Isaya 66:1-24
66 Jehovha i ngalo:
“A matilo citshamu ca mina ca wuhosi, ni misava cikhegetelo ca mikondzo ya mina.+
Makunu i yindlu muni ya ku mu nga ndzi akela?+Kona gi kwihi a wutshamu ga mina ga ku humula ka gona?”+
2 “A canja ga mina gi mahile zvontlhe a zvilo lezvi,Hikwalaho, zvontlhe lezvi zvi nova kona”, ku wula Jehovha.+
“Loyi ndzi to mu cuwuka hi loyi:Loyi a ti koramisako, a nga ni moya wu tshovekileko, a rurumelako* hi mhaka ya mina.+
3 Loyi a dayako a homu i fana ni loyi a dayako munhu.+
Loyi a mahako muphahlo hi yivhu i fana ni loyi a tshovako nhamu ya mbyana.+
Loyi a humesako a cinyikiwo i fana ni loyi a nyikelako a nkhata wa khumba!+
Loyi a mahako munyikelo wa hlakati yo nuhela kota cialakanyiso+ i fana ni loyi a katekisako hi magezu ya wuloyi.*+
Va hlawulile a tindlela ta vona venyi,Va tsaka* hi zvilo zva manyala.
4 Hikwalaho, ndzi ta hlawula lezvi ndzi to va tsayisisa zvona,+Ndzi neha hehla kabye a zvilo zvalezvi va zvi chavako.
Hakuva a cikhati leci ndzi nga vitana, i hava a nga hlamula;A cikhati ndzi nga wulawula, i hava a nga ingisela.+
Va no simama ku maha lezvi zvi bihileko mahlweni ka mina,Va hlawula ku maha lezvi zvi nga ndzi tsakisiko.”+
5 Hi nga zwani a mhaka ya Jehovha, n’wina lava mu rurumelako* hi mhaka yakwe:
“A vamakabye va n’wina lava va mu vengako va tlhela va mu hlongola hi kota ya vito ga mina, va te ngalo: ‘Jehovha i wa dhumiswe!’+
Kanilezvi Nungungulu i ta woneka a mu nehela kutsaka,Vona va ta wisiwa tingana.”+
6 Ku zwala a guwa ga gujeguje lomu dhoropeni, a guwa gi tako hi lomu tempeleni!
I guwa ga Jehovha a tlheliselako valala vakwe lezvi zvi va ringanako.
7 Na a nga se lun’wa, i no phuluka,+
Na a nga sezwa a kubayisa, i no pswala a n’wana wa mufana.
8 Himani a tshukileko azwa a zvilo zvo kota lezvo?
Himani a tshukileko a wona lezvo ke?
A tiko gi nga pswaliwa hi siku gin’we ke?
Kutani a lixaka li nga wumbiwa hi citshuketi ke?
Hambulezvo, zvalezvi Ziyoni a nga sangula ku lun’wa i no pswala a vana vakwe.
9 “Mina ndzi tiyelisako a nyimba, zvi nga ndzi tsandza a ku nyika a ntamu wa kupswala ke?”, ku wula Jehovha.
“Kutani mina ndzi vangako a kupswala, ndzi nga tlhela ndzi vhala a marumbu ke?”, ku wula a Nungungulu wa wena.
10 Tsakani ni Jerusalema, mu nengela zvin’we naye,+ n’wina n’wentlhe mu mu randzako.+
Kulungelani mu tsaka nguvhu naye, n’wina n’wentlhe mu mu rilelako,
11 Hakuva mu ta an’wa mu xura maveleni yakwe ya kuchavelela,Mu tanwa kala mu kolwa mu tsakela a kungangamela kakwe ka hombe.
12 Hakuva Jehovha i ngalo:
Ndzi ta mu nehela a kurula ko fana ni congo+Ni kungangamela ka matiko ko fana ni congo wu hlatako.+
Mu ta an’wa, mu belekiwa,*Mu tlhela mu tlakuliwa lomu madzolweni.
