Jeremiya 12:1-17
12 O Jehovha, wena u lulamile+ loku ndzi ku byela a mhaka ya mina,Loku ndzi bhula na wena hi timhaka ta nongameto.
Kanilezvi hikuyini a vakubiha va humelelako ndleleni yabye?+Kona hikuyini a vakanganyisi va hanyako kuruleni?
2 U va byalile va zima timitsu.
Va kulile va pswala mihandzu.
Wena u minon’wini yabye, kanilezvi u kule ni maalakanyo yabye ma etileko.*+
3 Kanilezvi wena Jehovha wa ndzi tiva khwatsi,+ wa ndzi wona;U hlolile a mbilu ya mina u kuma lezvaku yi bohene na wena.+
Va veke hi tlhelo kota tiyivhu ti yako kudaweni,U va vekela a siku ga kudawa.
4 Kasi a tiko gi ta wuna kala rini?Ni byanyi ga masimu wontlhe gi ta woma kala rini ke?+
Hi kota ya kubiha ka lava va tshamako ka gona,A zvihari ni zvinyanyani zvi swiyelwe.
Hakuva va te ngalo: “A nga zvi woni lezvi zvi to hi humelela.”
5 Loku u karala hi ku tsutsuma ni vanhu va tsutsumako hi minenge,U ta palisanisa kuyini ni mahaxi?+
Hambu loku u nga chavi nchumu tikweni ga kurula,U ta kuyini loku u hi khwatini go tlhuma ga Jordhani?
6 Hakuva hambu a vamakabye va wena, a yindlu ya papayi wa wena,Va ku kanganyisile.+
Va ku kuwele.
U nga kholwi kabye,Hambu loku va wulawula zvazvinene na wena.
7 “Ndzi tsikile a yindlu ya mina;+ ndzi tsikile a tshomba ya mina.+
Ndzi nyikele a murandziwa wa mina* canjeni ga valala vakwe.+
8 A tshomba ya mina yi fana ni nghala lomu khwatini.
Yi ndzi bhongele.
Hikwalaho, ndzi no yi nyenya.
9 Ka mina, a tshomba ya mina yi fana ni cinyanyani ca mivalavala ci hanyako hi nyama;A zvinyanyani lezvi zvin’wani zvi hanyako hi nyama zva ci randzela zvi ci dhumela.+
Tanani, hlengeletanani, n’wina n’wentlhe zvihari zva khwati,Tanani mu taga.+
10 A varisi vo tala va dele a civhina* ca mina;+Va kandzihetele a tshomba ya mina.+
Va hundzulile a tshomba ya mina yo saseka yiva ciwula.
11 Yi mahile ciwula.
Yi wunile;*Yi hahlulilwe mahlweni ka mina.+
A tiko gontlhe gi mahile ciwula,Kanilezvi a ku na munhu a nga ni mhaka nazvo.+
12 A valovisi va tile hi tindlela tontlhe* ta lomu ciwuleni,Hakuva a cipadha ca Jehovha ca hlasela kusukela magumo ya tiko kala ka man’wani magumo.+
I hava a nga ni kurula.
13 Va byalile trigo kanilezvi va tshovele mimizwa.+
Va ti karatile mahala.
Va ta wisiwa tingana hi tshovelo wabyeHi kota ya zanga yi vhurako ya Jehovha.”
14 Jehovha i byela vontlhe vaakelani va mina vo biha, lava va khumbako a tshomba leyi ndzi nyikileko a vanhu va mina, a vaIzrayeli,+ aku: “Ndzi ta va tsuwula tikweni gabye;+ ndzi ta tsuwula a yindlu ya Judha cikari kabye.
15 Kanilezvi loku ndzi va tsuwulile, ndzi ta tlhela ndzi va zwela wusiwana, ndzi wuyisa a mun’we ni mun’wani tshombeni yakwe ni tikweni gakwe.
16 “Loku hakunene va gondza a tindlela ta vanhu va mina, va hlambanya hi vito ga mina, vaku: ‘A ku khwatsi hi lezvi Jehovha a hanyako!’, a ku fana ni lezvi va gondzisileko a vanhu va mina a ku hlambanya hi Bhaali, va ta hanya cikari ka vanhu va mina.
17 Kanilezvi loku va nga ingisi, ndzi ta tlhela ndzi tsuwula a tiko lego, ina, ndzi ta gi tsuwula ndzi gi lovisa”, ku wula Jehovha.+
Mitlhamuselo ya lahasi
^ Kutani: “kutizwa kabye ka le ndzeni-ndzeni”. Hi kukongoma: “tiswa”.
^ Kutani: “loyi a randziwako hi muhefemulo wa mina”.
^ A civhina i simu ga tisinya leti ti pswalako mauvha.
^ Zvi nga maha na zvi wula ku: “Ya rila”.
^ Kutani: “hi tindlela tontlhe ti bambatelweko hi misava”.
