Jeremiya 14:1-22
14 Leyi i mhaka ya Jehovha yi tileko ka Jeremiya xungetano hi zvihala,+ yi taku:
2 Judha wa rila,+ ni tinyangwa takwe ti hahlulelwe.
Va rerekile vawa lahasi,Ku zwala a huwa yi tako hi Jerusalema.
3 A tihosi tabye ti ruma a malandza ya tona* ma ya lava mati.
Maya tihloweni,* kanilezvi a ma kumi mati.
Ma wuya ni zvibya zva maphanga.
Mawa tingana ma vhumala ni co maha,Ma fenengeta a tihloko ta wona.
4 Kota lezvi a misava yi womileko,Hi lezvi ku kalako kuna vhula lomu tikweni,+A varimi va karateka, va fenengeta a tihloko tabye.
5 Hambu a mbavala lomu khwatini ya tsika a n’wana wa yona a ha hi ku pswaliwako,Hi ku vhumala byanyi.
6 A timbongola ta khwati ti yima lomu zvitsungeni zva ligwangwa.
Ta hefemutekana a ku khwatsi makhanga;A matihlo ya tona a ma ha woni hakuva a ku na byanyi.+
7 Hambu lezvi a zvigoho zva hina zvi hi konako,O Jehovha, maha cokari hi kota ya vito ga wena.+
Hakuva a mitiro ya hina ya kungatsumbeki yi tele,+Hi ku wonhele.
8 O wena kutsumba ka Izrayeli, a Muhanyisi wakwe+ zvikhatini zva zvikarato,Hikuyini u nge khwatsi u munhu wa matiko tikweni legi,U ku khwatsi u muendzi loyi a nyimako kasi kuxwa wusiku gin’we basi ke?
9 Hikuyini u nge khwatsi u munhu a dzukisilweko,U ku khwatsi u nhenha yi nga zvi kotiko ku ponisa ke?
Hakuva wena Jehovha u cikari ka hina,+Na hina hi vitaniwa hi vito ga wena.+
U nga hi tsiki.
10 Jehovha i wula lezvi xungetano hi vanhu lava: “Va randza ku pepetseka,+ a va khomi a mikondzo yabye.+ Hikwalaho, Jehovha a nga tsakiswi hi vona.+ Makunu i ta alakanya a cigoho cabye, a va lamula hi kota ya zviwonho zvabye.”+
11 Jehovha i te ngalo ka mina: “U nga va khongeleleli zvilo zva zvinene a vanhu lava.+
12 Loku va pfhunga,* a ndzi ingiseli a kukhongotela kabye,+ ni loku va maha a minyikelo ya kuhiswa ya mirumba ni minyikelo ya tindzhoho a yi ndzi tsakisi,+ hakuva ndzi ta va lovisa hi cipadha, ni ndlala, ni ntungu.*+
13 Mina ndzi te ngalo: “O Jehovha, Hosi ya Hombe! A vaphrofeti ve ngalo kabye: ‘Mu nga ta wona cipadha, hambu ni ndlala yi nga ta mu tela, kanilezvi ndzi ta mu nyika kurula ka lisine wutshan’wini legi.’”+
14 Makunu Jehovha i te ngalo ka mina: “A vaphrofeti va phrofeta mawunwa hi vito ga mina.+ A ndzi va rumangi, ne a ndzi va leletelangi, ne hambu ku wulawula navo.+ Lezvi va mu phrofetelako muwoniso wa mawunwa ni kuvhumba ku nga vhuniko nchumu ni mawunwa ya timbilu tabye.+
15 Hikwalaho, xungetano hi vaphrofeti lava va phrofetako hi vito ga mina hambu lezvi ndzi nga kala ku va ruma, ni lava va nge ku nga tava ni cipadha hambu kuva ni ndlala tikweni legi, Jehovha i ngalo: ‘A vaphrofeti lavo va ta dawa hi cipadha ni ndlala.+
16 A vanhu lava va va phrofetelako va ta hoxiwa lomu maruweni ya Jerusalema hi kota ya ndlala ni cipadha. Ku nga tava ni wa ku va lahla+ — vona, ni vasati vabye, ni vafana vabye ni vanhanyana vabye — hakuva ndzi ta va chululela a khombo legi gi va ringanako.’+
17 “Va byele a timhaka leti, uku:‘A matihlo ya mina ma wa khulunge a mihloti, wusiku ni mumu, ma nga nyimi,+Hakuva a nhwana* wa vanhu va mina i pfotlosilwe a tshoviwa,+Ni cilondza cakwe ca tshisa.
18 Loku ndzi huma ndziya lomu masin’wini ndzi cuwuka,Ndzi wona lava va delweko hi cipadha!+
Loku ndzi nghena lomu dhoropeni,Ndzi wona a mababyi ma vangiwako hi ndlala!+
Hakuva a muphrofeti ni mupristi va pepetseka lomu tikweni va nga gi tiviko.’”+
19 Xana Judha u no mu tsikela magumo, kutani ku nyenya Ziyoni ke?+
Hikuyini u hi bileko laha ka kuza zvi nga ha koteki ku hi chumiwa?+
Hi wa rindzela kurula, kanilezvi a ku tangi nchumu wa wunene.Hi wa rindzela cikhati ca kuhanyiswa, kanilezvi kuchava ku nga kona!+
20 O Jehovha, hina ha vhumela a kubiha ka hina,Ni cigoho ca vakokwani va hina,Hakuva hi ku wonhele.+
21 Hi kota ya vito ga wena, u nga hi tsiki;+U nga chepeti a citshamu ca wena ca wuhosi co ngangamela.
Alakanya a civhumelwano leci u mahileko na hina, u nga ci tshovi.+
22 Xana ci kona a cifananiso ci nga vhuniko nchumu ca matiko ci zvi kotako ku nisa vhula ke?Kutani a matilo ma nga zvi kota ku nisa a tivhula ta hombe ha woce ke?
A hi wena wece u mahako lezvo, wena Jehovha, Nungungulu wa hina ke?+
Hi rindzela wena,Hakuva hi wena wece u nga maha zvilo zvontlhe lezvi.
Mitlhamuselo ya lahasi
^ Kutani: “lava va vatsongwani cikari kabye”.
^ Kutani: “mathangini”.
^ Kutani: “mababyi”.
^ Kutani: “jejuwara”.
^ Kutani: “virgem”.
