Jeremiya 15:1-21
15 Jehovha i te ngalo ka mina: “Hambu loku Mosi na Samuweli va wota va ta yima mahlweni ka mina,+ ndzi wa nga ta va zwela wusiwana a* vanhu lava. Va hlongole mahlweni ka mina. Va tsike va famba.
2 Loku vaku: ‘Hi taya kwihi?’ Va byele, uku: ‘Jehovha i ngalo:
“Loyi zvi lavako ku a dawa hi ntungu wu dayako, i ta dawa hi ntungu wu dayako!
Loyi zvi lavako ku a dawa hi cipadha, i ta dawa hi cipadha!+
Loyi zvi lavako ku a dawa hi ndlala, i ta dawa hi ndlala!
Ni loyi zvi lavako ku aya wukhumbini, i taya wukhumbini!”’+
3 “‘Ndzi ta va rumelela a mune wa makhombo’,*+ ku wula Jehovha, ‘a cipadha kasi ku va daya, ni timbyana kasi ku va rorovisela, ni zvinyanyani zva tilo ni zvihari zva laha misaveni kasi ku va khadamula ni ku va lovisa.+
4 Ndzi ta va maha vava nchumu wo tshisa ka yontlhe mifumo ya misava+ hi kota ya lezvi Manase, a n’wana wa Hezekiya, a hosi ya Judha, a nga maha Jerusalema.+
5 Wena Jerusalema, himani a to ku zwela wusiwana?Himani a to ku xanisekela?Kona himani a to yima a wutisa a mavhukela ya wena ke?’
6 ‘U ndzi tsikile’, ku wula Jehovha.+
‘U tshama hi ku ndzi fularela.*+
Hikwalaho, ndzi ta nawuluta a canja ga mina hehla ka wena ndzi ku lovisa.+
Ndzi karele hi ku ku zwela wusiwana.*
7 Ndzi ta va hehera lomu tinyangweni ta tiko.
Ndzi ta va dayela vana vabye.+
Ndzi ta lovisa vanhu va minaKota lezvi va alako ku hundzuluka tindleleni tabye.+
8 A tinoni tabye* ti ta tala nguvhu mahlweni ka mina a ku hundza ni misava ya mabimbi.
Ndzi ta va nehela mulovisi ni mumu, a tela vamamani ni majaha.
Hi citshuketi, ndzi ta va nehela gujeguje ni kuchava.
9 A wasati loyi a pswalileko a 7 wa vana i mbhelile ntamu;I* hefemula hi kukarateka.
Ka yena a gambo gi pelile kuveni ga hi mumu,Zvi mu wisa tingana ni ku mu tsongahata.
‘Lava va va tsongwani va to salaNdzi ta va nyikela ka cipadha mahlweni ka valala vabye’, ku wula Jehovha.”+
10 Yowe, mamawe! U wa ndzi pswalela yini?+Ndzi tshama hi ku holovisana ni kulwa ni tiko gontlhe.
A ndzi pembisangi nchumu ne a ndzi pembangi nchumu wa munhu,Kanilezvi vontlhe va ndzi ruka.
11 Jehovha i te ngalo: “Ndzi ta ku vhuna u humelela;Ndzi ta ku lwela cikhatini ca khombo,Ni cikhatini ca hlomulo laha a nala a to ku vhukela.
12 Xana a munhu a nga zvi kota ku tshoveletela a simbi,A simbi ya le n’walungu* ni kobre ke?
13 Ndzi ta nyikela a zvilo zva wena zva lisima ni titshomba ta wena zvi phangiwa,+Na ndzi nga zvi nyikeli hi mali, kanilezvi hi kota ya zvontlhe zviwonho zva wena lomu tikweni gontlhe ga wena.
14 Ndzi ta zvi nyikela ka valala va wenaVa zvi teka va famba nazvo ka tiko u nga gi tiviko.+
Hakuva a zanga ya mina yi tlhotlhile ndzilo,Lowu wu mu vhurelako.”+
15 O Jehovha, wena wa zvi tiva;Ndzi alakanye u chela kota hi mina.
Ndzi photele ka lava va ndzi xanisako.+
U nga ndzi tsiki ndzi lova* hi lezvi u nonokako ku zangara.
Zvi tive lezvaku ndzi rukiwa hi kota ya wena.+
16 Laha ndzi nga kuma a timhaka ta wena, ndzi no tiga;+A mhaka ya wena yi nova litsako ni kunengela ka mbilu ya minaHakuva ndza vitaniwa hi vito ga wena, O Jehovha, Nungungulu wa mabutho.
17 A ndzi tshami ni lava va randzako ku hlakana ndzi tsaka navo.+
Kota lezvi a canja ga wena gi nga hehla ka mina, ndzi tshama ndzoceHakuva u ndzi tatile hi zanga.*+
18 Hikuyini a kubayisa ka mina ku nga hundziko, ni cilondza ca mina ci nga chumekiko ke?
A ci vhumeli ku hola.
U ta ku khwatsi u cibuka leci ci nga humesiko mati,Leci ci nga tsumbekiko ke?
19 Hikwalaho, Jehovha i ngalo:
“Loku u wuya ndzi ta ku vhuxa,U ta yima mahlweni ka mina.
Loku u hambanisa a zvilo zva lisima ka lezvi zvi nga vhuniko nchumu,U ta ku khwatsi u nomu wa mina.*
Vona va ta wuya ka wena,Kanilezvi wena u nga ta tlhela kabye.”
20 “Ndza ku maha a muro wa kobre wu tiyisilweko khwatsi ka vanhu lava.+
Hakunene va talwa na wena,Kanilezvi va nga ta ku hlula+Hakuva ndzi na na wena kasi ku ku ponisa ni ku ku tlhatlhisa”, ku wula Jehovha.
21 “Ndzi ta ku tlhatlhisa canjeni ga vakubiha,Ndzi ku ponisa mandleni ya vanhu va xapi.”
Mitlhamuselo ya lahasi
^ Kutani: “a muhefemulo wa mina wu wa nga tava ni”.
^ Zvi nga maha na zvi wula ku: “mune wa tixaka ta kulamula”. Hi kukongoma: “mune wa mingango”.
^ Zvi nga maha na zvi wula ku: “U tshama hi ku tlhelela ndzhako”.
^ Kutani: “hi ku ti laya”.
^ Kutani: “A vavasati vabye vo felwa hi vanuna”.
^ Kutani: “A muhefemulo wakwe wu”.
^ Kutani: “norte”.
^ Hi kukongoma: “U nga ndzi susi”.
^ Kutani: “hi mahungu ya zanga”.
^ Kutani: “U tava gezu ga mina”.