13 A ku fana ni mamani a chavelelako* a n’wana wakwe,+Ndzi ta simama ku mu chavelela;Hi kota ya Jerusalema mu ta chavelelwa.+
14 Mu ta zvi wona, a mbilu ya n’wina yi tsaka;A marambu ya n’wina ma tava ni ntamu a ku fana ni byanyi go nyuka.
A canja* ga Jehovha gi ta tiviwa hi malandza yakwe,Kanilezvi i ta zangarela a valala vakwe.”+
15 “Hakuva Jehovha i tata a ku khwatsi i ndzilo,+Niku a tikareta takwe ti fana ni cingulo,+Kasi a ta ti photela hi zanga yakwe yo tshisa,A kawuka hi malangavi ya ndzilo.+
16 Hakuva Jehovha i ta lamula hi ndzilo,Ina, i ta lamula a nyama* yontlhe hi cipadha cakwe;Lava va to dawa hi Jehovha va tava vanyingi.
17 “Lava va ti hlazvako va ti basisa kasi va nghena lomu tijardhim,*+ na va landzela loyi a yimileko laha cikari, lava va gako a nyama ya makhumba,+ ni zvilo zvo nyenyeza, ni makondlo,+ vontlhe va ta lova khatigin’we”, ku wula Jehovha.
18 “Kota lezvi ndzi yi tivako khwatsi a mitiro yabye ni maalakanyo yabye, ndzata kasi ndzi ta hlengeleta a vanhu va matiko wontlhe, ni tirimi tontlhe; va tata va ta wona a kungangamela ka mina.”
19 “Ndzi ta yimisa a cikombiso cikari kabye, niku a vokari ka lava va to huluka, ndzi ta va rumela ka matiko — vaya Tarxixi,+ ni Pule, ni Ludhi,+ a matiko ya vakondli va mawura, ni Tubhale, ni Javhani,+ ni zvihlaleni* zva le kule — lawa ma nga kala kuzwa nchumu hi mina ne ku wona a kungangamela ka mina; va ta huwelela a kungangamela ka mina cikari ka matiko.+
20 Va ta neha a vamakabye va n’wina vontlhe hi matikweni wontlhe+ kota cinyikiwo ka Jehovha, na va khilele mahaxi, ni tikareta, ni tikareta ti fenengetilweko, ni mamula, ni makameli yo tsutsuma, vata citsungeni ca mina co basa, a Jerusalema, a ku khwatsi hi cikhati leci a vaIzrayeli va nga neha a cinyikiwo ndlwini ya Jehovha na ci hi lomu ka zvibya zvo basa”, ku wula Jehovha.
21 “Ndzi ta tlhela ndzi teka vokari ndzi va maha vapristi ni vaLevhi”, ku wula Jehovha.
22 “Hakuva a ku khwatsi hi lezvi a matilo maswa ni misava yiswa,+ lezvi ndzi zvi mahako, zvi to tshama zvi hi kona mahlweni ka mina, a pswalo* wa n’wina ni vito ga n’wina zvonawu zvi ta simama”,+ ku wula Jehovha.
23 “Kusukela ka hweti yiswa kala ka yin’wani, ni kusukela ka sabhadho gin’we kala ka gin’wani,A nyama* yontlhe yi tata yi ta khizama* mahlweni ka mina”,+ ku wula Jehovha.
24 “Va ta huma va wona zvirumbi zva vanhu lava va ndzi hluwukeleko;Hakuva a zviwungwani zvi nga hehla kabye zvi nga tafa,Ni ndzilo wu va hisako wu nga ta timeka.+Va tava nchumu wo nyenyeza ka vanhu* vontlhe.”
Mitlhamuselo ya lahasi
^ Kutani: “a nga ni cichavo”.
^ Zvi nga maha na zvi wula ku: “loyi a dhumisako a cifananiso”.
^ Kutani: “A muhefemulo wabye wa tsaka”.
^ Kutani: “mu nga ni cichavo”.
^ Kutani: “mu wukarelwa”.
^ Kutani: “khongotelako”.
^ Kutani: “ntamu”.
^ Kutani: “vanhu”.
^ Ku nga tijardhim to hlawuleka ti nga tirisiwa kukhozeleni ka zvifananiso.
^ Kutani: “ilhas; zvilundzweni zva mati”.
^ Hi kukongoma: “mbewu”.
^ Kutani: “vanhu”.
^ Kutani: “khozela”.
^ Hi kukongoma: “nyama”.
