Jeremiya 22:1-30
22 Jehovha i ngalo: “Relela uya ndlwini* ya hosi ya ka Judha, u ya wula mhaka leyi,
2 uku: ‘Zwana a mhaka ya Jehovha, wena hosi ya ka Judha, u tshamako citshan’wini ca wuhosi ca Dhavhidha, wena, ni malandza ya wena, ni vanhu va wena, lava va nghenako hi tinyangwa leti.
3 Jehovha i ngalo: “Yimelani a nongameto ni kululama. Tlhatlhisani lava va yivelwako canjeni ga vakanganyisi. Mu nga xanisi a muluveli ne mu nga mu maheli kubiha a n’wanana a nga hava papayi* ni noni.*+ Mu nga halati nkhata wo kala nandzu wutshan’wini legi.+
4 Hakuva loku mu hlayisa khwatsi a timhaka leti, a tihosi leti ti tshamako citshan’wini ca wuhosi ca Dhavhidha+ ti ta nghena hi tinyangwa ta yindlu leyi na ti khilele a tikareta ni mahaxi, tona, ni malandza ya tona, ni vanhu va tona.”’+
5 “‘Kanilezvi loku mu nga ingisi a timhaka leti, ndza hlambanya hi mina wutsumbu’, ku wula Jehovha, ‘a yindlu leyi yi ta hahlulwa yiva rumbi.’+
6 “Hakuva xungetano hi yindlu ya hosi ya ka Judha, Jehovha i ngalo:‘Wena u fana ni Gileyadhe ka mina,U fana ni madembele ya Lebhanoni.
Kanilezvi ndzi ta ku maha ciwula;A ku na dhoropa ni gin’we ga wena gi to tshama vanhu.+
7 Ndzi ta ku yimisela* valovisi va ta ku vhukela,A mun’we ni mun’wani na a hi ni matlhari yakwe.+
Va ta tsema a misedhare ya wena ya yineneVa yi hoxela ndzilweni.+
8 A matiko yo tala ma ta hundza hi dhoropeni legi ma wutisana, maku: “Hikuyini Jehovha a nga gi maha lezvi a dhoropa legi ga hombe?”+
9 Va ta hlamula, vaku: “Hi kota ya lezvi va tsikileko a civhumelwano ca Jehovha, a Nungungulu wabye, va ya khizamela van’wani vanungungulu, va va tirela.”’+
10 Mu nga rili loyi a filekoNe mu nga mu zweli wusiwana.
Kanilezvi rilelani nguvhu loyi a fambakoHakuva a nga ta ha wuya a ta wona a tiko legi a pswalilweko ka gona.
11 “Xungetano hi Xaluma,*+ a n’wana wa Josiya, a hosi ya Judha, loyi a fumako cikhundleni ca papayi wakwe Josiya,+ loyi a sukileko wutshan’wini legi, Jehovha i ngalo: ‘A nga ta ha wuya kambe.
12 Hakuva i ta fela wukhumbini lomu va mu yisileko kona; a nga ta ha gi wona kambe a tiko legi.’+
13 Khombo ka loyi a akako a yindlu yakwe hi kungalulami,Ni tikwartu takwe ta le hehla na a nga landzi a nongameto,Loyi a tirisako a munhu mun’wani mahala,A ala ku mu holisa;+
14 Loyi a nge: ‘Ndzi ta ti akela a yindlu ya hombeYi nga ni tikwartu to anama.
Ndzi ta yi vekela majanela,Ndzi yi nameketela a misedhare ndzi tlhela ndzi yi penda hi penda yo pswhuka.’
15 Xana u ta simama ku fuma hi lezvi u tirisako nguvhu a misedhare a ku pala van’wani ke?
A papayi wa wena yenawu i waga ni kunwa,Kanilezvi i wa yimela a nongameto ni kululama,+Niku zvi wa mu fambela khwatsi.
16 I wa yimela a mhaka ya loyi a xanisiwako ni cisiwana,Hikwalaho, zvi wa mu fambela khwatsi.
‘A hi zvalezvo zvi wulako zvona a ku ndzi tiva ke?’, ku wula Jehovha.
