Isaya 65:1-25
65 “Ndzi vhumele ku laviwa hi lava va nga kala va nga wutiseli hi mina;Ndzi vhumele ku kumiwa hi lava va nga kala va nga ndzi laveteli.+
Ndzi te ngalo: ‘Hi mina loyi, hi mina loyi!’, ka tiko legi gi nga kala gi nga khongeli vitweni ga mina.+
2 Gontlhe siku ndzi nawulutile a mandla ya mina ka vanhu va tinhamu to nonoha,+Ka lava va fambako hi ndlela yi nga hiko yinene,+Va landzela maalakanyo ya vona venyi,+
3 Ka vanhu va tshamako hi ku ndzi zangarisa mahlweni ka nghohe ya mina,+Lava va mahako miphahlo lomu masin’wini+ ni ku tuvikisa a musi wa miphahlo lomu ka zvitini.
4 Va tshama lomu zvilahleni,+Va mbheta a wusiku na va hi matshan’wini yo fihlala;*Vaga a nyama ya makhumba,+Ni mingelo yabye yi tele hi muru wa zvilo zvo nyenyeza.*+
5 Ve ngalo: ‘Tshama kwaseyo, u nga tshineli seno ka mina,Hakuva ndzi basile nguvhu a ku hundza wena.’*
Vona i musi wu humako tinhovhini ta mina, a ndzilo wu vhurako a siku gontlhe.
6 Hi nga wonani! Zvi tsalilwe mahlweni ka mina;Ndzi nga ta miyela,Kanilezvi ndzi ta va tlhelisela,+Ina, ndzi ta va tlhelisela hi lipimo li teleko,*
7 Hi kota ya zvigoho zvabye ni zvigoho zva vakokwani vabye”,+ ku wula Jehovha.“Kota lezvi va tuvikisileko a musi wa miphahlo lomu zvitsungeni
Ni ku ndzi rukatela lomu ka zvitsungana,+A ku ranga ndzi ta va pimela a hakhelo yabye yontlhe.”*
8 Jehovha i ngalo:
“A ku khwatsi hi loku ku kumiwa a vhinyo yiswa lomu ka citata ca mauvhaA wokari aku: ‘U nga ci pswhandlasi hakuva ci na ni zvazvinene’,*
Hi zvalezvo ndzi to maha hi kota ya malandza ya mina;Ndzi nga ta ma lovisa wontlhe.+
9 Ndzi ta humesa pswalo* hi ka Jakobe,Ndzi humesa hi ka Judha loyi a toga tshomba ya zvitsunga zva mina;+A vahlawulilweko va mina va taga tshomba ya tiko,Ni malandza ya mina ma ta hanya lomo.+
10 Xaroni+ i tava wuriselo ga tiyivhu,Ni Nkova wa Akora+ wu tava wutshamu ga ku a tihomu ti humulela kona,Ka vanhu va mina lava va ndzi hlotako.
11 Kanilezvi n’wina mu fularela Jehovha,+Mu rivala a citsunga ca mina co basa,+Mu mu longisela meza a nungungulu wa Tinjombo,Mu tata a tikopo hi vhinyo yi jutilweko mu nyika nungungulu wa Dhestino.
12 Hikwalaho, ndzi ta mu nyikela ka cipadha,+N’wentlheni mu ta khizama kasi mu dawa,+Hakuva ndzi mu vitanile, kanilezvi a mu hlamulangi,Ndzi wulawulile, kanilezvi a mu ingiselangi;+Mu no simama ku maha lezvi zvi bihileko mahlweni ka mina,Mu hlawula lezvi zvi nga ndzi tsakisiko.”+
13 Hikwalaho, Jehovha, a Hosi ya Hombe, i ngalo:
“Ma zvi wona! A malandza ya mina ma taga, kanilezvi n’wina mu tava ni ndlala.+
A malandza ya mina ma tanwa,+ kanilezvi n’wina mu tazwa tora.
A malandza ya mina ma ta tsaka,+ kanilezvi n’wina mu tawa tingana.+
14 A malandza ya mina ma ta yimbelela hi kutsaka hi kota ya kuxalala ka mbilu,Kanilezvi n’wina mu ta rila hi kota ya kupandza ka mbilu,Muba tinyandha hi kota ya moya wu tshovekileko.
