Isaya 53:1-12
53 Himani a nga kholwa a zvilo lezvi a zvi zwileko ka hina?*+
Ahati a woko ga Jehovha ke,+ gi wonekelisilwe ka mani?+
2 I ta humelela mahlweni kakwe* a ku khwatsi cidhavana,+ ni ku khwatsi i mutsu tikweni ga cihala.
A nga na miri wo hlamalisa ne kudzundzeka;+Laha hi mu wonako, a miri wakwe a wu hi koki mahlo.*
3 I no chepetiwa a tlhela a nyenyiwa hi vanhu;+I wa hi munhu a nga tiva a kubayisa a tlhela a tiva mababyi.
Zvi wa ku khwatsi a nghohe yakwe yi no fihliwa mahlweni ka hina.*
I no chepetiwa, niku hina a hi chelangi kota hi yena.+
4 Hakunene hi yena a nga rwala a mababyi ya hina,+A tlhela a rwala a kubayisa ka hina.+
Kanilezvi hina hi wa mu wona kota loyi a nga hlomulweni, a bilweko hi Nungungulu ni ku xanisiwa.
5 Kanilezvi i no tlhaviwa+ hi kota ya zvihambunyeto zva hina;+I no gandliwa hi kota ya zvigoho zva hina.+
I no rwala a tsayiselelo kasi hiva ni kurula,+Niku hi hanyisilwe hi kota ya zvilondza zvakwe.+
6 Hontlheni hi wa pepetseka a ku khwatsi hi tiyivhu,+A mun’we ni mun’wani i wa famba hi ndlela ya yena n’winyi;Jehovha i mu rwexile a cigoho ca hina hontlheni.+
7 I no hlokisiwa,+ a vhumela ku xanisiwa,+Kanilezvi a nga vhululangi nomu wakwe.
I no nehiwa a ku khwatsi i yivhana yi gulelwako kudaweni,+A ku fana ni yivhu yi miyelako mahlweni ka vatsemi va woya ga yona,A nga vhululangi a nomu wakwe.+
8 Hi kota ya kuxanisiwa ni kulamuliwa i no susiwa;Himani a to chela kota hi matimu ya cizukulwana cakwe* ke?
Hakuva i tsemilwe tikweni ga vahanyako,+A biwa* hi kota ya zvihambunyeto zva vanhu va mina.+
9 I nyikilwe cilahla* zvin’we ni vakubiha,+A lahliwa ni zviganyi* kufeni kakwe,+Hambu lezvi a nga kala a nga gohangi nchumu*Ne kukhohlisa hi nomu wakwe.+
10 Kanilezvi kuve kurandza ka Jehovha* a ku mu gandla ni ku mu tsika a babya.
Loku u nyikela a wutomi* gakwe kota munyikelo wa nandzu,+I ta wona a pswalo* wakwe, a lehisa a masiku yakwe,+Hi kota yakwe a kurandza ka* Jehovha ku ta maheka.+
11 Hi kota ya kukarateka* i ta zvi wona a tsaka.
Hi wutivi gakwe, a nandza ga mina gi lulamileko+Gi ta neha vanhu vo tala kululameni,+Gi rwala zvigoho zvabye.+
12 Hikwalaho, ndzi ta mu nyika a ciavelo cikari ka vanhu vo tala,I ta avelana muphango ni tinhenha,Hakuva i chululile a wutomi* gakwe kala afa+A hlayiwa zvin’we ni vahambunyeti.+I no rwala zviwonho zva vanhu vo tala,+A tlhela a kombelela a vahambunyeti.+
Mitlhamuselo ya lahasi
^ Zvi nga maha na zvi wula ku: “lezvi hi nga zvizwa”.
^ A “kakwe” loyi ku nga wuliwa ni wihi a zvi wonako kutani Nungungulu.
^ Kutani: “a nga sasekangi zvoza hi mu navela”.
^ Zvi nga maha na zvi wula ku: “I wa ku khwatsi munhu loyi a vanhu va mu fihlelako a tinghohe tabye”.
^ Kutani: “A biwa zva mahati”.
^ Kutani: “ya mahanyela yakwe”.
^ Kutani: “A munhu i ta mu nyika a cilahla cakwe”.
^ Hi kukongoma: “ni munhu wo ganya”.
^ Kutani: “a nga hi na tihanyi”.
^ Kutani: “muhefemulo”.
^ Kutani: “lezvi zvi tsakisako”.
^ Hi kukongoma: “mbewu”.
^ Kutani: “Kanilezvi zvi no mu xalalisa Jehovha”.
^ Kutani: “ya kubayiseka ka muhefemulo wakwe”.
^ Kutani: “muhefemulo”.
