Isaya 44:1-28
44 “Makunu ingisa, wena nandza ga mina Jakobe,Na wena Izrayeli, loyi ndzi ku hlawulileko.+
2 Jehovha,A Mumahi wa wena, Loyi a ku wumbileko,+Loyi a ku vhunileko kusukela lomu khwirini,* i ngalo:
‘U nga chavi, wena nandza ga mina Jakobe,+Na wena Jexuruni,*+ ndzi ku hlawulileko.
3 Hakuva ndzi ta chulula mati hehla ka loyi a zwako tora,*+Ndzi khulungisa micongo lomu ka misava yo woma.
Ndzi ta chulula a moya wa mina hehla ka pswalo* wa wena,+Ni cikatekiso ca mina hehla ka vana va wena.
4 Va ta mila a ku fana ni tisinya cikari ka byanyi go nyuka,+A ku khwatsi tisinya* ti nga mbhirini ya micongo ya mati.
5 A mun’we i taku: “Ndzi lumba Jehovha.”+
A mun’wani i ta ti vitana hi vito ga Jakobe,Ni mun’wani kambe i ta tsala lomu canjeni gakwe, aku: “Ndzi lumba Jehovha.”
I ta ti vitana hi vito ga Izrayeli.’
6 Jehovha,A Hosi ya Izrayeli+ ni Mutlhatlhisi wakwe,+ Jehovha wa mabutho, i ngalo:
‘Hi mina wa kusangula ni wa kugumesa.+
A ku na Nungungulu ahandle ka mina.+
7 Himani a fanako na mina?+
I wa kanyuluke; i wa wule a kustumunya mahlweni ka mina!+
Kusukela loku ndzi yimisile vanhu va kaleloko,Va wa wule zvilo zva ha takoNi lezvi zva ha lavako ku maheka.
8 Mu nga rurumeli,Ne mu nga womi hi kuchava.+
A ndzi rangangi ndzi mu byela ndzi tlhela ndzi mu tivisa na zvi nga se maheka ke?
N’wina mu vakustumunyu va mina.+
Ku na ni mun’wani Nungungulu ahandle ka mina ke?
Ahihi, a ku na gin’wani Ribye;+ a gi kona ndzi gi tivako.’”
9 Vontlhe a vamahi va zvifananiso zvi kehlilweko a hi va nchumu,Ni zvilo zvabye lezvi va zvi randzako nguvhu zvi nga ta vhuna nchumu.+
A ku fana ni vakustumunyu vabye, zvona* a zvi woni nchumu ne a zvi tivi nchumu,+Hikwalaho, lava va zvi mahileko va ta wisiwa tingana.+
10 Himani wa ku i wa ta maha nungungulu kutani cifananiso ca simbi*Co kala bhindzu ke?+
11 Hi nga wonani! Vontlhe a vanghana vakwe va ta wisiwa tingana!+A vameseri vova vanhu basi.
Vontlhe va wa hlengeletane va yima wutshan’wini gabye.
Va ta chavisiwa va wisiwa zvin’we tingana.
12 A mubethi wa tisimbi i betha a simbi laha ka makhala hi feramenta yakwe.
A yi betha hi tihamela,A yi betha hi woko gakwe ga ntamu.+
Andzhako ka lezvo, i sangula kuzwa ndlala a mbhela ntamu,A karala hi lezvi a kalako a nganwi mati.
13 A muvatli i gwimba a lingoti lo pima hi lona, a tsala-tsala mindzhati hi jiji yo pswhuka.
A kehla pulango hi formawu, a gi pima hi kompaso.
I maha cifananiso ca munhu,+Ci saseka a ku khwatsi munhu,Kasi ci tshama lomu ndlwini.*+
14 Ku na ni loyi a ntiro wakwe ku nga ku tsema misedhare.
I hlawula a sinya yo kari, a tule,A yi tsika yi kula zvin’we ni tisinya tin’wani ta khwati.+
I byala a sinya ya loiro, yi kulisiwa hi vhula.
15 Andzhako ka lezvo, yi maha tihunyi leti a munhu a dzivelako hi tona ndzilo,
A teka cipandze ca yona a wora;I dzivela ndzilo a woca tipawa.
Kanilezvi i tlhela a maha hi yona a nungungulu, a mu khozela.
I maha hi yona a cifananiso ci kehlilweko, a ci khizamela.+
16 A khihlanya ga yona i gi hisa laha ndzilweni;Hi khihlanya lego i woca nyama aga a xura.
I tlhela a wora, aku:
“O! A ndzilo lowu a wo ku kufumela!”