17 ‘Kanilezvi a matihlo ya wena ni mbilu ya wena zvi hlota a bhindzu go biha basi,Ni ku halata nkhata wo kala nandzuNi ku kanganyisa ni ku phanga.’
18 Hikwalaho, xungetano hi Jehoyakimu,+ a n’wana wa Josiya, a hosi ya Judha, Jehovha i ngalo:‘Va nga ta mu rila, vaku:
“Vasan’wina, a mano wa mina! Vasan’wina, a manani wa mina!”
Va nga ta mu rila, vaku:
“Yowe, a hosi! Mayo a wudzundzo gakwe gi fambileko!”
19 I ta lahlisiwa ku khwatsi i mbongola,+A kokoviselwa a ya hoxiwaLe handle ka tinyangwa ta Jerusalema.’+
20 Kandziha uya Lebhanoni u ya rila.Tlakusa a gezu ga wena le BhaxaniU rila le Abharime,+Hakuva zvontlhe a zvigango zva wena zvi pfotlosilwe.+
21 Ndzi wulawulile na wena laha u nga hi kuruleni.
Kanilezvi u te ngalo: ‘Ndzi nga ta ingisa.’+
Hi galegi a hanyela ga wena kusukela wun’wananeni ga wena,Hakuva a wu ingisangi a gezu ga mina.+
22 A moya wu ta kukuleta vontlhe a varisi va wena,+Ni zvigango zva wena zvi taya wukhumbini.
U ta wisiwa tingana u tsongahatiwa hi kota ya gontlhe khombo legi gi to ku wela.
23 Wena u tshamako le Lebhanoni,+U akileko a cisaka ca wena cikari ka misedhare,+U ta keta nguvhu a cikhati leci u tozwa a kubayisa,A kubayisa* ko khwatsi hi loku ka wasati a pswalako!”+
24 “‘A ku khwatsi hi lezvi ndzi hanyako’, ku wula Jehovha, ‘hambu loku Koniya,*+ a n’wana wa Jehoyakimu,+ a hosi ya Judha, i wa hi phera ya karimbo canjeni ga mina ga cinene, ndzi wa ta mu susa!
25 Ndzi ta ku nyikela canjeni ga lava va hlotako a wutomi* ga wena, canjeni ga lava u va chavako, canjeni ga Nebhukadnezare,* a hosi ya Bhabhuloni, ni canjeni ga vaKaldheya.+
26 Wena ni mamani wa wena loyi a nga ku pswala, ndzi ta mu hoxa ka gin’wani tiko legi mu nga kala ku pswaliwa ka gona, niku mu ta ya fela seyo.
27 Va nga ta ha wuya kambe tikweni legi va gi xuvako.+
28 Xana Koniya ova mbita yi nyenyiwako, leyi yi fayekileko,A cibya ci nga laviwiko hi munhu ke?
Hikuyini yena ni pswalo wakwe va hoxilweko,Va hoxiwa tikweni legi va nga gi tiviko?’+
29 O wena misava,* wena misava, wena misava, zwana a mhaka ya Jehovha.
30 Jehovha i ngalo:
‘Tsalelani a munhu loyi kota loyi a nga hava vana,Kota munhu loyi a to kala ku humelela wutomini* gakwe,Hakuva i hava ni mun’we wa pswalo wakwe zvi to mu fambela khwatsi,A tshama citshan’wini ca wuhosi ca Dhavhidha a fuma kambe le Judha.’”+
Mitlhamuselo ya lahasi
^ Kutani: “palácio”.
^ Kutani: “a felweko hi vapswali”.
^ Kutani: “wasati wo felwa hi nuna”.
^ Hi kukongoma: “Ndzi ta ku basisela”.
^ Loyi a gin’wani vito a nga Jehohaza.
^ Hi kukongoma: “A kulun’wa”.
^ Loyi a vitaniwako kambe ku hi Jehoyakina ni ku Jekoniya.
^ Kutani: “muhefemulo”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “tiko”.
^ Hi kukongoma: “masikwini”.