15 A vito ga n’wina gi ta sala gi hi ciruko cikari ka vahlawulilweko va mina.Jehovha, a Hosi ya Hombe, i ta daya a mun’we ni mun’wani wa n’wina,Kanilezvi a malandza yakwe i ta ma vitana hi vito gin’wani,+
16 Hikwalaho, ni wihi loyi a ti hlotelako a cikatekiso laha misaveniI ta katekisiwa hi Nungungulu wa lisine,*Ni loyi a hlambanyako laha misaveniI ta hlambanya hi Nungungulu wa lisine.*+
Hakuva a zvikarato* zva kale zvi nga ta ha alakanyiwa;Zvi ta fihliwa matihlweni ya mina.+
17 Ma zvi wona! Ndza vanga a matilo maswa ni misava yiswa;+A zvilo zva kale zvi nga ta ha alakanyiwa,Ne hambu ku wuya lomu mbilwini.+
18 Hikwalaho, tsakani mu kulungela kala kupindzuka hi kota ya lezvi ndzi zvi vangako.
Ndza vanga Jerusalema ava cibuka ca kutsaka,Ni vanhu vakwe vava cibuka ca mikulungwani.+
19 Ndzi ta tsakela Jerusalema, ndzi nengela hi vanhu va mina;+Cikari kakwe ku nga ta ha zwala a guwa ga kurila hambu a tihuwa ta kuxaniseka.”+
20 “Laho ku nga ta hava ni cin’wanana ci to hanya masiku ma tsongwani,Ne hambu a cikhosana ci to kala ku hanya wontlhe a masiku ya cona.
Hakuva loyi a tofa na a hi ni 100 wa malembe i ta wuliwa lezvaku i n’wanana,Ni muwonhi i ta rukatelwa hambu loku a hi ni 100 wa malembe.*
21 Va ta aka tiyindlu va tshama ka tona,+Niku va ta byala zvivhina* vaga a mihandzu ya zvona.+
22 Va nga ta aka tiyindlu kasi a van’wani va tshama ka tona,Ne va nga ta byala tisinya kasi a van’wani vaga.
Hakuva a masiku ya vanhu va mina ma ta fana ni masiku ya tisinya,+Ni vahlawulilweko va mina va ta ti buza hi kumbhelela hi ntiro wa mandla yabye.
23 Va nga ta ti tsitsirita mahala,+Ne hambu ku pswala vana kasi va wela khombyeni,Hakuva vona va tava pswalo* wu katekisilweko hi Jehovha,+Zvin’we ni vana vabye.+
24 Hambu loku va nga se vitana, ndzi ta hlamula;Ni loku va ha wulawula, ndzi ta vazwa.
25 A hlolwa ni yivhana zvi taga zvin’we;A nghala yi taga byanyi a ku fana ni homu,+Ni nyoka yi taga a ntshuri.
Zvi nga ta lamata ne hambu ku goha nchumu lomu citsungeni ca mina contlhe co basa”,+ ku wula Jehovha.
Mitlhamuselo ya lahasi
^ Zvi nga maha na zvi wula ku: “ka zviyindlwana zva varindzeli”.
^ Kutani: “zvilo zvi nga hlazvekangiko”.
^ Zvi nga maha na zvi wula ku: “Hakuva ndzi ta ku thapelisa a kubasa ka mina”.
^ Hi kukongoma: “zvifuveni zvabye”.
^ Hi kukongoma: “ndzi ta va pimela zvifuveni zvabye”.
^ Hi kukongoma: “ci na ni cikatekiso”.
^ Hi kukongoma: “mbewu”.
^ Kutani: “kutsumbeka”. Hi kukongoma: “Amen”.
^ Kutani: “kutsumbeka”. Hi kukongoma: “Amen”.
^ Kutani: “kukarateka”.
^ Zvi nga maha na zvi wula ku: “Ni loyi a to kala ku chiketa a 100 wa malembe i ta wuliwa lezvaku i rukatelwe”.
^ A zvivhina masimu ya tisinya leti ti pswalako mauvha.
^ Hi kukongoma: “mbewu”.