Jeremiya 19:1-15
19 Jehovha i te ngalo: “Famba u ya xava a mbita ya wumba ka muwumbi.+ Teka a madhota yo kari cikari ka vanhu ni madhota yo kari cikari ka vapristi,
2 u huma uya Nkoveni wa N’wana wa Hinome,+ kusuhani ni Nyangwa ya Zvirengele, u ya huwelela seyo a magezu lawa ndzi to ku byela.
3 U taku: ‘Zwanani a mhaka ya Jehovha, n’wina tihosi ta Judha na n’wina vahanyi va Jerusalema. Jehovha wa mabutho, a Nungungulu wa Izrayeli, i ngalo:
“‘“Ndzi lava ku neha khombo wutshan’wini legi. A tindleve ta vontlhe lava va to gizwa ti ta tingiwa.
4 Hakuva va ndzi fularele,+ va hundzula a wutshamu legi ndzi nga ha gi tivi.+ Va phahlela lomu a vanungungulu van’wani, lava vona, ni vakokwani vabye, ni tihosi ta Judha va nga va tiviko. Va tatile a wutshamu legi hi nkhata wa vanhu vo kala nandzu.+
5 Va akile a matshamu ma tlakukileko ya Bhaali kasi va hisela kona a vana vabye ndzilweni, va maha hi vona a miphahlo ya kuhiswa ya murumba ka Bhaali,+ a zvilo zvaku a ndzi va layangi, a ndzi wulawulangi hi zvona, ne a zvi tshukangi zvi ndzi tela mbilwini ya mina.”’*+
6 “‘“Hikwalaho, a masiku mata”, ku wula Jehovha, “laha a wutshamu legi gi to kala gi nga ha vitaniwi ku Tofete kutani Nkova wa N’wana wa Hinome, kanilezvi gi to vitaniwa ku Nkova wa Kuhihirita.+
7 Ndzi ta thinda a makungo ya Judha ni ya Jerusalema wutshan’wini legi. Ndzi ta va wisa hi cipadha ca valala vabye ni canja ga lava va hlotako a wutomi* gabye. Ndzi ta nyikela a zvirumbi zvabye zvi giwa hi zvinyanyani zva matilo ni zvihari zva laha misaveni.+
8 Ndzi ta hundzula a dhoropa legi giva nchumu wo tshisa ni nchumu wo belwa noti. Ni wihi a to hundza hi kona i ta hlamala aba noti hi kota ya wontlhe a makhombo ya gona.+
9 Ndzi ta va gisa nyama ya vafana vabye ni ya vanhanyana vabye. A mun’we ni mun’wani i taga a nyama ya mun’wani hi kota ya kurandzelwa ni kuchava loku va to kuzwa hi lezvi va randzelweko hi valala vabye ni lava va hlotako a wutomi* gabye.”’+
10 “Makunu u ta faya a mbita mahlweni ka vavanuna lava u fambako navo,
11 u va byela, uku: ‘Jehovha wa mabutho i ngalo: “Ndzi ta va fayisa lezvo a vanhu lava ni dhoropa legi, a ku fana ni munhu a fayako a cibya ca wumba ci nga ha tlhanganiswi kambe; va ta lahla zvirumbi le Tofete kala ku nga havi ni wutshamu ga ku zvi lahla.”’+
12 “‘Hi zvalezvi ndzi to gi maha a wutshamu legi’, ku wula Jehovha, ‘ni vahanyi va kona, kasi a dhoropa legi gi fana ni Tofete.
13 A tiyindlu ta Jerusalema ni tiyindlu ta tihosi ta Judha ti ta nyenyeza a ku khwatsi wutshamu legi ga Tofete,+ ina, tontlhe a tiyindlu leti va mahileko miphahlo le hehla ka tona va phahlela a butho gontlhe ga matilo+ ni lomu va nga chululela kona a minyikelo ya zvakunwa ka van’wani vanungungulu.’”+
14 Laha Jeremiya a nga wuya hi Tofete, lomu Jehovha a nga mu rumile kuya phrofeta kona, i no ta yima laha tsendzeleni* wa yindlu ya Jehovha, a byela a vanhu vontlhe, aku:
15 “Jehovha wa mabutho, a Nungungulu wa Izrayeli, i ngalo: ‘Ndza neha a khombo gontlhe legi ndzi gi wulileko hehla ka dhoropa legi ni zvidhoropana zva kona, hakuva va ti nonohisile tinhamu tabye va ala ku ingisa a timhaka ta mina.’”+
Mitlhamuselo ya lahasi
^ Kutani: “ne a zvi tshukangi zvi nghena maalakanyweni ya mina”.
^ Kutani: “muhefemulo”.
^ Kutani: “muhefemulo”.
^ Kutani: “pátio”.