17 Kanilezvi a cipandze leci ci seleko i maha hi cona a nungungulu, a cifananiso ci kehlilweko.
I khizama mahlweni ka cona a ci khozela.
I khongela mahlweni ka cona, aku:
“Ndzi ponise, hakuva u nungungulu wa mina.”+
18 A va tivi nchumu, a va zwisisi nchumu,+Hakuva a matihlo yabye ma vhalilwe, a va woni,Ni timbilu tabye a ti na kupimisisa.
19 I hava a ehleketako mbilwini yakwe,Kutani a nga ni wutivi kutani kuzwisisa, aku:
“A khihlanya ga yona ndzi gi hisile laha ndzilweni,Ndzi woca pawa ni nyama laha ka makhala ya kona ndziga.
Makunu ndzi nga teka a cipandze ci seleko ndzi maha cilo ca manyala ke?+
Ndzi nga khozela a cipandze* ca sinya ke?”
20 Iga khuma.
A mbilu yakwe yi kanganyisilweko yi mu hambukisile.
A nga zvi koti ku ti ponisa ha yece,* hambu ku wula ku:
“A hi mawunwa leci ci nga canjeni ga mina ga cinene ke?”
21 “Alakanya timhaka leti, wena Jakobe na wena Izrayeli,Hakuva wena u nandza ga mina.
Hi mina ndzi ku mahileko, niku wena u nandza ga mina.+
O Izrayeli, ndzi nga ta ku rivala.+
22 Ndzi ta vhinya a zvihambunyeto zva wena a ku khwatsi zvi no fenengetwa hi refu,+Ni zviwonho zva wena a ku khwatsi zvi no fenengetwa hi refu go phuma.
Wuya ka mina, hakuva ndzi ta ku tlhatlhisa.+
23 Kanyulukani hi kutsaka, n’wina matilo,Hakuva Jehovha i mahile cokari!
Kanyulukani mu giya, n’wina kueta ka misava!
Kulungelani hi kutsaka, n’wina zvitsunga,+Wena khwati, ni tisinya tontlhe ti nga ka wena!
Hakuva Jehovha i tlhatlhisile Jakobe,A kombisa a wukulu gakwe hehla ka Izrayeli.”+
24 Jehovha, a Mutlhatlhisi wa wena,+Loyi a ku wumbileko kusukela lomu khwirini, i ngalo:
“Hi mina Jehovha, loyi a mahileko a zvilo zvontlhe.
Ndzi tshambulutile a matilo ha ndzoce,+Ndzi andlala ni misava.+
Ndzi wa hi na mani?
25 Ndza thindekisa a zvikombiso zva vaphrofeti va mawunwa.*Hi mina ndzi hundzulako a vavhumbi va ku khwatsi zvipumbu;+Ndzi juja kupima ka titlhari,Ndzi hundzula a wutivi gabye gi maha wupumbu;+
26 Hi mina ndzi mahako a mhaka ya nandza ga mina yi tatiseka,Ndzi tatisa zvontlhe lezvi zvi phrofetilweko hi zvirun’wa zva mina;+Hi mina ndzi wulako hi Jerusalema, ndziku: ‘A vanhu va ta hanya kona’,+
Hi madhoropa ya Judha, ndziku: ‘Ma ta vhuxiwa’,+Ndzi ta vhuxa a marumbi yakwe’;+
27 Hi mina ndzi byelako a mati ya kueta, ndziku: ‘Pswhana,Niku ndzi ta pswhisa a micongo ya wena yontlhe’;+
28 Hi mina ndzi wulako hi Khurusi,+ ndziku: ‘Murisi wa mina;Niku i ta maha kurandza ka mina kontlhe’;+Hi mina ndzi wulako hi Jerusalema, ndziku: ‘I ta aketwa’,
Ni xungetano hi tempeli, ndziku: ‘A ciseketelo ca wena ci ta zimiwa.’”+
Mitlhamuselo ya lahasi
^ Kutani: “cima u pswaliwa”.
^ Zvi wulako ku: “Loyi a lulamileko”. Leci cikhundla ca ku dzundza Izrayeli.
^ Kutani: “ka tiko ga tora”.
^ Hi kukongoma: “mbewu”.
^ Kutani: “choupos”.
^ Ku nga zvifananiso.
^ Kutani: “cifananiso ci nyekisilweko”.
^ Kutani: “lomu ka citempelana”.
^ Kutani: “cipandze ci womileko”.
^ Kutani: “muhefemulo wakwe”.
^ Kutani: “zva lava va wulawulako zvilo zvi nga vhuniko nchumu”.
