ Kutani: “mapaketi; tinavhiyo”.
^ Kutani: “ta nala”.