Jeremiya 26:1-24
26 Kusanguleni ka kufuma ka Jehoyakimu,+ a n’wana wa Josiya, a hosi ya Judha, ku nota a mhaka leyi hi ka Jehovha, yi taku:
2 “Jehovha i ngalo: ‘Yima laha tsendzeleni* wa yindlu ya Jehovha, u wulawula ni vanhu vontlhe va madhoropa ya ka Judha lava va tako va ta khozela* ndlwini ya Jehovha. Va byele zvontlhe lezvi ndzi ku leletelako; u nga siyi nchumu.
3 Kuzvilava va ta ingisa, a mun’we ni mun’wani a hundzuluka ndleleni yakwe ya kubiha, na mina ndzi cica a maalakanyo* xungetano hi khombo legi ndzi lavako ku va tisela hi kota ya mitiro yabye ya kubiha.+
4 Va byele ku: “Jehovha i ngalo: ‘Loku mu nga ndzi ingisi, mu landzela a nayo* lowu ndzi mu nyikileko,
5 hi ku ingisa a timhaka ta malandza ya mina, a vaphrofeti, lava ndzi va rumelako ka n’wina hi kuphindaphinda* kanilezvi mu nga va ingisi,+
6 a yindlu leyi ndzi ta yi maha yi fana ni Xilo.+ Ndzi ta maha a dhoropa legi giva ciruko ka matiko wontlhe ya misava.’”’”+
7 A vapristi, ni vaphrofeti, ni vanhu vontlhe va nozwa Jeremiya na a wulawula a timhaka leti ndlwini ya Jehovha.+
8 Hikwalaho, a cikhati leci Jeremiya a nga mbheta a ku wula timhaka tontlhe leti Jehovha a nga mu leletele ku byela vanhu vontlhe, a vapristi, ni vaphrofeti, ni vanhu vontlhe va no mu khoma, vaku: “U tafa.
9 Hikuyini u phrofetileko hi vito ga Jehovha, uku: ‘A yindlu leyi yi ta fana ni Xilo, niku a dhoropa legi gi ta hahluliwa gi nga ha tshami munhu’?” A vanhu vontlhe va no tlhangana va randzela Jeremiya ndlwini ya Jehovha.
10 Laha a tihosana ta ka Judha ti ngazwa a timhaka leti, ti no kandziha hi ndlwini* ya hosi tiya ndlwini ya Jehovha ti ya tshama laha mahlweni ka nyangwa yiswa ya Jehovha.+
11 A vapristi ni vaphrofeti va no byela a tihosana ni vanhu vontlhe, vaku: “A munhu loyi i fanele kufa+ hakuva i phrofetile khombo hehla ka dhoropa legi, kota lezvi mu zvi zwileko hi tindleve ta n’wina.”+
12 Jeremiya i no byela a tihosana tontlhe ni vanhu vontlhe, aku: “Hi Jehovha a ndzi rumileko a ku phrofetela yindlu leyi ni dhoropa legi a timhaka tontlhe leti mu ti zwileko.+
13 Makunu lulamisani a tindlela ta n’wina ni mitiro ya n’wina, mu ingisa a gezu ga Jehovha, a Nungungulu wa n’wina, niku Jehovha i ta cica a maalakanyo yakwe* xungetano hi khombo legi a wulileko lezvaku i ta mu tisela.+
14 Kanilezvi mina ndzi mandleni ya n’wina. Ndzi maheni ni cihi mu ci wonako na ci hi cinene kutani na ci lulamile mahlweni ka n’wina.
15 Kanilezvi tivani lezvaku loku mu ndzi daya mu ta ti nehela a nkhata wo kala nandzu hehla ka n’wina, ni hehla ka dhoropa legi, ni hehla ka vahanyi va gona hakuva hakunene hi Jehovha loyi a ndzi rumileko a ku ta mu byela tontlhe a timhaka leti mu ti zwileko.”
16 Makunu a tihosana ni vanhu vontlhe va no byela a vapristi ni vaphrofeti, vaku: “A munhu loyi a nga faneli kufa hakuva i wulawulile na hina hi vito ga Jehovha, a Nungungulu wa hina.”
17 Ahandle ka lezvo, a madhota yo kari ya tiko ma no suka ma byela a bandla gontlhe ga vanhu, maku:
18 “Mika+ wa le Morexete i wa phrofeta masikwini ya Hezekiya,+ a hosi ya Judha, a byela a vanhu vontlhe va ka Judha, aku: ‘Jehovha wa mabutho i ngalo:
“Ziyoni i ta rimiwa a ku khwatsi i simu;Jerusalema i ta maha a tinhulu ta maribye,+Ni citsunga ca Yindlu* ci ta ku khwatsi matshamu ma tlakukileko lomu khwatini.”’+
19 “Xana Hezekiya, a hosi ya Judha, ni tiko gontlhe ga ka Judha gi mu dele ke? A nga chavangi Jehovha, a khongotela Jehovha lezvaku a mu mahela tipswalo, laha ka ku Jehovha a cica a maalakanyo yakwe* xungetano hi khombo legi a nga wulile lezvaku i ta va nehela ke?+ Hikwalaho, hi lava ku ti nehela a khombo ga hombe ha hoce.*
20 “Ku wa hi ni mun’wani munhu, loyi a nga phrofeta hi vito ga Jehovha, wa ku hi Urija, a n’wana wa Xemaya, wa le Kiriyat-Jeyarime,+ loyi a nga phrofetela a dhoropa legi ni tiko legi hi timhaka to fana ni leti ta Jeremiya.
21 Hosi Jehoyakimu,+ ni tontlhe tinhenha takwe, ni tihosana tontlhe va nozwa a timhaka takwe, a hosi yi lava ku mu daya.+ Laha Urija a nga zvizwa, i no chava a tsutsuma aya Gibhite.
22 Makunu hosi Jehoyakimu i no rumela Elnatani,+ a n’wana wa Akbhori, ni van’wani vavanuna vaya Gibhite.
23 Va no wuya na Urija hi le Gibhite, vata naye ka hosi Jehoyakimu a ta mu daya hi tlhari+ a gumesa a hoxa cirumbi cakwe lomu cilahleni ca vanhu laha va yileko.”
24 Kanilezvi Ahikamu,+ a n’wana wa Xafani,+ i no seketela Jeremiya. Hikwalaho, a nga nyikelwangi mandleni ya vanhu kasi va mu daya.+
Mitlhamuselo ya lahasi
^ Kutani: “pátio”.
^ Kutani: “khizama”.
^ Kutani: “ndzi ti laya”.
^ Kutani: “gondziselelo”.
^ Hi kukongoma: “ndzi vindzukako ni mixo ndzi va rumela”.
^ Kutani: “palácio”.
^ Kutani: “i ta ti laya”.
^ Kutani: “citsunga ca tempeli”.
^ Kutani: “ka mihefemulo ya hina”.
^ Kutani: “a ti laya”.
