Jeremiya 10:1-25
10 Zwanani a mhaka leyi Jehovha a wulako hi n’wina va yindlu ya Izrayeli.
2 Jehovha i ngalo:
“Mu nga gondzi tindlela ta matiko,+Ne mu nga chavisiwi hi zvikombiso zva matiloHi kota ya lezvi a vamatiko va chavisiwako hi zvona.+
3 Hakuva a mahanyela ya vanhu mo kanganyisa ntsena.
A zvifananiso zvabye i sinya ntsena ya lomu khwatini yi tsemilweko,Yi phaphiwa hi mandla ya meseri na a tirisa a feramenta yakwe.+
4 Va zvi sasekisa hi prata ni ouro,+Va zvi tiyisa hi zvipikiri ni hamela kasi zvi ngawi.+
5 A ku fana ni zviphaphiwa lomu sin’wini ga mapepino, a zvifananiso zvabye a zvi wulawuli;+Zvi lava kuya hi ku tlakuliwa hakuva a zvi fambi.+
Mu nga zvi chavi hakuva a zvi na ntamu wa ku neha khombo,Ne hambu ku maha zvazvinene.”+
6 O Jehovha, a nga kona a fanako na wena.+
Wena u wa hombe, ni vito ga wena ga hombe niku gi na ni ntamu.
7 Himani a nga faneliko ku ku chava, wena Hosi ya matiko,+ hakuva zva ku ringana;Hakuva cikari ka tontlhe titlhari ta matiko ni cikari ka yontlhe mifumo yabye,I hava a fanako na wena.+
8 Vontlhe a va pimisi niku zvipumbu.+
A gondziselelo ya sinya yo kanganyisa ntsena.+
9 A prata yi bethilweko yita hi le Tarxixi,+ ni ouro yita hi le Ufazi,Ku nga ntiro wa meseri, wu mahilweko hi mandla ya mubethi wa tisimbi.
A tinguwo tabye ta lihindza la azuli ni woya go pswhuka.
Zvontlhe zvi mahilwe hi vatiri va tlharihileko.
10 Kanilezvi Jehovha i Nungungulu wa lisine.
I Nungungulu a hanyako+ ni Hosi ya pindzukelwa.+
Hi kota ya zanga yakwe a misava yi ta tsekatseka,+Niku a ku na tiko gi to tiyela a khulo gakwe.
11 * Mu ta va byela, muku:
“A vanungungulu lava va nga kala ku maha a matilo ni misavaVa ta lova laha misaveni ni lahasi ka matilo lawa.”+
12 Hi yena a nga maha misava hi ntamu wakwe,Loyi a yimisileko a tiko hi wutlhari gakwe,+Ni loyi a andlalileko a matilo hi kuzwisisa kakwe.+
13 Loku a zwata a gezu gakweA mati le tilweni mo vhindluka;+I maha marefu* ma tlakukela hehla hi le magemeta-musi ya misava.+
I hatimisa a tilo* kasi kuna vhula,A tlhela a neha moya hi lomu matshaleni yakwe.+
14 Vontlhe a va pimisi ne a va tivi.
Vontlhe a vabethi va tisimbi va ta wisiwa tingana hi kota ya zvifananiso zvi kehlilweko;+Hakuva a zvifananiso zvabye zva simbi* mawunwa,Niku a zvi na moya* ndzeni ka zvona.+
15 Zvo kanganyisa ntsena, mitiro ya cihlekiso ntsena.+
Laha gi to chikela a siku ga kulamulwa ka zvona, zvi ta lova.
16 Loyi a nga Ciavelo ca Jakobe i hambene ni zvilo lezvi,Hakuva hi yena a vangileko a zvilo zvontlhe,Izrayeli i nhonga ya tshomba yakwe.+
A vito gakwe hi Jehovha wa mabutho.+
17 Teka a cijumba ca wena lahasi,Wena wasati u randzelweko hi nala.
18 Hakuva Jehovha i ngalo:
“Zvezvi a vahanyi va tiko ndzi lava ku va hoxa kule,*+Ndzi lava ku va vangela hlomulo.”
19 Yowe! Ndzi tshovekile!+
A cilondza ca mina a ci chumeki.
Ndzi te ngalo: “Hakunene legi hi gona a wubabyi ga mina, ndzi fanele ku gi timisela.
20 A tenda ga mina gi hahlulelwe, ni tingoti tontlhe ta tenda ga mina ti phewulelwe.+
A vana va mina va ndzi tsikile, a va ha hi kona.+
A ku salangi munhu wa ku gwimba a tenda ga mina ni ku tlakusa a tinguwo ta gona.
21 Hakuva a varisi va mahile wupumbu,+A va wutisangi Jehovha.+
Hikwalaho, a va mahangi zvilo hi wutlhari,Ni mitlhambi yabye yontlhe yi hangalasilwe.”+
22 Hi nga zwani! Ka chikela mahungu!
I gujeguje yi tako hi le tikweni ga n’walungu,*+Kasi yi ta hahlula a madhoropa ya ka Judha, ma maha wutshamu ga makhanga.+
23 O Jehovha, ndza zvi tiva khwatsi lezvaku a ndlela ya munhu a yi le ntan’wini wakwe.
A zvi le ntan’wini wa munhu a ku rangela a mazambo yakwe.+
24 O Jehovha, ndzi kawuke hi kululama,Kanilezvi na ku nga hi zangeni ya wena,+ kasi u nga ndzi lovisi.+
25 Chulula a zanga ya wena hehla ka matiko lawa ma ku kanyisako,+Ni hehla ka mingango leyi yi nga khongeliko vitweni ga wena.
Hakuva va khadamulile Jakobe,+Ina, va mu khadamulile kala a mbhela a ku bhi,+Niku va hahlulile a tiko gakwe.+
Mitlhamuselo ya lahasi
^ A vs. 11 kusanguleni gi wa tsalilwe hi ciAramaiko.
^ Zvi nga maha na zvi wula ku: “I vhulula tinyangwa”.
^ Kutani: “cikuhe”.
^ Kutani: “zvifananiso zvabye zvi nyekisilweko”.
^ Kutani: “A zvi hefemuli”.
^ Kutani: “ku va phanda hi cipelupelu”.
^ Kutani: “norte”.
