Jeremiya 17:1-27
17 “A ciwonho ca Judha ci tsalilwe hi lapizeri wa simbi.
Ci kehlilwe timbilwini tabye hi muzwa wa dhayimaniNi lomu timhondzweni ta maalati yabye.
2 Hambu a vana vabye va ma alakanya a maalati yabye ni tisinya tabye to basa*+Tlhelweni ga tisinya to tlhuma, lomu ka zvitsungana zvo tlakuka,+
3 Zvitsungeni zva lomu masin’wini.
Ndzi ta nyikela a zvilo zva wena zva lisima ni titshomba tontlhe ta wena zvi phangiwa,+Ina, a matshamu ya wena yo tlakuka, hi kota ya ciwonho leci u ci mahileko tikweni gontlhe ga wena.+
4 U ta nyikela ha wece a tshomba leyi ndzi ku nyikileko.+
Ndzi ta ku maha u tirela valala va wena tikweni legi u nga gi tiviko,+Hakuva mu tlhotlhile a zanga ya mina yi vhura a ku khwatsi i ndzilo.*+
Yi ta vhura kala kupindzuka.”
5 Jehovha i ngalo:
“I rukatelwe loyi* a tsumbako a munhu,+Loyi a tsumbako a ntamu wa munhu,*+Ni loyi a mbilu yakwe yi fularelako Jehovha.
6 I ta fana ni sinya yi nga ku dongi yoce lomu ciwuleni.
A nga ta zvi wona zvazvinene loku zvita.Kanilezvi i ta hanya lomu ka matshamu ya ligwangwa lomu ciwuleni,Tikweni ga munyu, lomu ku nga hanyiko munhu.
7 I katekile loyi* a tsumbako Jehovha,Loyi a kutsumba kakwe ku nga ka Jehovha.+
8 I ta fana ni sinya yi byalilweko kusuhani ni mati,Leyi a timitsu ta yona ti navako tiya congweni.
A nga ta cizwa a cimumu loku cita,Kanilezvi a matluka yakwe ma ta nyuka contlhe cikhati.+
Hi lembe ga cihala a nga ta karateka,Ne hambu ku nyima ku pswala mihandzu.
9 A mbilu ya kanganyisa a ku hundza zvilo zvontlhe niku ya kayakaya.*+
Yi nga tiviwa himani ke?
10 Mina Jehovha ndza hlola mbilu,+Ndzi hlolisisa maalakanyo ma etileko,*Kasi ndzi chachazela a mun’we ni mun’wani hi kuya hi tindlela takwe,Hi kuya hi mihandzu ya mitiro yakwe.+
11 A ku khwatsi i hwari leyi yi kuhlehelako a matandza yo kala yi nga ma tsikelangi,I tshamisile lezvo a munhu loyi a hlengeletelako titshomba hi kukanganyisa.+
Ti ta mu siya laha cikari ka masiku ya wutomi gakwe,Niku hi magumo i ta woneka lezvaku cipumbu.”
12 A citshamu ca wuhosi co ngangamela leci ci tlakusilweko kusukela kusanguleniHi gona wutshamu ga hina go basa.+
13 O Jehovha, wena kutsumba ka Izrayeli,Vontlhe lava va ku tsikako va tawa tingana.
Lava va ku* fularelako va ta tsaliwa ntshurini,+Hakuva va tsikile Jehovha, a cibuka ca mati ya wutomi.+
14 O Jehovha, ndzi hanyise, ndzi ta hanya.
Ndzi ponise, ndzi ta pona,+Hakuva mina ndzi dhumisa wena.
15 Ku na ni lava va ndzi byelako ku:
“Yi kwihi a mhaka ya Jehovha?+
Yi wa tatiseke!”
16 Kanilezvi mina a ndzi tsikangi ku ku landzela kota murisi,Ne a ndzi navelangi a siku ga khombo.
Wena wa zvi tiva khwatsi lezvi a minomu ya mina yi zvi wulileko;Zvontlhe zvi mahekile mahlweni ka wena!
