Jeremiya 24:1-10
-
A makuwu ya manene ni makuwu yo nyenyeza (1-10)
24 Jehovha i no ndzi komba a zvindzala* zvimbiri zvi nga hi ni makuwu zvi nga vekilwe mahlweni ka tempeli ya Jehovha, andzhako ka loku Nebhukadnezare,* a hosi ya Bhabhuloni, a tekile Jekoniya,*+ a n’wana wa Jehoyakimu,+ a hosi ya Judha, a mu yisa wukhumbini zvin’we ni tihosana ta ka Judha, ni vameseri zvin’we ni vabethi va tisimbi;* i no va teka Jerusalema a va yisa Bhabhuloni.+
2 A cindzala* cin’we ci wa hi ni makuwu ya manene nguvhu, yo fana ni makuwu yo sangula, kanilezvi a cindzala leci cin’wani ci wa hi ni makuwu yo nyenyeza nguvhu, ya ku ma wa nga ringani ni ku giwa.
3 Jehovha i no ndzi wutisa, aku: “Jeremiya, zvini u zvi wonako?” Ndzi hlamula ndziku: “Ndzi wona a makuwu; lawa ya manene, ma nene nguvhu, kanilezvi lawa yo nyenyeza, ma nyenyezile nguvhu; ma nyenyezile nguvhu laha ka ku a ma ringani ni ku giwa.”+
4 Hi kulandzela, a mhaka ya Jehovha yi nota ka mina, yi taku:
5 “Jehovha, a Nungungulu wa Izrayeli, i ngalo: ‘A ku khwatsi makuwu lawa ya manene, ndzi ta va wonisa zvalezvo a vaJudha lava va nga wukhumbini, lava ndzi va hlongolileko wutshan’wini legi vaya tikweni ga vaKaldheya.
6 Ndzi ta veka tihlo ga mina kabye kasi ku va mahela zvazvinene, ndzi va wuyisa tikweni legi.+ Ndzi ta va aka, ndzi nga ta va khungumula; ndzi ta va byala, ndzi nga ta va tsuwula.+
7 Ndzi ta va nyika a mbilu ya ku ndzi tiva a ku hi mina Jehovha.+ Va tava vanhu va mina, minawu ndziva Nungungulu wabye+ hakuva va ta wuya ka mina hi timbilu tabye tontlhe.+
8 “‘Kanilezvi, xungetano hi makuwu lawa yo nyenyeza, ya ku nyenyeza nguvhu laha ka ku a ma ringani ni ku giwa,+ Jehovha i ngalo: “Ndzi ta mu wonisa lezvo Zedhekiya,+ a hosi ya ka Judha, ni tihosana takwe, ni misalela ya Jerusalema leyi yi seleko tikweni legi ni lava va tshamako tikweni ga Gibhite.+
9 Ndzi ta va maha vava nchumu wo tshisa ni khombo ka yontlhe mifumo ya misava;+ va ta rukiwa, va maha vingu, ni cihlekiso, ni ciruko+ ka wontlhe matshamu lawa ndzi to va hangalasa ka wona.+
10 Ndzi ta va rumelela cipadha,+ ni ndlala ni ntungu*+ kala va lova va ku bhi tikweni legi ndzi nyikileko vona ni vakokwani vabye.”’”
Mitlhamuselo ya lahasi
^ Kutani: “zvirundzu”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ A vitaniwako kambe ku hi Jehoyakina ni ku Koniya.
^ Zvi nga maha na zvi wula ku: “vaaki va makhokhola”.
^ Kutani: “cirundzu”.
^ Kutani: “mababyi”.
