Isaya 60:1-22
60 “Suka u yima, wena wasati,+ u woninga, hakuva a kuwonekela ka wena ku chikele.
A kungangamela ka Jehovha ka woninga hehla ka wena.+
2 Hakuva a munyama wu ta fenengeta misava,Ni kuphuma ko tshisa ku ta fenengeta matiko;Kanilezvi Jehovha i ta woninga hehla ka wena,Ni kungangamela kakwe ku ta woniwa hehla ka wena.
3 A matiko ma tata kuwonekeleni ka wena,+Ni tihosi+ ti tata kuhatimeni ka kungangamela* ka wena.+
4 Tlakusa a matihlo ya wena u cuwuka matlhelweni ya wena!
Vontlhe va hlengeletene; vata ka wena.
A vafana va wena va chikela na vata hi le kule,+Ni vanhanyana va wena vata na va belekilwe.*+
5 Ka cikhati leco u ta zvi wona u tsaka.+A mbilu ya wena yi ta tlulatlula hi kutsaka, yi nengela nguvhu,Hakuva a titshomba ta bimbi ti ta nehiwa ka wena;Ni titshomba ta matiko ti tata ka wena.+
6 A makameli yo tala nguvhu ma ta fenengeta a tiko ga wena,*A marole ya makameli ya Midhiyani na Efa.+
Vontlhe va le Xebha va tata,Na va rwele a ouro ni hlakati yo nuhela.
Va ta huwelela a kudhumiswa ka Jehovha.+
7 Yontlhe a mitlhambi ya Kedhare+ yi ta hlengeletiwa ka wena.
A tiyivhu ta vamatsune ta Nebhayote+ ti ta ku tirela.
Ti ta nyikelwa laha alatini ga mina, ndzi ti amukela;+Ndzi ta sasekisa a yindlu ya mina yo ngangamela.*+
8 Hi vamani lava va tsutsumako a ku khwatsi marefu,Va ku khwatsi zvipomba zvi purumelako zvihahlweni* zva zvona ke?
9 Hakuva a zvihlale* zvi ta tsumba mina;+A zvitimela* zva Tarxixi zvi rangile,*Na zvi neha a vana va wena hi le kule,+Zvin’we ni prata yabye ni ouro yabye,Ka vito ga Jehovha, a Nungungulu wa wena, ni ka Loyi a Basileko wa Izrayeli,Hakuva i ta ku ngangamelisa.*+
10 A vamatiko va ta aka a makhurisi ya wena,Ni tihosi tabye ti ta ku tirela,+Hakuva ndzi ku bile zangeni ya mina,Kanilezvi wuneneni* ga mina ndzi ta ku mahela wuxinji.+
11 A tinyangwa ta wena ti ta tshama na ti vhululilwe;+Ti nga ta vhaliwa ni mumu kutani ni wusiku,Kasi ku ku nehela a titshomba ta matiko;Ni tihosi tabye ti ta rangela.+
12 Hakuva a tiko ni mufumo lowu wu to kala ku ku tirela wu ta loviswa,Ni matiko ma ta hahlulwa ma ku bhi.+
13 A kungangamela ka Lebhanoni ku tata ka wena,+A junipero, ni freixo, ni kipresi zvi tata zvin’we+Zvi ta sasekisa a wutshamu ga mina go basa.Ndzi ta ngangamelisa a wutshamu ga mikondzo ya mina.+
14 A vana va loyi a nga kari a ku xanisa va tata va ta khizama mahlweni ka wena;Vontlhe lava va nga kari va ku kanyisa va tata va ta khizama mikondzweni ya wena;Va ta ku vitana lezvaku u dhoropa ga Jehovha,A Ziyoni ga Loyi a Basileko wa Izrayeli.+
15 Wutshan’wini gaku u tsikiwa ni ku vengiwa, na ku nga hi na wa ku tsemakanya cikari ka wena,+Ndzi ta ku maha cibuka ca kutikulisa ka kala kupindzuka,A cibuka ca kutsaka zvizukulwaneni zvontlhe.+
16 Kunene u tanwa a masi ya matiko,+U an’wa a mavele ya tihosi;+Niku hakunene u ta zvi tiva lezvaku mina Jehovha ndzi Muhanyisi wa wena,Ni lezvaku a Nyamintamu wa Jakobe hi yena a Mutlhatlhisi wa wena.+
17 Wutshan’wini ga kobre ndzi ta neha a ouro;Wutshan’wini ga simbi ndzi ta neha a prata;Wutshan’wini ga sinya ku tava kobre;Wutshan’wini ga maribye ku tava simbi.Ndzi ta yimisa kurula lezvaku kuva vawoneleli va wena,Ni kululama lezvaku kuva varangeli va wena.+
18 Ku nga ta ha zwala a tihanyi lomu tikweni ga wenaNe hambu a kuhahlula ni kulovisa lomu mimbhinganweni ya wena.+
U ta vitana a makhurisi ya wena lezvaku Kuhanyisa+ ni tinyangwa ta wena lezvaku Kudhumisa.
19 Hakuva ka wena, a gambo gi nga ta hava kuwonekela ni hlikanhi,Ni kuwoninga ka hweti ku nga ta ku woningela,Hakuva Jehovha i tava kuwonekela ka wena ka kala kupindzuka,+Ni Nungungulu wa wena i tava kusaseka ka wena.+
20 A gambo ga wena gi nga ta ha pela,Ni hweti ya wena yi nga ta hafa,Hakuva Jehovha i tava kuwonekela ka wena ka kala kupindzuka,+Ni masiku ya wena ya cirilo ma tava ma gumesile.+
21 Vontlhe a vanhu va wena va tava vanhu vo lulama,Va taga a tshomba ya tiko kala kupindzuka.
Vona i hluke legi ndzi gi byalileko,A ntiro wa mandla ya mina,+ kasi ndzi sasekiswa hi wona.+
22 Loyi wa mutsongwani i ta endzeleka ava 1000,Ni loyi wa mutsongwani nguvhu i tava tiko ga ntamu.
Mina Jehovha ndzi ta zvi hatlisisa hi cikhati ca zvona.”
Mitlhamuselo ya lahasi
^ Kutani: “ka kuca”.
^ Kutani: “na va wukarelwe”.
^ Hi kukongoma: “ma ta ku fenengeta”.
^ Kutani: “yo saseka”.
^ Kutani: “mavangeni ya zvihahlo”.
^ Kutani: “sasekisa”.
^ Kutani: “zvata a ku fana ni kusanguleni”.
^ Kutani: “mapaketi; tinavhiyo”.
^ Kutani: “ilhas; zvilundzo zva mati”.
^ Kutani: “tipswalweni”.