17 U nga ndzi chavisi.
Wena u wuchavelo ga mina sikwini ga khombo.
18 Lava va ndzi xanisako va wawe tingana,+Kanilezvi mina ndzi nga wisiwi tingana.
Va wa khomiwe hi kuchava,Kanilezvi mina ndzi nga khon’wi hi kuchava.
Va nehele a siku ga khombo,+U va pfotlosa, u va lovisa va ku bhi.
19 Jehovha i te ngalo ka mina: “Famba u ya yima laha nyangweni ya vanhu, leyi a tihosi ta Judha ti nghenako ni ku huma hi yona, ni lomu tinyangweni tontlhe ta Jerusalema.+
20 Va byele, uku: ‘Zwanani a mhaka ya Jehovha, n’wina tihosi ta Judha, na n’wina vanhu va Judha, na n’wina n’wentlhe vahanyi va Jerusalema, n’wina mu nghenako hi tinyangwa leti.
21 Jehovha i ngalo: “Ti woneleni, mu nga rwali mindzhwalo hi siku ga sabhadho kutani ku yi nghenisa hi tinyangwa ta Jerusalema.+
22 Mu nga humesi mindzhwalo lomu mitini ya n’wina hi siku ga sabhadho; mu nga tiri nchumu.+ Basisani a siku ga sabhadho khwatsi hi lezvi ndzi leleteleko a vakokwani va n’wina.+
23 Kanilezvi a va ingisangi ne ku demba ndleve yabye; va no ti nonohisa tinhamu va nga ingisi, va nga vhumeli ku layiwa.”’+
24 “‘“Hambulezvo, loku hakunene mu ndzi ingisa”, ku wula Jehovha, “mu nga nghenisi a mindzhwalo hi tinyangwa ta dhoropa legi hi siku ga sabhadho, mu basisa a sabhadho hi ku nga mahi ne ni ntiro wun’we ka gona,+
25 a tihosi ni tihosana leti ti tshamako citshan’wini ca wuhosi ca Dhavhidha+ tonawu ti ta nghena hi tinyangwa ta dhoropa legi na ti khilele a tikareta ni mahaxi, tona, ni tihosana tabye, ni vanhu va ka Judha ni vahanyi va Jerusalema;+ a dhoropa legi gi tava ni vanhu kala kupindzuka.
26 A vanhu va tata hi madhoropeni ya Judha ni matshan’wini ma randzeleko Jerusalema, ni tikweni ga Bhenjamini,+ ni tikweni ga mindzhelelo,+ ni tikweni ga zvitsunga, ni le Negebhe,* va neha minyikelo ya kuhiswa ya mirumba,+ ni miphahlo,+ ni minyikelo ya tindzhoho,+ ni libani, ni miphahlo ya kubonga, ndlwini ya Jehovha.+
27 “‘“Kanilezvi loku mu nga ndzi ingisi, mu nga basisi a siku ga sabhadho, mu rwala mindzhwalo mu yi nghenisa hi tinyangwa ta Jerusalema hi siku ga sabhadho, ndzi ta lumekela a tinyangwa ta gona tiswa hi ndzilo; a ndzilo wu ta hisa a tikhokhola* ta Jerusalema+ ti tiyisilweko khwatsi, niku wu nga ta timiwa.”’”+
Mitlhamuselo ya lahasi
^ Zvi nga maha na zvi wula ku: “Hakuva a ku khwatsi i ndzilo, mu lumekelwe zangeni ya mina”.
^ Hi kukongoma: “a tekako nyama yiva woko gakwe”.
^ Kutani: “a munhu wa ntamu loyi”.
^ Kutani: “a munhu wa ntamu loyi”.
^ Zvi nga maha na zvi wula ku: “a yi chumeki”.
^ Kutani: “kutizwa ka le ndzeni-ndzeni”. Hi kukongoma: “tiswa”.
^ Hi kukongoma: “ndzi”. Zvi nga maha na ku wuliwa Jehovha.
^ Kutani: “dzongeni”.
^ Kutani: “torres”.