Isaya 56:1-12
56 Jehovha i ngalo:
“Hlayisani a nongameto,+ mu maha zvakululama,Hakuva a kuhanyisa ka mina ku laha kusuhani ni ku chikela,Ni kululama ka mina ku ta wonekeliswa.+
2 Wa tsaka a munhu loyi a mahako lezvo,Ni n’wana wa munhu loyi a namarelako ka zvona,Loyi a hlayisako a sabhadho a nga gi nyenyezisi,+Ni loyi a nga tsikiko a canja gakwe gi maha ca kubiha.
3 A muluveli loyi a tako ka Jehovha a ta mu khozela,+ a nga wuli, aku:‘Hakunene Jehovha i ta ndzi hambanisa ni vanhu vakwe.’
Ni thenwa wu nga wuli, wuku: ‘Mina ndzi sinya yi womileko.’”
4 Hakuva Jehovha i byela a mithenwa leyi yi hlayisako a masabhadho ya mina, leyi yi hlawulako ku maha lezvi zvi ndzi tsakisako yi tlhela yi namarela ka civhumelwano ca mina, aku:
5 “Ndzi ta va akela cialakanyiso ndzi tlhela ndzi va nyika vito lomu ndlwini ya mina ni lomu makhurisini ya mina,Ndzi ta va nyika nchumu wa wunene nguvhu wo hundza a vana va vafana ni vanhanyana.
Ndzi ta va nyika a vito ga kala kupindzuka,Ga ku gi nga ta fuva.
6 A valuveli lava va tako ka Jehovha kasi va ta mu tirela,Ni ku randza a vito ga Jehovha,+Va tlhela va maha malandza yakwe,Vontlhe lava va hlayisako a sabhadho va nga gi nyenyezisi,Ni ku namarela ka civhumelwano ca mina,
7 Vonawu ndzi ta va neha citsungeni ca mina co basa+Ndzi va tsakisa lomu ndlwini ya mina ya mukhongelo.
A minyikelo yabye ya kuhiswa ya murumba ni miphahlo yabye yi ta amukelwa laha alatini ga mina.
Hakuva a yindlu ya mina yi ta vitaniwa ku i yindlu ya mukhongelo ya matiko wontlhe.”+
8 Jehovha, a Hosi ya Hombe, loyi a hlengeletako a vaIzrayeli lava va hangalakileko,+ i ngalo:
“Ndzi ta hlengeleta a van’wani kakwe a ku tsika lava va sinako va hlengeletilwe.”+
9 N’wina zvihari zvontlhe zva khwati, ngonani mu taga,Ina, tanani n’wina zvihari zvontlhe zva khwati.+
10 A varindzeli vakwe zvikhumu,+ a va tivi nchumu.+
Vontlhe timbyana ta timbeveve, a va zvi koti ku wukula.+
Vo hefemuteka, va etlela; va randza ku khudzehela.
11 Vona timbyana ti lambileko,A va eneliswi.
Varisi vo kala ku tiva.+
A mun’we ni mun’wani wabye i famba hi ndlela yakwe;Vontlhe va ti hlotela a bhindzu go kanganyisa, vaku:
12 “Ngonani, ndza haya ndzi ya teka a vhinyo.A hi nweni byala kala hi popiwa.+
A mandziko i ta fana ni nyamutlha, kanilezvi i tava chukwana nguvhu!”
