Jeremiya 25:1-38
25 Hi lembe ga wumune ga Jehoyakimu,+ a n’wana wa Josiya, a hosi ya Judha, gi nga hi lembe go sangula ga Nebhukadnezare,* a hosi ya Bhabhuloni, Jeremiya i no amukela a mhaka xungetano hi vontlhe a vanhu va ka Judha.
2 Muphrofeti Jeremiya i no byela vanhu vontlhe va ka Judha ni vahanyi vontlhe va Jerusalema, aku:
3 “Kusukela hi lembe ga wu 13 ga Josiya,+ a n’wana wa Amoni, a hosi ya Judha, kala nyamutlha, ndzeni ka malembe lawa ya 23, a mhaka ya Jehovha yata ka mina, ndzi mu byela hi kuphindaphinda,* kanilezvi a mu ingisi.+
4 Jehovha i mu rumelele a malandza yakwe wontlhe, va nga vaphrofeti, a ma rumela hi kuphindaphinda,* kanilezvi a mu ma ingisangi ne a mu dembangi a tindleve ta n’wina kasi muzwa.+
5 Ma waku: ‘Hundzulukani, a mun’we ni mun’wani wa n’wina i wa tsike a tindlela takwe ta kubiha ni mitiro yakwe ya kubiha+ kasi mu simama ku hanya cikhati co leha tikweni legi Jehovha a mu nyikileko a kaleloko, n’wina ni vakokwani va n’wina.
6 Mu nga landzeli a van’wani vanungungulu, mu va tirela mu tlhela mu va khizamela, mu ndzi zangarisa hi ntiro wa mandla ya n’wina, ndzi nga mu nehela khombo.’
7 “‘Kanilezvi a mu ndzi ingisangi’, ku wula Jehovha. ‘Mu no ndzi zangarisa hi ntiro wa mandla ya n’wina, mu ti nehela khombo hi n’wece.’+
8 “Hikwalaho, Jehovha wa mabutho i ngalo: ‘“Kota lezvi mu nga kala ku ingisa a timhaka ta mina,
9 ndza vitanisa a mingango yontlhe ya le n’walungu”,*+ ku wula Jehovha, “ndza vitanisa Nebhukadnezare,* a hosi ya Bhabhuloni, a nandza ga mina;+ ndzi ta va neha va talwa ni tiko legi,+ ni vahanyi va gona, ni matiko wontlhe ma gi randzeleko.+ Ndzi ta va nyikela kulovisweni, ndzi va maha nchumu wo tshisa, ni wa kubelwa noti, ni rumbi ga pindzukelwa.
10 Ndzi ta fuvisa a guwa ga litsako, ni guwa ga kunengela,+ ni gezu ga noivho, ni gezu ga noivha,+ ni guwa ga cigayo ni kuwonekela ka kandiya.
11 Gontlhe a tiko legi gi tava marumbi ni nchumu wo tshisa niku a matiko lawa ma ta tirela a hosi ya Bhabhuloni a 70 wa malembe.”’+
12 “‘Kanilezvi loku a 70 wa malembe ma mbhelile,+ ndzi ta lamula* a hosi ya Bhabhuloni ni tiko lego hi kota ya cigoho cabye’,+ ku wula Jehovha, ‘ndzi ta hahlula a tiko ga vaKaldheya ndzi gi maha ciwula kala kupindzuka.+
13 Ndzi ta neha hehla ka tiko lego a timhaka ta mina tontlhe leti ndzi ti wulileko hi gona, zvontlhe lezvi zvi tsalilweko lomu bhukwini, lezvi Jeremiya a phrofeteleko a matiko wontlhe lawa.
14 Hakuva a matiko yo tala ni tihosi ta hombe+ ti ta va maha tikhumbi;+ ndzi ta va chachazela hi kuya hi zvimaho zvabye ni ntiro wa mandla yabye.’”+
15 Hakuva Jehovha, a Nungungulu wa Izrayeli, i te ngalo ka mina: “Teka a kopo ya vhinyo ya zanga, leyi yi nga canjeni ga mina, u nwisa a matiko wontlhe lawa ndzi ku rumelako ka wona.
16 Ma tanwa, ma dhedherekela, ma mahisa ku khwatsi vanhu vo hlanya hi kota ya cipadha leci ndzi ci rumelako cikari ka wona.”+
17 Hikwalaho, ndzi no teka a kopo canjeni ga Jehovha, ndzi nwisa matiko wontlhe lawa Jehovha a ndzi rumeleko ka wona.+
18 Ndzi no sangulela Jerusalema ni madhoropeni ya Judha,+ ni ka tihosi takwe ni tihosana takwe kasi vava rumbi ni nchumu wo tshisa, wa ku belwa noti, ni ciruko,+ kota lezvi zvi wonekako nyamutlha;
19 ku landzela Faro, a hosi ya Gibhite, ni malandza yakwe, ni tihosana takwe, ni vontlhe a vanhu vakwe,+
20 ni tixaka tabye tontlhe to hambanahambana, ni tihosi tontlhe ta tiko ga Uza, ni tihosi tontlhe ta tiko ga vaFilistiya,+ ni Axkeloni,+ ni Gaza, ni Ekroni, ni lava va seleko va Axdhodhe,
21 na Edhomi,+ na Mowabhi,+ ni vaAmoni,+
22 ni tihosi tontlhe ta Tire, ni tihosi tontlhe ta Sidhoni,+ ni tihosi ta le zvihlaleni* zva bimbi,
23 ni Dhedhani,+ ni Tema, ni Bhuzi, ni vontlhe lava va tsemileko misisi lomu mareveni,+
24 ni tihosi tontlhe ta vaArabhia,+ ni tihosi tontlhe ta tixaka to hambanahambana leti ti tshamako lomu ciwuleni,
25 ni tihosi tontlhe ta Zimri, ni tihosi tontlhe ta Elami,+ ni tihosi tontlhe ta vaMedhi,+
26 ni tihosi tontlhe ta le n’walungu — a ta laha kusuhani ni ta le kule, — hi yin’we ni yin’we, ni mifumo yontlhe leyi yin’wani yi nga laha misaveni; niku a hosi ya Xexake*+ yi tanwa andzhako kabye.
27 “Va byele ku: ‘Jehovha wa mabutho, a Nungungulu wa Izrayeli, i ngalo: “Nwanani, mu popiwa, mu hlata, muwa mu nga ha vhuki kambe+ hi kota ya cipadha leci ndzi ci rumelako ka n’wina.”’
28 Loku va ala ku teka kopo canjeni ga wena vanwa, va byele ku: ‘Jehovha wa mabutho, i ngalo: “Nwanani!
29 Loku a khombo legi ndzi to gi neha gi sangula hi dhoropa legi gi nga ni vito ga mina,+ xana n’wina mu ta pona ku tsayisiwa ke?”’+
“‘Mu nga ta pona ku tsayisiwa hakuva ndza vitanisa cipadha ci tela vahanyi vontlhe va misava’, ku wula Jehovha wa mabutho.
30 “U ta va phrofetela timhaka tontlhe leti u va byela ku:‘Jehovha i ta bhonga hi le hehla,I ta zwata a gezu gakwe na a hi wutshan’wini gakwe go basa.
I ta tlakusa gezu a bhongela a wutshamu gakwe,
A kanyuluka a ku khwatsi hi lava va kamelako mauvha lomu cigowolweni;I ta yimbelela a giyagiya hehla ka vahanyi vontlhe va misava.’
31 ‘A guwa gi ta zwala ni le magemeta-musi ya misava,Hakuva Jehovha i na ni timhaka ni matiko.
I ta lamula a vanhu vontlhe* ha yece.+
Niku i ta nyikela vakubiha ka cipadha’, ku wula Jehovha.
32 Jehovha wa mabutho i ngalo:
‘A khombo ga hangalaka hi tiko ni tiko,+Ni moya wa hombe wu ta tsikeletwa hi magemeta-musi ya misava.+
33 “‘Ka siku lego, lava va delweko hi Jehovha va ta mbambamela kusukela ka mbhiri yin’we ya misava kala ka yin’wani mbhiri ya misava. Va nga ta riliwa, hambu ku hlengeletiwa, ne ku lahliwa. Va ta ku khwatsi citromu laha misaveni.’
34 N’wina varisi, banani tinyandha, mu rila!
Wumbulukelani, n’wina vahombe va ntlhambi,Hakuva ci chikele a cikhati ca lezvaku mu dawa, mu hangalasiwa,Niku mu ta wisa ku khwatsi mu cibya ca lisima!
35 A varisi a va na ka ku tsutsumela kona,Ni vahombe va ntlhambi a va na ka ku hulukela kona.
36 Hi nga zwani a varisi va rilako,Ni vahombe va ntlhambi va bako tinyandha.Hakuva Jehovha wa hahlula a wuriselo gabye.
37 A matshamu yo rula a ma ha hi na wutomiHi kota ya zanga yi vhurako ya Jehovha.
38 I humele hi wutshan’wini gakwe a ku khwatsi cinghalana,*+Hakuva a tiko gakwe gi cicile giva nchumu wo tshisaHi kota ya cipadha ca tihanyiNi zanga yakwe yi vhurako.”
Mitlhamuselo ya lahasi
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Hi kukongoma: “ndzi vindzuka ni mixo ndzi wulawula”.
^ Hi kukongoma: “a vindzuka a ma rumela”.
^ Hi kukongoma: “Nebhukadrezare”, ku nga tsalela gin’wani ga vito gakwe.
^ Kutani: “norte”.
^ Kutani: “ndzi ta tsayisa”.
^ Kutani: “ilhas; zvilundzweni”.
^ Ko khwatsi i tsalela go fihlala ga Bhabheli (Bhabhuloni).
^ Hi kukongoma: “nyama yontlhe”.
^ Kutani: “cinghalana ca malevhu”.
